Nur shirkitining xojayini nurmemet abdulla: "Istiqballiq karxanichidin layaqetlik panahlan'ghuchigha aylandim"

Muxbirimiz shöhret hoshur
2019-05-09
Élxet
Pikir
Share
Print
Nur shirkitining xojayini nurmemet abdulla ependim.
Nur shirkitining xojayini nurmemet abdulla ependim.
Photo: RFA

2006 ‏-Yili yünnen milletler uniwérsitétining tashqi soda kespini püttürgen we qisqa waqit ichide iqtisadiy jehettin qed kötürgen nurmemet abdulla 2009‏-yilidiki "Ürümchi tomuz weqesi" din kéyin nopus sétiwélish arqiliq bir mehel "Gu'angdongluq" boluwélishqa mejbur bolghan. Bu salahiyetmu uning Uyghur kimlikini yoshurup qalalmighachqa u 2014‏-yili a'ilisi bilen istanbulgha köchüshke we shénjéndiki "Nur tashqi soda shirkiti" ni chet'elde turup mangdurushqa mejbur bolghan. 2016‏-Yilning axirigha kelgende uning 3 xitay bankisidiki ikki milyon yüendin artuq puli tonglitiwétilgen. Netijide 2018‏-yilning axirigha kelgende u istanbuldin yawropagha köchüp, ronaq tépiwatqan bir karxanichidin siyasiy panahlan'ghuchigha aylan'ghan.

Nurmemet abdulla yünnen milletler uniwérsitétining tashqi soda kespini püttürgendin kéyin jéjyangning yiwu shehiride bir misirliqning tashqi soda shirkitide ishligen. U bu shirkette qisqa bir mezgil tejribe toplighandin kéyin, "Islah éléktr saymanliri shirkiti" ni qurghan we tashqi soda bilen shughullan'ghan. Shirket qurghan deslepki yildila bir milyon yüendin artuq pul tapqan nurmemet abdulla sodidiki bilimi, tejribisi we talantini öz ana tupriqida jari qildurush üchün 2009‏-yili ürümchige yötkelgen. U "5 ‏-Iyul weqesi" din kéyin tutqun qilinip bir yilche qamalghan we "Siyasiy terbiye" din ötken. Qamaqtin chiqqandin kéyinki dishwarchiliq uni sodida deslepte yol tapqan yiwu shehirige qaytishqa mejburlighan. Uyghurlargha yiwudimu aramchiliq bolmighandin kéyin u shénjindin nopus sétiwélip, bir mehel "Gu'angdongluq" boluwalghan we "Nur tashqi soda shirkiti" ni qurghan. Kéyinki yillarda Uyghurlarning xitay ölkiliride meyli tijaret yaki bashqa sewebler bilen turushi omumyüzlük qiyinlashqandin kéyin u gu'angdongdimu put tirep turushqa amalsiz qalghan. Netijide yiligha chet'elge 40-50 kontéynér mal chiqiriwatqan we hira namidiki bir réstoranni shérikliship échiwatqan nurmemet abdulla 2014‏-yili a'ilisi bilen türkiyege köchüp kelgen. U istanbulda öy-mülük sodisi qilghandin bashqa yene shénjin we xongkongdiki shirkitining sodisini dawamlashturghan. 2016‏-Yiligha kelgende uning 3 xitay bankisidiki 2 milyon yüendin artuq puli tonglitilghan. Mal-mülüktin ayrilghan nurmemet abdulla 2018‏-yili yawropagha köchüp bérip siyasiy panahlan'ghuchigha aylan'ghan.

Melum bolushiche, xitay da'irilirining nurmemet abdullagha qarita ziyan zexmiti mal-dunya bilenla cheklenmigen. Uning bir akisi lagérda jan üzgen, qalghan qérindashliri a'ilisi boyiche lagérgha solan'ghan. Uning bu heqtiki bayanlirini kéyinki programmimizdin anglaysiler.

Toluq bet