Уйғурлар мәсилиси норвегийә ташқий ишлар министерликидә оттуриға қоюлди

Ихтиярий мухбиримиз әкрәм
2021.11.24
Уйғурлар мәсилиси норвегийә ташқий ишлар министерликидә оттуриға қоюлди Норвегийә ташқи ишлар министири вә дөләт ишлири катипи уюштурған кишилик һоқуқ мәсилиси бойичә пикир елиш сөһбәт йиғинида уйғурларниң тәләплирини вә җаза лагерлири мәсилисини оттуриға қойған. 2021-Йили 22-ноябир,
RFA/Ekrem

Норвегийә б д т хәвпсизлик кеңишиниң 2022-йиллиқ рәислик вәзиписини үстигә алған болуп, бу мунасивәт билән норвегийә ташқий ишлар министери вә дөләт ишлири катипи 22-ноябир күни 60 тин артуқ хәлқаралиқ тәшкилатлар вә йәрлик тәшкилатларниң вәкиллирини чақирип, кишилик һоқуқ мәсилиси бойичә пикир елиш сөһбәт йиғини уюштурған. Сөһбәткә уйғур вәкиллириму дахил болған.

“уйғур әдлийәси архип амбири” ниң рәиси бәхтияр өмәр әпәндиниң билдүришичә, бу йиғинға хәлқара кәчүрүм тәшкилати, “рафто” фонди қатарлиқ даңлиқ тәшкилатларниң вәкиллири билән бирликтә “норвегийә уйғур комитети”, “уйғур әдлийәси архип амбири” ниң вәкиллириму тәклипкә бинаән қатнашқан. Йиғинға һәрбир тәшкилаттин пәқәт бирдинла вәкил тәклип қилинған.

Норвегийә уйғур комитети” ниң хизмәтчи хадими муәттәр әлқутниң баян қилишичә, йиғинда кишилик һоқуқ мәсилиси, җүмлидин аяллар, балиларниң һәқлирини қоғдаш мәсилиси нуқтилиқ музакирә қилинған. Уйғур вәкилләр бу йиғинда җаза лагерлири вә уйғурларниң нөвәттики қейин вәзийити тоғрисида һазирлиған икки доклатини тәқдим қилған.

Бу йиғинда уйғур вәкиллири йәнә норвегийә һөкүмитигә уйғурлар мәсилисини б д т хәвпсизлик кеңишидә оттуриға қоюш, норвегийә һөкүмити вә парламенти “уйғур ирқий қирғинчилиқи” ни етирап қилиш, б д т дин шәрқий түркистанға мустәқил тәкшүрүш өмики әвәтиш қатарлиқ тәләп-истәклирини билдүрүп өткән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.