Uyghur sen'iti we medeniyiti myunxénda alqishqa érishti

Ixtiyariy muxbirimiz ekrem
2019-07-09
Élxet
Pikir
Share
Print

6-Iyul gérmaniyening myunxén shehiridiki terkibide 80 teshkilati bolghan "Ixtiyariy mulazimet teshkilatlar birliki" sheherning awat soda rayoni bolghan meryem meydanida "Özige yardem" namida herqaysi milletlerning medeniyet-sen'itini körek qilish pa'aliyiti uyushturghan. Her 2 yilda bir qétim ötküzülidighan bu pa'aliyette myunxén shehiridiki "Uyghur ayallirining medeniyiti we mukemmellikini ilgiri sürüsh jem'iyiti" bilen "Gérmaniye Uyghur anilar birliki" nomur körsitip, yerlik awam we chet'ellerdin kelgen sayahetchilerning qizghin alqishlirigha sazawer bolghan.

"Uyghur ayallirining medeniyiti we mukemmellikini ilgiri sürüsh jem'iyiti" ning mes'uli nurnisa xanimning bildürüshiche, mezkur teshkilat her qétimqi "Özige yardem" namidiki pa'aliyetliride "Uyghurlarning tamashibinlarni jelp qilish küchi yuqiri" dep qarap, 1-bolup Uyghurlarni sehnige chiqiridiken.

Derweqe, 7-ayning 6-küni chüshtin burun tunji bolup sehnige chiqqan Uyghur ösmürlirining nepis usulliri we Uyghurche körkem kiyimliri, yéqimliq naxsha-sazliri tamashibinlarni jelp qilghan hemde ularning güldüras alqishlirigha érishken. Uyghur ösmürliri arqa-arqidin 5 qétim nomur körsetken. Nurnisa xanimning tekitlishiche, myunxéndiki usul yétekchisi xalise xanim teripidin hepte axirisidiki künlerde terbiyeliniwatqan bu Uyghur ösmürliri her yili myunxénda türlük medeniyet-sen´et pa'aliyetlirige qatniship, yerlik ahalilerning medhiyelirige sazawer bolup kelmektiken.

7-Ayning 6-küni chüshtin kéyin "Gérmaniye Uyghur anilar birliki" sehnini igiligen. Mezkur organning mes'uli dilnar xezinichi xanimning bayan qilishiche, ular aldi bilen nöwettiki Uyghurlar weziyitini anglatqan hemde "Gérmaniye Uyghur anilar birliki" toghrisida tamashibinlargha chüshenchiler bergen. Andin, mezkur organ terkibidiki "Uyghur anatil mektipi" ning oqughuchiliri sen'et nomurlirini körsetken. Ular orundighan Uyghurche kiyim-kéchekler moda körgezmisi tamashibinlarning qizghin alqishlirigha muyesser bolghan.

Bu qétimqi sen'et we medeniyet körekliri pa'aliyitini d u q re'isi dolqun eysa hemde bashqa Uyghurlarmu bérip tamasha qilghan. Myunxéndiki Uyghur jama'et erbabi ablimit tursun ependi bu heqte toxtalghanda, Uyghurlarni yerlik xelqqe we bashqa ellerdin kelgen sayahetchilerge yenimu ilgiriligen halda tonutush nuqtisidin bu pa'aliyetning nahayiti ehmiyetlik bolghanliqini tilgha aldi.

Yéqinqi mezgillerdin buyan, bolupmu xitayning jaza lagérliri siyasiti yolgha qoyulghandin béri gérmaniyediki xanim-qizlar pa'al qozghilip bir tereptin Uyghur anatil mektipide yash ösmürlerni Uyghur tili, medeniyiti, tarixi qatarliq bilimler bilen terbiyilise, yene bir tereptin myunxén shehiride uyushturulghan türlük medeniy pa'aliyet sorunlirida Uyghurche sen'et nomurlirini orundap yerlik awamning hésdashliqi hem qollishini qolgha keltürmekte.

Toluq bet