Xitayning Uyghur rayonidiki 10-nöwetlik partiye wekilliri qurultiyida muqimliq we dawamliq zerbe bérish tekitlen'gen

Muxbirimiz méhriban
2021-10-22
Share
Xitayning Uyghur rayonidiki 10-nöwetlik partiye wekilliri qurultiyida muqimliq we dawamliq zerbe bérish tekitlen'gen
Yettesu

21-Öktebir küni Uyghur aptonum rayonluq partkomning 10-nöwetlik partiye wekilliri qurultiyi échilghan. Xitay hökümet taratqulirida bu qétimliq qurultayni medhiyeligen xewer we maqaliler yer alghan.

Xitayning "Tengritagh tori" 21-öktebir küni bu qurultay heqqide mexsus obzor maqalisi élan qilghan. Uningda "Xitay kompartiyesi qurulghanliqining 100 yilliqida, shinjangdiki her millet xelqi pütün memliket xelqi bilen birlikte omumiyyüzlük béyish yoligha yüzlendi. Bu qurultay kompartiyening ikkinchi yüz yilliq tereqiyat küresh nishanidiki muhim yighin," dep körsitilgen.

Wahalenki, mezkur qurultay heqqidiki xewerlerdin ashkarilinishiche, qurultayda asasliq téma yenila rayonning muqimliqini saqlashni barliq siyasiy wezipilerdin muhim dep bilish tekitlen'gen.

"Tengritagh tori" ning bu heqtiki obzor maqalisida mundaq diyilgen: "Jem'iyet muqimliqi we uzun muddet eminlik shinjangdiki barliq xizmetlerning halqiliq nuqtisi. Ilgiriki 5 yilda Uyghur aptonum rayonluq partkom bayriqi roshen halda muqimliqni qoghdashni barliq siyasiy wezipilerdin üstün qoydi. Muqimliqni teyshen téghidinmu éghir bolghan siyasi wezipe dep bildi. Qanun quralliri, qanuniy ang, örnekler arqiliq idare qilish, omumiyyüzlük tedbir élish qatarliqlardin paydilinip, ilgiriki zorawanliq herketliri köp yüz béridighan weziyetni özgertti, herqaysi milletlerning bixeterlik tuyghusini kücheytip, uzun yilliq eminlik arzusini ishqa ashurdi."

Qurultayda yene Uyghur aptonum rayonidiki muqimliqqa kapaletlik qilish üchün, atalmish "Bölgünchilik we esebiylik" ke qarshi turush, "Ikki yüzlimichilik" ke zerbe bérish, kompartiyening qattiq kontrol qilish siyasitini taki yéza-kentlerdiki eng kichik halqilarghiche emeliyleshtürüsh sho'arliri qayta-qayta tekrarlan'ghan.

Amérikadiki Uyghur kishilik hoquq qurulushining tetqiqatchisi zubeyre shemsidin xanim ziyaritimizni qobul qilip, mezkur qurultayda otturigha qoyulghan mezmunlar heqqidiki so'alirimizgha jawap berdi.

Zubeyre xanim xitay hökümitining aghzida Uyghur rayonini "Xitayning ayrilmas bir qismi" dep teshwiq qilsimu, emma emeliyette rayonda mustemlike siyasiti yürgüziwatqanliqini eskertip ötti.

Zubeyre xanim yene bu qurultayning re'is sehnisidin orun alghan da'imiy ezalar tizimliki ichide xitay emeldarlardin 10 neper, Uyghur emeldarlardin peqetla 3 neper bolushning alahide diqqet qozghaydighanliqini bildürdi.

Zubeyre xanim sözi dawamida yene xitay hökümitining rayondiki basturush siyasitining axiriqi meqsidi heqqide toxtaldi.

Uning tekitlishiche, xitay hökümitining rayondiki siyasiti emeliyette zémin igisi bolghan Uyghurlargha qarita qattiq basturush, hetta ularni millet boyiche yoqitip rayonni toluq xitaylashturush, Uyghurlarning izini bu tupraqtin öchürüshni meqset qilghan iken.

Gollandiyediki Uyghur közetküchilerdin asiye Uyghur xanim ziyaritimizni qobul qilip, aldi bilen mezkur qurultayni uyushturghan Uyghur aptonum rayonluq partkom we uning hakimiyet yürgüzüsh qurulmisi heqqide toxtaldi.

U Uyghur aptonum rayonluq partkomning xitay kompartiyesi merkiziy komitétining Uyghur aptonum rayonini idare qilish we bashqurush siyasetlirini ijra qilidighan, hökümet apparatliridin üstün turidighan alahide hoquqluq organ ikenlikini bildürdi.

Asiye xanim mezkur qurultayda xitay kompartiyesining rayondiki mustemlike siyasitini ijra qilish we emeliyleshtürüsh tedbirlirini xulasilep chiqqanliqini bildürdi.

U mezkur qurultayda da'irilerning 2010-yildin buyan échilghan 3 qétimliq "Shinjang xizmet yighini" ning netijiliri tilgha élin'ghanliqini, shundaqla bundin kéyin rayonni idare qilish we tizginleshni emelge ashurushta "Tosalghu" dep qaralghan barliq amillarni tüp yiltizidin yoqitishni meqset qilghanliqini tekitlep ötti.

Asiye xanimning tekitlishiche, xitay hökümiti aldinqi yillarda tengritaghning jenubidiki Uyghurlarni asasiy nuqta qilip, ularni öz zéminidin yötkesh arqiliq rayondiki Uyghurlarning nopusini shalanglashturush, Uyghurlarni xitay kimlikini qobul qilishqa mejburlash bolghan bolsa, emdilikte Uyghurlarni teltöküs xitaylashturush, ularning Uyghur rayonidin ibaret bu ana wetinige bolghan heqdarliq tuyghusi we tupraq tuyghusini berbat qilishni meqset qilghan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet