Уйғур сәнити вә мәдәнийити мюнхенда алқишқа еришти

Ихтиярий мухбиримиз әкрәм
2019-07-09
Елхәт
Пикир
Share
Принт

6-Июл германийәниң мюнхен шәһиридики тәркибидә 80 тәшкилати болған «ихтиярий мулазимәт тәшкилатлар бирлики» шәһәрниң ават сода райони болған мәрйәм мәйданида «өзигә ярдәм» намида һәрқайси милләтләрниң мәдәнийәт-сәнитини көрәк қилиш паалийити уюштурған. Һәр 2 йилда бир қетим өткүзүлидиған бу паалийәттә мюнхен шәһиридики «уйғур аяллириниң мәдәнийити вә мукәммәлликини илгири сүрүш җәмийити» билән «германийә уйғур анилар бирлики» номур көрситип, йәрлик авам вә чәтәлләрдин кәлгән саяһәтчиләрниң қизғин алқишлириға сазавәр болған.

«Уйғур аяллириниң мәдәнийити вә мукәммәлликини илгири сүрүш җәмийити» ниң мәсули нурниса ханимниң билдүрүшичә, мәзкур тәшкилат һәр қетимқи «өзигә ярдәм» намидики паалийәтлиридә «уйғурларниң тамашибинларни җәлп қилиш күчи юқири» дәп қарап, 1-болуп уйғурларни сәһнигә чиқиридикән.

Дәрвәқә, 7-айниң 6-күни чүштин бурун тунҗи болуп сәһнигә чиққан уйғур өсмүрлириниң нәпис усуллири вә уйғурчә көркәм кийимлири, йеқимлиқ нахша-сазлири тамашибинларни җәлп қилған һәмдә уларниң гүлдүрас алқишлириға еришкән. Уйғур өсмүрлири арқа-арқидин 5 қетим номур көрсәткән. Нурниса ханимниң тәкитлишичә, мюнхендики усул йетәкчиси халисә ханим тәрипидин һәптә ахирисидики күнләрдә тәрбийәлиниватқан бу уйғур өсмүрлири һәр йили мюнхенда түрлүк мәдәнийәт-сән´әт паалийәтлиригә қатнишип, йәрлик аһалиләрниң мәдһийәлиригә сазавәр болуп кәлмәктикән.

7-Айниң 6-күни чүштин кейин «германийә уйғур анилар бирлики» сәһнини игилигән. Мәзкур органниң мәсули дилнар хәзиничи ханимниң баян қилишичә, улар алди билән нөвәттики уйғурлар вәзийитини аңлатқан һәмдә «германийә уйғур анилар бирлики» тоғрисида тамашибинларға чүшәнчиләр бәргән. Андин, мәзкур орган тәркибидики «уйғур анатил мәктипи» ниң оқуғучилири сәнәт номурлирини көрсәткән. Улар орундиған уйғурчә кийим-кечәкләр мода көргәзмиси тамашибинларниң қизғин алқишлириға муйәссәр болған.

Бу қетимқи сәнәт вә мәдәнийәт көрәклири паалийитини д у қ рәиси долқун әйса һәмдә башқа уйғурларму берип тамаша қилған. Мюнхендики уйғур җамаәт әрбаби аблимит турсун әпәнди бу һәқтә тохталғанда, уйғурларни йәрлик хәлққә вә башқа әлләрдин кәлгән саяһәтчиләргә йәниму илгирилигән һалда тонутуш нуқтисидин бу паалийәтниң наһайити әһмийәтлик болғанлиқини тилға алди.

Йеқинқи мәзгилләрдин буян, болупму хитайниң җаза лагерлири сиясити йолға қоюлғандин бери германийәдики ханим-қизлар паал қозғилип бир тәрәптин уйғур анатил мәктипидә яш өсмүрләрни уйғур тили, мәдәнийити, тарихи қатарлиқ билимләр билән тәрбийилисә, йәнә бир тәрәптин мюнхен шәһиридә уюштурулған түрлүк мәдәний паалийәт сорунлирида уйғурчә сәнәт номурлирини орундап йәрлик авамниң һесдашлиқи һәм қоллишини қолға кәлтүрмәктә.

Пикирләр (0)
Share
Толуқ бәт