Lagérda wezipe ötigen saqchi nurmemet yüsüpning özini öltürüwalghanliqi ashkarilandi

Muxbirimiz shöhret hoshur
2021-10-06
Share
Lagérda wezipe ötigen saqchi nurmemet yüsüpning özini öltürüwalghanliqi ashkarilandi Qoralliq saqchilar atalmish "Kespiy ma'arip merkizi" ning tekshürüsh ponkitini kontrol qilghan körünüsh. 2018-Yili 4-séntebir, ghulja.
REUTERS

Ürümchide lagér tutqunini qanat astigha élish gumani bilen soraq qilin'ghan saqchi nurmemet yüsüp özini öltürüwalghan.

Radi'omzigha inkas qilinishiche, ürümchi at beygisi meydani saqchixanisining xadimi nurmemet yüsüp, lagérda wezipe ijra qilish dawamida, bir tutqun'gha jiddiy bir ehwalda insaniy nuqtidin yéqinchiliq qilghan. Uning bu qilghini saqchi da'iriliri teripidin bayqilip qélip, üstidin tekshürülüsh élip bérilghan. Tekshürülüsh dawam qiliwatqan mezgilide, u özini öltürüwalghan. Buningdin ikki ayche awwal yüz bergen bu weqe muxbirimizning ürümchidiki saqchi organlirigha qarita élip barghan téléfon ziyaretliri netijiside delillendi. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Melum bolushiche, Uyghur rayonidiki lagér we türmilerde dawam qiliwatqan gheyriy insaniy ijra'atlar, tutqunlarnila emes, bir qisim wezipe ijra qiliwatqan xadimlarnimu azabqa salmaqta. Bixeterlik nuqtisidin öz kimlikini ashkarilashni xalimaydighan, weqedin xewerdar kishining radiyomizgha inkas qilishiche, ürümchi at beygisi meydani saqchixanisining xadimi nurmemet yüsüp del ene shu azabning wasitilik bir türtkiside hayatidin ayrilghan. Melum bolushiche, saqchi nurmemet yüsüpning ölümi bir mezgil jem'iyet we saqchi xadimliridinmu sir tutulghan, emma yéqinqi ikki heptidin buyan saqchi xadimlirining éghizlirida tarqilishqa bashlighan we bu heqte alaqidar saqchi organlirida yighinlar échilghan؛ emma bu yighinlarda, nurmemet yüsüpning ölümining tepsilati we yaki bu ölüm xewirini sir tutush heqqide söz boluwatqanliqi melum emes.

Radiyomizgha kelgen inkasta, nurmemet yüsüping ölüm sewebi heqqide munular qeyt qilin'ghan: nurmemet yüsüp ikki yil ilgiri ürümchi midong rayonidiki lagérda bir yil wezipe ötigen bolup, u wezipe ötesh jeryanida yatiqida qan qusuwatqan bir tutqun'gha, yardem qilip uning éghiz burunlirini sürtken we kariwitigha yatquzghan. Uning bu herikitidiki siliq-sipayiliq uning bilen birge wezipe ötewatqan xitay saqchining diqqitini tartqan we u bu ehwalni saqchi bashliqlirigha melum qilghan. Déyilishiche, nurmemet yüsüp shu künning özidila saqchi idarisining intizam tekshürüsh xadimliri teripidin söhbetke chaqirtilghan, nurmemet shu künlük söhbette öz qilmishining normal bir wezipe ijra qilish ikenlikini doklat qilghan.

Alaqidar bir saqchi xadimi nurmemet yüsüpning bir mezgil lagérda wezipe ötigen-yaki ötimigenliki heqqide melumat bermidi. Emma nurmemetning özini étiwalghanliqidin xizmetdashliri arqiliq xewer tapqanliqini, ikki heptining aldida, bu heqte saqchixanida bir yighinmu échilghanliqini ashkarilidi.

Inkas qilinishiche, nurmemet yüsüp, lagérdiki shu tutqun'gha yardem qilghanliqi seweblik aridin ikki yil ötkende, yeni bu yil 8 ‏-ayda qaytidin tekshürülgen؛ tekshürüsh bu qétim, ürümchi sheherlik dölet amanliq saqchiliri teripidin élip bérilghan. Bir dölet amanliq xadimi özining nurmemet yüsüpni soraq qilghanliqini inkar qilmidi. U nurmemet yüsüp özini étiwalghandin kéyin, nurmemet yüsüp heqqidiki déloning matériyallirini alaqidar bölümlerge tapshuriwetkenlikini tilgha aldi. Biz uningdin nurmemetning özini étiwélish sewebini sorighinimizda, bu so'algha jawab bérishni qopalliq bilen ret qildi. Biz uningdin, nurmemet yüsüpning qandaq bir guman bilen soraq qilin'ghanliqini sorighinimizda uning "Jinayetchini qanat astigha élish" gumani bilen tekshürülgenlikini delillidi.

Inkasta déyilishiche, nurmemet yüsüp ikki qétimliq soraqtin kéyin, 3 ‏-qétimliq soraqqa yeni tutup turulup tekshürülüsh basquchigha kelgende, at beygisi meydani saqchixanisidiki ishxanisida özini étiwalghan.

Nurmemet yüsüpnng jesitining a'ilisige bérilip bérilmigenliki we ölüm tepsilatining a'ilisige bildürülüp-bildürülmigenliki hazirche melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet