Һиндонозийә түрмисидики әхмәт бозоғлан: «сорақта қейин-қистаққа учридуқ, өзимиз чүшәнмигән қәғәзләргә қол қойдуқ»

Мухбиримиз шөһрәт һошур
2020-11-26
Share
hindoneziye-exmet-bozoghlan-shohret-sohbet.gif Нөвәттә һиндонезийә түрмисидә җаза муддитини өтәватқан уйғур мәһбус әхмәт бозоғлан мухбиримиз билән син сөһбити өткүзүватқан көрүнүш. 2020-Йили 11-ноябир.
RFA/Shöhret Hoshur

Уйғур мәһбус әхмәт бозоғлан билән сөһбәт (2)

Нөвәттә һиндонезийә түрмисидә җаза муддитини өтәватқан уйғур мәһбус әхмәт бозоғлан мухбиримиз билән өткүзгән иккинчи қетимлиқ сөһбитидә өзлириниң һиндонезийәдики радикал гуруппилар билән алақиси барлиқини кәскин рәт қилди. Өзлири хәйр-сахавәтчи дәп билгән вә өзлириниң түркийәгә келишигә ярдәм қилишини күткән кишиләрниң җинайәт гумандари болуп чиқип қалғанлиқини баян қилған әхмәт бозоғлан өзлириниң сорақ җәрянида еғир қейин-қистаққа учриғанлиқи, сорақта тәрҗиманниң лаяқәтсизлики сәвәбидин өзлири чүшәнмигән қәғәзләргә қол қоюшқа мәҗбур болғанлиқини тилға алди. Төвәндә бу тәпсилатларни әхмәт бозоғланниң өз еғизидин аңлайсиләр:

Соал: немә үчүн түркийәгә малайсия арқилиқ кәлмәй, һиндонезийә арқилиқ келишни таллидиңлар?

Җавап: малайсияда узун туруп кәттуқ, бир нәччә ай иқтисадий җәһәттин чиқим җиқ болуп кәтти, шуңа башқа йол издәп, һиндонезиәйгә бардуқ.

Соал: малайсиайдин башқилар кәлди, силәр бирәр тосалғуға учриған әһвал барму?

Җавап: һәммигә аян, 2014‏-йиллири малайсияда бир нәччә йүз әмәс, нәччә миңлап адәм (уйғур) түркийәгә баримиз дәп сақлап тураватқан иди, у йәрдә турған вақтимиз бәк узирап кәтти, йенидимиздики пулимизму түгәп қалғили турди. Шуңа тезрақ маңдиған йолни қилайли дәп һиндонезийәгә барғантуқ. У йәрдә бирлири билән учришиш яки у йәрдә туруп қелиш мәқситимиз йоқ.

Соал: демәк, әрзанрақ бир йолни издәп һиндонезийәгә бардиңларму?

Җавап: һәә, шундақ.

Соал: сотта силәрниң һиндонезийәдики радикал гурупплар билән тәшкилий алақәңлар болғанлиқи, һәтта улар билән һәмкарлашқанлиқиңлар үчүн кесилгәнликиңлар һәққидә гәпләр бар, растинла сотта мушундақ әйиблимә болдиму?

Җавап: биз һиндонезийәгә барғандин кейин, у йәрдиму узун туруп қалдуқ, бу җәрянда бизни түркийәгә йолға селип қойиду дәп үмид күткән бу адәмләрдин мәсилә чиқип тутулғандин кейин, бизму тутулдуқ. Биз паспортимиз сәвәблик тутулдуқ. Әмма сотта бизни уларға четишлиқ «терорчилар» дәп кесивәтти.

Соал: силәр алақилашқан шу кишиләрниң радикал тәшкилат әзалири икәнликидин хәвириңлар болғанму?

Җавап: һечқандақ хәвиримиз йоқ, чүнки биз мәйли ингилизчидә болсун, мәйли һиндонезийәчидә болсун, тил сәвийәмиз бәк аҗиз. Шуңа биз уларниң кимликини, яхши яки яман адәмликини билмидуқ, пәқәт тәвәккүл қилип, түркийәгә беривелишимизға ярдәм қиларму дегән үмид биләнла улар кәл дегән йәргә кәлдуқ, тур дегән йеридә турдуқ. Бизниң йенимиздин терорлуқ әсваблири яки һәрқандақ бир испати чиққини йоқ, бирәрсини зәхмиләндүргән әһвал техиму йоқ, шулар билән четишлиқ дәпла кесивәтти.

Соал: сорақ җәрянида шу радикал гуруппилар билән алақәңлар барлиқини етирап қилип, имза қойған әһвалиңлар барму? билип яки билмәй?

Җавап: сорақ җәрянида, һәтта сот ахирлашқичә у тәшкилатлар билән алақимиз йоқлуқида чиң турдуқ; лекин сорақчилар бизни еғир қийниди, урди, есип қойди, уятлиқ йәрлиримизни қисти, итқа талитишқа интилди; униң үстигә сотқа кәлгән тәрҗиман лаяқәтлик әмәс, һондонезийә һөкүмити тапқан түрк тәрҗиман бизниң гепимизни чүшүнүп кетәлмиди, сотта әһвалниму толуқ тәрҗимә қилип бәрмиди, сотчиниң гепи узун, тәрҗиманниң бәк қисқа, биз бирмунчә қәғәзләргә чүшәнмәй туруп қол қойивәттуқ.

Соал: ундақта, қейин-қистақтин мәҗбурән қол қойдуқ демәкчиму яки чүшәнмәсликтин демәкчиму?

Җавап: һәр иккиси бар, қейин-қистаққа чидимиғанда қол қойғинимизму бар, сотта чүшәнмәй туруп қол қойивәткинимизму бар.

Соал: силәрни мушу радикал гуруппларға тонуштурған кишиләр, йәни оттуридики кишиләр буларниң кимликини биләмдиғанду?

Җавап: уни биз билмәймиз. Буларниң бәзилири кесилди, бәзилири қоюветилди.

Соал: булар һиндонезийәликләр охшимамду?

Җавап: шундақ. . . . Хапа болмайсиз, вақтим тошуп қалди. . . . .

Соал: болиду, йәнә бир қетимда сөзлишәйли, әгәр мумкинчилик болуп қалса. . . .

Һөрмәтлик радийо аңлиғучилар, юқирида уйғур мәһбус әхмәт бозоғланниң малайсиядин һиндонезийәгә өтүш, тутулуш вә сорақ җәрянлири һәққидә мәлумат бәрдуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт