Jenwediki b d t binasi aldida we stokholmdiki xitay elchixanisi aldida namayish ötküzüldi

2-Öktebir küni jenwediki b d t binasi aldida hem stokholmdiki xitay elchixanisi aldida “Irqiy qirghinchiliq” qa we béyjing qishliq olimpik musabiqisigha qarshi namayish ötküzüldi.

Shiwétsariyening jenwe shehiridin igiligen melumatlirimizgha qarighanda, 2-öktebir küni jenwediki b d t binasi aldida “Irqiy qirghinchiliq” qa we 2022-yilliq béyjing qishliq olimpik musabiqisigha qarshi birleshme namayish ötküzülgen. Namayishni shiwétsariyediki yerlik uniwérsitét oqughuchiliri teripidin qurulghan “Uyghurlar üchün jenwe” namliq teshkilat uyushturghan.

D u q ning jenwediki wekili kerim sherif ependining bildürishiche, bu namayishni jenwening sheher bashliqi uchur yollap tebrikligen. Namayishqa qatnashqan hebibullah izchi ependi jenwedin ziyaritimizni qobul qilghanda, namayishning aldi bilen “Lagér qurbanliri” gha teziye bildürüp, sükütte turush bilen bashlan'ghanliqini, andin “Uyghurlar üchün jenwe” namliq teshkilatning rehberliri nutuq sözlep, xitayning sherqiy türkistan xelqi üstidin yürgüziwatqan “Irqiy qirghinchiliqi” ni qattiq eyibligenlikini, shiwétsariye hökümitining “Uyghur qirghinchiliqi” ni étirap qilip, Uyghurlar mesilisini xitay bilen bolghan déplomatik munasiwetlerde küntertipke élishini muraji'et qilghanliqini tilgha aldi. Shiwétsariye Uyghur jemiyitining re'isi andéli ependi bu heqte toxtalghanda, gerche u bu namayishqa biwaste qatnishalmighan bolsimu, emma namayishning menilik, tesirlik ötkenlikidin xewer tapqanliqini eskertti.

2-Öktebir küni yene shiwétsiye paytexti stokholmdiki xitay elchixanisi aldidimu namayish ötküzülgen. Xitay elchixanisi her qétimqigha oxshash elchixana ichidin yuqiri awazliq muzika qoyup bérip, namayishqa tesir körsitishke urun'ghan. Uyghur namayishchilar buninggha qarshi yuqiri awazliq yangratqularni ishlitip, sherqiy türkistanning istiqlal marshini qoyup, xitayning shawqunlirigha taqabil turghan. Shiwétsiye Uyghur ma'arip uyushmisining mes'ulliridin exmetjan ependi bu xususta toxtalghanda, bu qétimqi namayishning xitay kommunistlirining 72 yilliq asaretlik zulumlirigha qarshi turushni meqsed qilghanliqini tekitlidi.

Melum bolghinidek, 1-2-öktebir künliri dunyaning herqaysi elliridik Uyghurlar merkezliship olturaqlashqan döletlerde xitay kommunist hakimiyitining 72 yilliq qanliq tarixini eyiblep herxil kölemlerde namayishlar élip bérilghan idi.