Америкада оттура мәктәпни түгәткән уйғур қизи нигарә оқуш пүттүрүш мурасимида лагердики уйғурлар һәққидә тохталди

Мухбиримиз меһрибан
2019-05-29
Елхәт
Пикир
Share
Принт
Америкида оттура мәктәпни әла нәтиҗә билән пүттүрүп, массачусит технологийә институтиға қобул қилинған уйғур қизи нигарә низамидин. 2019-Йили 25-май.
Америкида оттура мәктәпни әла нәтиҗә билән пүттүрүп, массачусит технологийә институтиға қобул қилинған уйғур қизи нигарә низамидин. 2019-Йили 25-май.
RFA/Méhriban

25-Май, шәнбә күни американиң георгийә шитати роме шәһиридики толуқ оттура мәктәпниң оқуш пүттүрүш мурасимида нигарә низамидин исимлик уйғур қизи 2019-йили оқуш пүттүргән барлиқ оқуғучиларға вакалитән оқуш пүттүрүш нутқи сөзлигән.

Нигарә шу күнки нутқида аввал өзигә охшаш оттура мәктәпни түгәткән барлиқ савақдашлириниң оттура мәктәптики җапалиқ оқуш һаятини тамамлиғанлиқини тәбриклигән. Өзи вә савақдашлириниң бундин кейинки һаят қәдәмлиригә мувәппәқийәтләр тилигән. Болупму униң нутқида дейилгән өзиниң уйғурлуқ кимлики вә инсанийәт 21-әсиргә қәдәм қойған бүгүнкидәк бир дәврдә ана юртида бир милйондин артуқ уйғурниң аталмиш «қайта тәрбийәләш мәркәзлири» дәп аталған лагерларда инсаний һоқуқиниң дәпсәндә болуватқанлиқини һәққидики баянлири фәйисбок, твитер қатарлиқ иҗтимаий таратқуларда кәң тарқилип, бирнәччә күн ичидила көрүш қетим сани әң көп болған йолланмиларниң биригә айланған.

Мәлум болушичә нигарә низамидин америкадики даңлиқ университетлардин бостун шәһиридики масачуситс технологийә институтиниң 2019-йиллиқ инженерлиқ кәспигә қобул қилинған болуп, у, бу йил күз пәслидә мәзкур мәктәптики оқушини башлайдикән.

29-Май күни нигарә низамидинму зияритимизни қобул қилип, өзиниң 25-майдики оқуш пүттүрүш мурасимида сөзлигән нутқидин кейинки тәсиратлирини баян қилди.

У баянида өзиниң 2019-йиллиқ қарардики оқуш пүттүргән савақдашлириға вакалитән нутуқ сөзләш пурситидин пайдилинип, уйғурлар вәзийитини аңлатқанлиқини, нутқидин кейин мурасимға қатнашқан савақдашлири, оқутқучилар, ата-аниларниң униңдин уйғурларниң нөвәттики вәзийити һәққидә һәр хил мәсилиләрни сориғанлиқини вә униңдин уйғурларға қандақ ярдәм бериш һәққидә соаллар сориғанлиқини билдүрди.

Шу күни қизи нигарә билән бирликтә оқуш пүттүрүш мурасимиға қатнашқан ризван ханим зияритимизни қобул қилип, қизи нигарәниң оқуш пүттүрүш мурасимида георгийә роме шәһири толуқ оттура мәктивидә бу йил оқуш пүттүргән 500 дин артуқ оқуғучиға вакалитән сөзлигән нутқиниң шу күнки мурасимға қатнашқан 3000 дин артуқ оқуғучи вә ата-аниларни тәсирләндүргәнликини вә өзлириниң қизи нигарәдин иптихарлиқ һес қилғанлиқини билдүрди.

Ризван ханим, қизи нигарә 6 йешидин башлиған 12 йиллиқ оқуш мусаписини әсләп, америкада көчмән болуп яшаватқан нурғунлиған уйғур ата-аниларға охшашла өзлириниңму нигарәниң өсүп-йетилишидә көп әҗир сиңдүргәнликини, болупму нигарәни өз ишини башқа елип чиқишта тиришиш, җапани йеңиш роһини йетилдүрүшкә, техиму муһими қизи нигарәгә кичикидин башлап уйғурлуқ кимликини сиңдүрүшкә әһмийәт бәргәнликини билдүрди.

Ризван ханимниң баянлиридин мәлум болушичә, нигарә улар японийәдә оқуватқан чеғида туғулған болуп, нигарә бир яш вақтида америкаға кәлгәнлики вә бу аилә уйғурлар интайин аз болған геогийә шитатида яшиғанлиқи үчүн, нигарәниң ана тилини өгиниш пурсити пәқәт аилә ичидики әң аддий турмуш сөзлирини өгиниш биләнла чәкләнгән. Әмма бу аилидә уйғурлар вәзийити һәққидики параңлар җиқ болғини үчүн нигарәдә кичикидин башлапла уйғурлар вәзийитигә көңүл бөлидиған адәт йетилгән.

Ризван ханимниң әслишичә нигарә мәктәптә берилгән әдәбият дәрси тапшуруқлиридиму уйғурларни тонуштуридиған мақалиләрни даим йезип турған. Толуқ оттура мәктәпкә чиққандин кейин болса, ата-аниси билән уйғур вәзийити һәққидә пикир алмаштуридиған һәтта мәктәптики муәллимлири вә савақдашлириға уйғур вәзийити һәққидә елан қилинған хәвәр-мақалиларни аңлитишни адәт қилған икән.

Зияритимиз ахирида нигарә низамидин йәнә өзиниң бу йил масачуситс технологийә институтиға қобул қилинғанлиқидин наһайити хош болғанлиқи вә пәхирләнгәнликини билдүрди.

У сөзлиридә өзиниң бүгүнкидәк нәтиҗиләргә еришишидә өз тиришчанлиқидин башқа йәнә ата-анисиниң җиқ бәдәл төлигәнликини билдүрүп, бу йилларда ата-анисидин тиришип өгинишни, җапани йеңишни, ғәмхорлуқни, муһәббәтни, болупму уйғурға болған сөйгү-муһәббәтни вә мәсулийәтни өгәнгәнликини тәкитлиди. У, бундин кейинки оқуш һаятида тиришип оқуп, өз арзу-пиланлирини әмәлгә ашуруш билән бирликтә, пурсәт болсила уйғурлар һәққидики әһвалларни давамлиқ аңлитидиғанлиқини билдүрди.

Пикирләр (0)
Share
Толуқ бәт