Nyu-yorktiki alma téléfon shirkiti aldida naraziliq namayishi ötküzüldi

Muxbirimiz méhriban
2019-10-18
Élxet
Pikir
Share
Print
Tibet oqughuchilar teshkilati teshkilligen nyo-yorktiki alma téléfon shirkiti aldida ötküzülgen naraziliq namayishi. 2019-Yili 17-öktebir. Nyu-york, amérika.
Tibet oqughuchilar teshkilati teshkilligen nyo-yorktiki alma téléfon shirkiti aldida ötküzülgen naraziliq namayishi. 2019-Yili 17-öktebir. Nyu-york, amérika.
Social Media

17-Öktebir küni nyu-york manxaton kochisidiki alma téléfon shirkiti aldida, birleshme naraziliq namayishi ötküzüldi. Melum bolushiche bu namayish del 17-öktebir küni amérikaning dangliq pen-téxnika guruhi - alma shirkiti guruhining bashliqi timosi danold kok (Timothy Donald Cook ) béyjingda xitay bazar igilik bash nazaritining bashliqi shaw yaching bilen körüshken küni élip bérilghan.

Amérika awazi qatarliq metbu'atlarning 17-öktebirdiki xewerliride alma guruhining bashliqi timosi donald kokning bu qétimqi körüshüshte, alma shirkitining mezkur shirketning téléfoni we kompyutérlirini ishletküchilerning uchur bixeterlikini qoghdash mes'uliyiti barliqini bildürgenliki bildürüldi. Emma xitay terepning shinxu'a agéntliqi, we junggo xewerler torida bu qétimqi uchrishishta alma shirkitining xitaydiki bazar we xéridari mesiliside xitay hökümiti bilen soda kélishimide birlikke kelgenliki xewer qilin'ghan.

Feysbok, twittér qatarliq ijtima'iy alaqe torlirigha namayish meydanidin yollan'ghan sin uchuridin melum bolushiche, namayishchilar alma shirkitige qoyghan telepliride, alma shirkitini xitay bilen bolghan sodisida kishilik hoquq mesilisini untup qalmasliqqa chaqirghan. Ular alma shirkitini xitaydiki intérnét erkinliki mesiliside we alma shirkitining téléfoni, kompyutéri qatarliq yuqiri téxnikiliq mehsulatlirini ishletküchilerning uchur bixeterlikini saqlash, xitaygha qarshi öktichiler we téléfon agéntliqlirining shexsiy uchuri qatarliqlarda xitay hökümiti bilen hemkarlashmasliqqa chaqirghan. 

Namayishqa qatnashqan Uyghur aktipliridin nyu-york kolombiye uniwérsitétning tetqiqatchisi memet imin ependi radiyomiz ziyaritini qobul qilip, namayish ehwali we namayishta otturigha qoyulghan telepler heqqide melumat berdi.

Melum bolushiche, namayishni nyu-yorktiki tibet oqughuchilar teshkilati teshkilligen. Namayish shu yer waqti 17-öktebir chüshlük dem élish waqtigha orunlashturulghan. Naraziliq namayishigha nyu-yorktiki tibet, Uyghur, xongkongluq pa'aliyetchiler we xitay démokratliridin teshkil tapqan 20 din artuq kishi qatnashqan.

Memet imin ependi bayanida, namayishning nyu-yoktiki adem nisbeten köp bolghan poyiz békiti we shexsiy shirket bolghan alma shirkitining mehsulatlirini sétish dukini aldida élip bérilghanliqi üchün, amérikaning shexsiy térritoriyelerde naraziliq bildürüsh heqqidiki qanun belgilimiliridiki adem sani we waqit cheklimilirige ri'aye qilish asasida teshkillen'gen bolsimu, emma namayishning 1 sa'ettin artuq dawamliship, etraptiki ammining diqqitini qozghap, esli pilandikidin muweppeqiyetlik bolghanliqini bildürdi.

Xewerlerdin melum bolushiche, bundin bir hepte ilgiri yeni 2019-yil 10-ayning béshida alma shirkiti xongkongdiki xitay hökümitige qarshi namayishchilar bilen xitay hökümiti otturisidiki siyasiy weziyet qisinchiliqida qalghan. 

Melum bolushiche xongkongda dawamlishiwatqan namayish jeryanida xongkongdiki namayishchilar ayfon'gha qachilan'ghan orun belgilesh yumtalliridin paydilinip, namayishchilarni basturushqa qatnashqan saqchilar topining orni heqqide öz-ar uchur yetküzüsh heriketliride bolushi, xitay hökümitini narazi qilghan. Xitayning "Xelq géziti" de mexsus maqale élan qilinip, alma shirkiti eyiblen'gendin kéyin, alma shirkitining bazargha sélin'ghan ayfonlardiki orun belgilesh yumtalini chiqiriwetkenliki heqqide 10-ayning béshida xewerler tarqalghanidi.

Memet imin ependi bu heqte toxtilip, xongkongda dawamlishiwatqan naraziliq namayish jeryanida xongkongdiki namayishchilar özliri yasap chiqqan Quartiz yumtali we ayfondiki orun belgilesh yumtalliridin paydilinip namayishchilarni basturushqa qatnashqan saqchilar topining orni heqqide öz-ar uchur yetküzüsh heriketliride bolghan. Bu ehwal xitayni narazi qilghandin kéyin, alma shirkitining ayfondiki orun belgilesh yumtalini chiqiriwétishi heqqidiki xewerler ijtima'iy taratqularda küchlük munazire qozghighan.

Melum bolushiche, alma shirkitining xitaydiki abonéntliri ayfon ishletkende üzlüksiz halda her xil cheklimilerge uchrap kelgen. Undin bashqa chet'ellerdiki ayfon ishletküchilerningmu, uchurlirining oghrilinish ehwalliri üzlüksiz yüz bérip kéliwatqan ehwallar yéqinqi ikki yil ichide köp qétim yüz bergen.

Bu yil 9-ay mezgilide gogul shirkiti tekshürüsh doklati élan qilip, ayfonning yéqinqi 2 yildin béri izchil xitay xakkérlirining hujumigha uchrap kelgenliki, bu hujumning ayfon qollan'ghuchi melum bir ijtima'iy topni nishan qilghanliqini bildürgen. Gogul shirkiti bayanatida bu ijtima'iy topning kimni körsitidighanliqini tilgha almighan bolsimu, lékin amérika simliq xewerler tori-CNN qatarliq taratqular bu hujumning Uyghurlarni nishan qilghanliqini élan qilghan. Bu xewerning xitay hökümiti 2 milyondek Uyghur we bashqa musulmanlarni yighiwélish lagérlirigha qamap, yüz minglighan kishini qamaq jazalirigha höküm qilghan bir mezgilde ashkarilinishi xelq'arada alahide diqqet qozghighanidi.

Alma shirkitimu 2019-yil 6-séntebir bayanat élan qilip, ayfon'gha qarita bu yil 2‏-ayda élip bérilghan tor hujumining Uyghurlargha qaritilghanliqini étirap qilghan. Amérikadiki massachusits téxnologiye uniwérsitétide chiqidighan "Téxnilogiyege nezer" namliq tor zhurnilining xewiride bayan qilinishiche, alma shirkiti 6‏-séntebir élan qilghan bayanatida, gogulning xewiride bezi tepsilatlarning toghra emeslikini ilgiri sürgen bolsimu, lékin hujumning Uyghurlargha qaritilghanliqini étirap qilghan. Bayanatta, ayfon hujumining gogul éytqandek keng kölemlik hujum emes, tar da'irilik hujum ikenliki, hujumning on nechche Uyghur tor bétige emes, bir qanche Uyghur tor bétige tesir qilghanliqi, shundaqla hujumning ikki yil emes, 2 ay dawamlashqanliqini bildürgen. "Téxnilogiyege nezer" zhurnilining xewiride ilgiri sürülüshiche, gogulning bayanatchisi alma shirkitining yuqiriqi bayanatigha inkas qayturup, ayfon hujumigha alaqidar: "Mezkur bixeterlik boshluqidiki téxnikiliq nuqtilarni chiqish qilghan tekshürüsh doklatimizda ching turimiz" dégenidi.

Toluq bet