Washin'gtondiki zor namayishning teyyarliq xizmetliri netijilik axirlashqan

Ixtiyariy muxbirimiz ekrem
2019-04-03
Élxet
Pikir
Share
Print
Washin'gtondiki erkinlik meydanida élip bérilmaqchi bolghan namayishning uqturushi.
Washin'gtondiki erkinlik meydanida élip bérilmaqchi bolghan namayishning uqturushi.
RFA/Ekrem

4-Ayning 6-küni washin'gtondiki erkinlik meydanida élip bérilmaqchi bolghan namayishning teyyarliq xizmetliri axirlashqan.

Dunya Uyghur qurultiyi rehberlirining bügün bergen melumatlirigha asaslan'ghanda, 6-aprél washin'gtonda ötküzülmekchi bolghan xelq'araliq birleshme zor namayishning teyyarliq xizmetliri bir aydin artuq dawam qilip, axirqi basquchni tamamlighan.

D u q ning biwasite rehberliki, amérika Uyghur birleshmisi, Uyghur kishilik hoquq qurulushi qatarliq teshkilatlarning uyushturushi bilen ötküzülmekchi bolghan bu birleshme namayishqa shimaliy amérika, okyaniye, asiya we yawropadin ibaret 4 qit'edin köpligen Uyghurlarning kélip qatnishishi mölcherliniwatqan bolup, bir aydin buyan ijtima'iy taratqularda buning teshwiqatliri keng orun alghan idi.

"Washin'gtondiki namayish teyyarliq guruppisi" ning ezasi, d u q ning mu'awin re'isi perhat muhemmidi ependining bayan qilishiche, bu namayish amérika tarixida Uyghurlar teripidin ötküzülgen kölimi eng chong namayishlarning biri bolup qalidiken.

"Washin'gtondiki namayish teyyarliq guruppisi" ning mes'uli, d u q ijra'iye komitétining re'isi, amérikadiki Uyghur kishilik hoquq qurulushining mudiri ömer qanat ependining bildürüshiche, bu qétimqi namayishqa Uyghurlardin sirt amérikadiki köpligen türk we bashqa musulman xelqlirimu ishtirak qilidiken.

"Washin'gtondiki namayish teyyarliq guruppisi" ning mes'uli, d u q xitay ishliri komitétining mudiri, amérika Uyghur birleshmisining re'isi ilshat hesen kökböre ependining tilgha élishiche, amérikining mu'awin prézidéntliridin dölet mejlisi ezalirighiche Uyghurlar we jaza lagérliri mesilisini izchil tilgha élip turuwatqan we xitayning jaza lagérliri siyasitini qattiq eyiplewatqan bir mezgilde bu qétimqi namayishning washin'gtonda ötküzülüshi zor ehmiyetke ige bir hadise bolup hésablinidiken.

D u q ning bash teptishi, "Washin'gtondiki namayish teyyarliq guruppisi" ning ezasi abdulhekim idris ependining eskertishiche, bu qétimqi namayishning teyyarliq xizmetliri etrapliq ishlen'gen bolup, töt qit'ediki köpligen wetenperwer Uyghurlar bu namayishni pütün küchi bilen qollap chaqiriqlar élan qilghan hemde yardemlerde bolghan.

Bügün 3-aprél küni "D u q tor téléwiziyesi" yene mexsus programma tarqitip, 6-aprél washin'gtonda ötküzülmekchi bolghan birleshme namayishning axirqi chaqiriqini élan qildi.

Melum bolushiche, bu qétimqi namayish d u q teshkilligen 2018-yili 27-aprél yawropa ittipaqi aldida ötküzülgen "5 Ming kishilik namayish" hemde 2018-yili 6-noyabir jenwediki b d t binasi aldida ötküzülgen xelq'araliq zor namayishtin kéyinki xitayning jaza lagérlirigha qarshi 3-qétimliq kölimi zor namayish bolup sanilidiken.

Toluq bet