Nike Өзиниң уйғур мәҗбури әмгикигә четишлиқ икәнликини рәт қилди, әмма униңға четишлиқ тәминат зәнҗирини ақлиди

Мухбиримиз әркин
2020-07-21
Елхәт
Пикир
Share
Принт
Америка таможна вә чегра қоғдаш идариси тәминлигән бу вақитсиз сүрәттә көрситилишичә, таможна вакаләтчиси таможнида тосувелинған хитайдин кәлгән 14,800 җүптин артуқ никә аяғлиридин бирини тутуп турған көрүнүши.
Америка таможна вә чегра қоғдаш идариси тәминлигән бу вақитсиз сүрәттә көрситилишичә, таможна вакаләтчиси таможнида тосувелинған хитайдин кәлгән 14,800 җүптин артуқ никә аяғлиридин бирини тутуп турған көрүнүши.
AP

Nike Ширкити, хитайниң уйғурларни мәзкур ширкәтниң хитайдики мал тәминлигүчи карханилирида мәҗбури әмгәккә селишиға көз юмуп, униңға янтаяқ болуш билән әйиблинип келиватқан даңлиқ хәлқара маркиларниң бири. Нөвәттә бу хил ширкәтләрниң хитайдики уйғурларни мәҗбури әмгәккә селиватқан карханилар билән алақисини үзүш тоғрисидики күчлүк бесимиға учраватқанлиқи мәлум. Лакостә, адидастәк бәзи ширкәтләр өзлириниң бу хил хитай карханилар билән алақисини үзүп, мал заказ қилишни тохтатқанлиқини елан қилған болсиму, лекин Nike бу җәһәттики тәнқидләрни рәт қилип кәлди.

Биз шу мунасивәт билән өткән һәптә бу ширкәткә телефон қилип, уларниң хитайдики бу хил карханиларға давамлиқ мал заказ қилиши у тәкитләп кәлгән» ирқий кәмситишкә қарши туруш «принсипиға қанчилик уйғунлуқини сориғанидуқ. Мәзкур ширкәт мухбиримизға әвәткән бу һәқтики язма баянатида, өзлириниң мәҗбури әмгәккә четилғанлиқини рәт қилип, Nike ниң уйғур диярида завути йоқлуқи, уларни мал билән тәминлигүчи хитай карханилириниң мәҗбури әмгәк билән алақисини үзүп, уйғур ишчилирини юртиға қайтурғанлиқини илгири сүргән.

Биз бу ширкәткә телефон қилғанда униң йәршари алақә ишлар директори грег росситер телефонимизни қобул қилип, бу мәсилигә телефонда җаваб бәрмәйдиғанлиқи, язма җаваб беридиғанлиқини билдүргән. У мухбиримизға әвәткән язма баянатидаNike ниң һәрикитини ақлап,» биз хәлқара өлчәмләргә әмәл қилимиз. Шинҗаң уйғур аптоном районидики мәҗбури әмгәккә алақидар доклатларға наһайити көңүл бөлимиз. Nike Ниң биваситә шинҗаң уйғур аптоном районида ишләпчиқирилған мәһсулати яки мәһсулат материяли йоқ. Биз мал билән тәминлигүчи һөддигәрлиримизниң районда ишләпчиқирилған гәзмал яки пахта йипни ишләтмәйдиғанлиқини дәлиллидуқ «дегән.

Хитайдики йиллиқ омуми пахта мәһсулатиниң 86 % уйғур диярида ишләпчиқирилиду. Nike Баянатида хитайдики һөддигәрлириниң материялни қандақ һәл қиливатқанлиқини чүшәндүрмигән. Америкадики язғучи, жорналист вә обзорчи гордон чаңниң қаришичә, Nike ниң сөзлириниң чинлиқи гуманлиқ икән. У 21-июл зияритимизни қобул қилип, әгәр Nike ниң сөзи раст болса униң буни испатлиши керәкликини билдүрди.

Гордон чаң мундақ дәйду:» Nike ниң бу һәқтики баянатини мән өзүмниң бүгүнки мақаләмдә нәқил қилип алдим. Униң дегәнлири раст әмәс. ‹Вашингтон почтиси' гезити Nike ниң елан қилған баянатиниң тоғра әмәсликини хәвәр қилди. Бу йил март ейидин кейин қандақ ишларниң болғанлиқини билмидим. Бәлким улар пүтүн уйғур ишчилирини юртиға қайтурувәткән болуши мумкин. Бирақ Nike буниң чинлиқини испатлиши керәк. Чүнки, баянат елан қилип қоюши бу ишниң растлиқини көрсәтмәйду «.

Nike Баянатида, өзлириниң» хитайдики мал тәминлигүчиләр билән шинҗаңдин кәлгән уйғур вә башқа аз санлиқ милләтләрни ишлитишкә мунасивәтлик йошурун хәвпни наһайити һушярлиқ билән ениқлаш вә мөлчәрләшкә тиришиватқанлиқи «ни илгири сүргән. Униң тәкитлишичә, Nike тәйгуаң ширкитиниң 2019-йилдин буян чиңдавдики карханисиға уйғур дияридин ишчи қобул қилишни тохтатқанлиқи шундақла райондин кәлгән ишчиларни юртиға қайтурғанлиқини җәзимләштургән болуп,» тәйгуаң ширкити буниңға даир һөҗҗәтләрни Nike билән ортақлашқан «икән.

Лекин австралийә истиратәгийәлик сиясәт институтиниң бу йил 3-айда елан қилған доклатида, хитайниң чиңдав шәһиридики Nike ни мал билән тәминләйдиған тәйгуаң ширкитигә тәвә бир карханида 700 дәк уйғур ишчиниң қаттиқ назарәт астида мәҗбури әмгәккә селиниватқанлиқи илгири сүрүлгән.» Вашингтон почтиси «гезитиму бу йил 3-айда бәргән бир хәвиридә, уйғур ишчилириниң давамлиқ бу карханида әмгәккә селиниватқанлиқини билдүргәниди.

Нөвәттә америка һөкүмити уйғур мәҗбури әмгәк мәһсулатлирини чәкләш тоғрисида җиддий инкасларда болуватиду. Гордон чаңниң қаришичә, америка һөкүмитиниң уйғур мәҗбури әмгәк мәсилисидики сиясити тоғра йөнилишкә қарап кетип бармақтикән. У мундақ деди:» әлвәттә американиң сиясити мәҗбури әмгәккә қарши туриду. Әң муһим мәсилә американиң мәҗбури қуллуқ әмгикигә селинип ишләпчиқирилған мәһсулатларниң америкаға импорт қилинишини чәклишидур. Бу бизниң дөлитимиз вә биз буни қилалаймиз. Американиң бу җәһәттики сиясити тоғра йөнилишкә қарап кетиватиду. Буниңда қанчилик қилишқа тегишлик болса униң шунчилик қилидиғанлиқиға ишинимән «.

Америка ташқи ишлар министирлиқи, сода министирлиқи вә ички бихәтәрлик министирлиқи йеқинда америка карханилирини агаһландуруп, уларни хитайниң уйғурларни дәнпсәндә қилишиға шерик болуп қалмаслиққа үндигән. У 20-июл күни йәнә хитайниң» санҗи йида тоқумичилиқ гуруһи «,» хотән хавлиң чач мәсулатлар завути «ни өз ичигә алған 11 хитай шүркитини» қара тизимлик «кә киргүзгән. Буниң билән «қара тизимлик» кә киргүзүлгән хитай карханилирииң сани 37 гә йетип барғаниди.

Хитайдики тәминат зәнҗири мәҗбури әмгәккә четилиш билән әйиблиниватқан Nike ниң юқириқи баянати, америкада униң ирқий кәмситишкә қарши туруш җәһәттики актип позитсийәси муназирә қозғап, бәзиләр униң сәмимийитигә соал қоюватқан мәзгилдә елан қилинди. Бу муназиригә америкадики даңлиқ зәйтун топ кулуби» вашингтон қизил тәнликләр «ниң исмини өзгәртишни қарар қилиши сәвәб болған. Мәзкур кулубниң бу қарарға келишидә Nike ширкити түрткилик рол ойниған ширкәтләрниң бири.

FedEx Ширкити билән Nike ширкити» вашингтон қизил тәнликләр кулуби «ниң муһим иқтисадий қоллиғучиси болуп, улар әгәр бу кулуб» қизил тәнлик «дегән ирқчилиқ хаһишидики бу исимни өзгәртмисә, өзлириниң ярдимини кесидиғанлиқини елан қилған. Nike Ниң бу мәсилидики ипадиси америка җамаәт пикридә муназирә қозғиған болуп, бәзиләр хитайдики тәминат зәнҗири мәҗбури әмгәккә четишлиқ, дәп әйиплиниватқан Nike ни» икки йүзлимичилик «билән тәнқидлигән.

Америкадики «стрәам» намлиқ бир тор журнили йеқинда торда имза топлаш һәрикити қозғап, әгәр Nike пикридә һәқиқәтән сәмимий болса,» вашингтон қизил тәнликләр кулуби «ниң исмини» вашингтон уйғурлири «дәп өзгәртишни тәләп қилғаниди.

Пикирләр (0)
Share
Толуқ бәт