Зумрәт давут: аһалиләр үчүн «номур дәптири» кимликтинму муһим

Мухбиримиз гүлчеһрә
2019-10-21
Елхәт
Пикир
Share
Принт

Хитай һөкүмитиниң уйғур елидә қурған лагерлириниң қандақ болидиғанлиқини өзиниң 3 айлиқ лагер кәчмишлири арқилиқ дуняға паш қилған лагер шаһити зумрәт давут, хитайниң уни 2018-йили 3-айдин 6-айғичә лагерға қамиған мәзгилниң алди-кәйнидә ери вә 3 пәрзәнти билән үрүмчи пән-техника тәрәққият райони, меһман күтүш йолидики аһалиләр комитетида яшиған иди. Униң радийомизни тәмин әткән пакитлиқ учурлириға қариғанда, даириләр лагерларни ишқа кириштүргән мәзгилләрдә әң асаси қатлам башқуруш аппарати болған аһалиләр комитетлириға хадим қобул қилишни, һәссиләп көпәйткән. Аһалиләрни башқурушта қоллинидиған чарә-тәдбирлириму көпәйтилгән. Мәһәллиниң һәммә булуң-пушқақлириғичә көзитиш камералири қоюлған. Өйләрниң ишиклиригә һәмдә өй ичигә рәқәмлик код билән башқурулидиған диҗиталлашқан көзитиш үскүнә-әсваблар орнитилған.

Буниң билән даириләрниң уйғур аһалилирини һәр бир аилә, һәр бир кишиниң иш һәрикәтлиригичә көзитәләйдиған система бәрпа қилинған.

Булардин башқа аһалиләр комитети һәр бир адәм бешиға һәтта балиларғичә уларниң иҗтимаий ишәнчлик номур көрсәткүчини бәлгиләйдиған номур дәптири тарқитип бәргән болуп, бу дәптәргә аһалиләр комитетидики әзаларниң байрақ чиқишқа қатнишиш, сиясий өгинишкә қатнишиш, туғқандарчилиқ сиясәтлиригә маслишиш вә башқа һөкүмәтниң буйруқлирини иҗра қилиштики ипадилиригә айрим-айрим номур бәлгиләп, уларниң күндилик иш-паалийәтлирини номур арқилиқ хуласиләп маңған.

Зумрәтниң баян қилишичә, кишиләрниң балилирини мәктәпкә бериштин тартип той хәт елиш, хизмәткә орунлишиш вә башқа һәр қандақ мәмурий органларда беҗиришкә тегишлик қануний рәсмийәтләрни беҗириштә, нопус тәвәликидики аһалиләр комитетиниң тәстиқ хетини елип келиши алдинқи шәрт қилинған. Аһалиләр комитети бундақ рәсмийәтләр үчүн тәстиқ хети чиқирип беришни болса аһалиләрниң күндилик иш паалийәт номур көрсәткүчидики номурниң юқири-төвәнликигә қарап бәлгиләйдикән. Номур мәлум чәктин төвәнләр болса удул лагерларға йоллинидикән, шәрткә тошмайдиғанлар түрлүк шәрт вә йолсиз дәсмайиләрни бәҗа кәлтүрүшкә мәҗбур болидикән.

Зумрәт өзиму һәтта һәқсиз һалда 3 ай лагерға қамилип чиққандин кейин, пакистанлиқ ери билән пакистанға чиқиш кетиш үчүн паспортлирини беҗириштә әң дәсләпки қәдәмдила аһалиләр комитетиниң тосалғусиға учриған. Улар зумрәтниң бир қанчә қетим ағрип қелип, байрақ чиқиришқа қатнишалмиғанлиқи сәвәблик қоюлған төвән номурини баһанә қилип, паспорт елишқа хәт чиқирип беришни рәт қилған. Зумрәт билән ериниң аһалиләр комитетиға тәкрар-тәкрар әһвал чүшәндүрүши нәтиҗисидә ахири аһалиләр комитетиниң хитай партком секретари уларға бир яхшилиқ қилған болуп бир әқил өгәткән. Йәни, у хитай секретар зумрәт вә еригә, паспорт рәсмийити беҗириш үчүн номур дәптиридики номурларни юқири көтүрүши керәклики, буниңға интайин узун вақит кетидиғанлиқини пәш қилип ахирида буниң бир амали барлиқини көрситип: «у болсиму башқа аһалиләр комитетидики рак кесилигә гириптар болған хитай аялға иқтисадий җәһәттин ярдәм бәрсәңлар, силәрниң номуруңларниң көтүрүлүш еһтимали бар» дегән.

Лагердин әмдила қутулуп чиққан зумрәт зулумлардин тәлтөкүс қутулуп кетиш үчүн бу тосуқни бесип өтмәй болмайдиғанлиқиға көзи йетип, башқа аһалиләр комитетидики натонуш бу рак кесилигә гириптар болған хитай аялға мәҗбурий хәйр сахавәт қилған. Зумрәт униң ичкиридики юртиға қайтип давалиниши үчүн икки қетим 10 миң йүәндин әвәтип, ахири 20 миң йүән хәлқ пули бәдилигә ахири мәһәллә комитетиниң «милләтләр иттипақлиқ нәмуничиси» дегән шәрәп гуваһнамиси билән тәң паспорт өтәштә әң муһим шәрт болған тонуштуруш хетини қолиға алған икән.

Пикирләр (0)
Share
Толуқ бәт