Нәнси пелоси ханим: "уйғур мәсилиси давамлиқ бизниң диққитимиздә!"

Мухбиримиз әзиз
2021-03-02
Share
Нәнси пелоси ханим: Америка авам палатасиниң рәиси, америка һөкүмитидики 3-номурлуқ шәхс болған нәнси пелоси ханим вашингтон шәһиридики "уйғур һәрикити" тәшкилати билән уйғурлар мәсилиси һәққидә мәхсус сөһбәттә болди. 2021-Йили 1-март.
Social Media

Уйғур дияридики паҗиәләрни әйибләш чуқанлири вә хитай һөкүмитиниң буниңға қарши түрлүк тәшвиқатлири көпләп оттуриға чиқиватқанда, америка авам палатасиниң рәиси, америка һөкүмитидики 3-номурлуқ шәхс болған нәнси пелоси ханимниң вашингтон шәһридики "уйғур һәркити" тәшкилати билән уйғурлар мәсилиси һәққидә мәхсус сөһбәттә болуши, муһаҗирәттики уйғурларни мәмнун қилған ишларниң бири болди. Болупму америка һөкүмитидики әң муһим тәркибий қисимлардин болған авам палатаси йеқинқи мәзгилләрдә авазға қоюлуп, рәсмий қанунға айланған уйғурлар һәққидики қанунларниң мақуллинишида өзиниң қанчилик муһим орун икәнликини намайән қилған иди. Шу сәвәбтин 1-март күни өткүзүлгән сөһбәт йиғини уйғурлар үчүн көп тәрәплимә әһмийәткә игә бир қетимлиқ паалийәт болди.

Бу қетимқи сөһбәт йиғининиң орунлаштурулуши һәққидә сөз болғанда уйғур һәркити тәшкилатиниң алақә ишлириға мәсул җулий милсап ханим бу һәқтә чүшәнчә берип, мушу қетимлиқ муһакимә арқилиқ уйғурларниң йүрәк сөзлирини йәнә бир қетим америка һөкүмитигә йәткүзүшкә мумкин болғанлиқини хошаллиқ ичидә сөзләп өтти.

"‹уйғур һәркити' тәшкилати нәнсий пелоси ханимниң уйғур һемайигәрлики үчүн биҗанидиллиқ билән қиливатқан хизмәтлиригә тәшәккүр ейтиш йүзисидин бир қетимлиқ сөһбәт қилиш арзусида болуватқанлиқимизни билдүргән идуқ. Чүнки нәнсий ханим уйғурлар һәққидики икки қетимлиқ қанун лайиһисиниң музакирә қилинишида изчил бу ишларни әң зор дәриҗидә қоллап кәлди. Шуңа бу қетим муһаҗирәттики уйғур җамаити, болупму түркийәдики уйғурлар өзлириниң халис көңүл совғисини нәнси ханимға йоллиғач, униң бундин кейинки хизмәтләрдә, җүмлидин қишлиқ олимпк мусабиқиисни байқут қилиш хизмитидә давамлиқ һәқиқәт үчүн сөз қилишиға тиләкдашлиқ билдүрди. Биз йиғинда наһайити азадә вә кәң-кушадә сөһбәтләштуқ. Болупму байдин һөкүмитиниң уйғурлар һәққидики реаллиққа нисбәтән тәврәнмәс мәвқәдә болушиниң бәкму муһимлиқини нәнсий пелоси ханимға алаһидә чүшәндүрдуқ. Болупму хитай һөкүмити вә улар садир қиливатқан һәқләр дәпсәндичиликиниң хитай билән болған һәрқандақ сөһбәттә иккиләмчи мәсилә әмәс, әксичә мәркизий темилардин болуши лазимлиқини алаһидә тәвсийә сүпитидә сундуқ."

Бу қетимқи муһакимә йиғиниға қатнашқан уйғур паалийәтчиләрдин уйғур һәркити тәшкилатиниң рәиси рошән аббас ханим иди. У өзлириниң бу қетимқи сөһбәт пурситидин пайдилинип, нөвәттики уйғурлар дуч келиватқан әң еғир мәсилиләрни йүзтуранә һалда америка һөкүмитиниң мушундақ бир юқури дәриҗилик әмәлдариға баян қилип берәлигәнликидин бәкму мәмнун икәнликини алаһидә тәкитлиди.

Бу қетимқи муһакимә йиғинида алаһидә сөз қилған һөкүмәт хадимлириниң бири америка хәлқара диний әркинлик комитетиниң комссари нурий түркәл иди. Униң қаришичә, нәнси пелоси ханимниң өткән йиллардин буянқи уйғурларға даир көплигән мәсилиләрдә изчил һәққанийәтни һемайә қилиш, шундақла уйғурлар һәққидики қанун лайиһилириниң мақуллиниши түрлүк тосқунлуқларға дуч кәлгәндә буниңға дағдам йол ечишқа җүрәт қилиштәк шиҗаитигә алаһидә апирин оқушқа әрзийдиған болуп, мушундақ бир һалқилиқ пәйттә униң йәнә бир қетим уйғурлар һәққидики мәхсус сөһбәткә қатнишиши һәмдә ‍өз қаришини ипадиләп уйғурларни һемайә қилиши зор әһмийәткә игә икән.

Мәлум болушичә, йеңи нөвәтлик америка һөкүмитиниң вуҗутқа келишидин узун өтмәй қисмән шәхсләрниң уйғур дияридики иҗтимаий паҗиәләр вә сиясий бастуруш қилмишлирини "қирғинчилиқ" дәп аташ реаллиққа анчә мувапиқ әмәс, дегәндәк пикирлири оттуриға чиқишқа башлиған. Буниң билән йеңи нөвәтлик һөкүмәтниң илгирики һөкүмәт елан қилған "‍уйғурлар қирғинчилиққа учраватиду" дегән мәзмундики һөкүмгә қандақ муамилә қилиши көп қисим кишиләрниң диққитини тартиватқан мәсилиләрдин бири болуп қелишқа башлиди. Әнә шу хил вәзийәттә нәнси пелоси ханимниң мушундақ бир муһакимә йиғинида уйғурлар һәққидә давамлиқ әң зор дәриҗидә тиришчанлиқ көрситишни халайдиғанлиқини билдүрүши бәкму қиммәтлик һесаплинидикән. Бу һәқтә сөз болғанда йиғин иштиракчилириниң бири, дуня уйғур қурултийиниң баш тәптиши абдулһәким идрис буниң һазирқи пәйттә бәкму муһим әһмийәткә игә икәнликини билдүрди.

Комиссар нурий түркәлниң қаришичә, америка һөкүмитиниң уйғур қирғинчилиқи һәққидики қарарни елиши һәмдә уни иҗра қилиши, шуниңдәк буниңға четишлиқ мәсилиләр толиму салмақлиқ темилар болғанлиқи үчүн буниң мусаписи вә сүрити унчә тез болуп кәтмәйдикән. Шундақла буниңда бирәр түплүк өзгиришниң барлиққа келишиму ундақ асанла әмәлгә ашидиған ишлар әмәскән.

Бу қетимқи муһакимә йиғинидин кейин нәнси пелоси ханим ‍өзиниң тивиттер бетидә өзиниң мушундақ бир муһакимә йиғиниға қатнашқанлиқидин бәкму хурсән болғанлиқини билдүрди. У бу һәқтә йоллиған учурида "сода җәһәттики мәнпәәтләрни көзләп хитайдики кишилик һәқлириниң дәпсәндә болуши һәққидә сөз қилиштин баш тартсақ, дуняниң һечқандақ йеридә кишилик һоқуқ һәққидә сөз қилғудәк һечқандақ әхлақий нопузимиз қалмайду," дәп көрсәтти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт