Obulqasim dawut, da'irilerning hamildar ayaligha qarita bala chüshürüsh buyruqini ret qilghanliqi üchün éghirlitip késilgen

Muxbirimiz shöhret hoshur
2021-02-20
Share
Obulqasim dawut, da'irilerning hamildar ayaligha qarita bala chüshürüsh buyruqini ret qilghanliqi üchün éghirlitip késilgen Da'irilerning hamildar ayaligha qarita bala chüshürüsh buyruqini ret qilghanliqi üchün éghirlitip késilgen obulqasim dawutning kimlik karti.
Photo: RFA

Qeshqerde meshrep oynap tutulghan 14 kishidin birsi bolghan, wilayetlik pochta-télégraf idarisining inzhénéri obulqasim dawut, pilanliq tughutqa xilapliq qilghanliqi üchün, bille tutulghan dostlirigha nisbeten éghirlitip késilgen. Melum bolushiche, obulqasim dawut, on yilning aldida da'irilerning ayaligha qaratqan bala chüshürüsh buyruqini ret qilip, plando'in sirt üchinchi perzentining dunyagha kélishige yol achqanliqi üchün, 17 yilliq késilgen.

Qeshqerge qaratqan téléfon ziyaretlirimiz dawamida, köpinche xadimlar, sheherdiki alaqidar ahaliler komtétining amanliq xadimi obulqasim dawutning 2017 ‏-yildin buyan qamaqta ikenlikidin xewiri barliqi, emma késilgen-késilmigenlikidin xewersizlikini éytti. Yene bir xadim, obulqasim dawut we dostlirining meshrep oynighanliqi üchün tutulghanliqini delillidi. Ehwaldin xewerdar kishilerdin birining bayan qilishiche, obulqasim dawut soraqtiki mezgilide, özining meshrep oynighandin bashqa xataliq sadir qilmighanliqini bayan qilghan bolsimu, emma soraqchilar uningdin yenimu köp mesile tapshurushini telep qilghan we soraqni alte aygha qeder axirlashturmighan. U axiri 10 yil awwal ötküzgen we jazasini ötep bolghan bir atalmish xataliqini qaytidin otturigha qoyghan. Melum bolushiche, obulqasim dawut we ayali, 3 ‏-perzenti tughulushtin burun da'iriler teripidin hamilini chüshüriwétish heqqide buyruq tapshuruwalghan. Obulqasim bala chüshürüshni ret qilghan. Bu sewebtin u eyni chaghda bérilgen iqtisadiy jazani toluq töligen. Bu qétimqi soraqta, u 10 yil awwalqi bala chüshürüsh buyruqini ret qilghanliqini özidiki diniy esebiylikning alamiti dep étirap qilishqa mejbur bolghan.

Biz obulqasim dawutning délosining pilanliq tughut bilen munasiwiti bar-yoqluqini éniqlash üchün, qeshqer sheherlik pilanliq tughut idarisigha téléfon qilduq. Bu bölüm xadimi sözlishishimizni tewsiye qilghan alaqidar bir xadimdin melumat soriduq. U, obulqasim dawutning délosining pilanliq tughut bilenmu alaqidar ikenlikini delillidi.

Ehwaldin xewerdar kishining bayan qilishiche, obulqasim dawut eslide pilandin sirt tughulghan balisi üchün 10 yili awwal jerimane tölep bolghaniken, bu qétim obulqasim mezkur qilmishini diniy esebiylikning alamiti dep dep étirap qilghini üchün, da'iriler uninggha qaytidin 90 ming yüen jerimane qoyghan. Obulqasim dawutning ayali, bu jerimanini tölesh bilen jorisining qoyup bérilishini kütüp mezkur jerimanini toluq töligen bolsimu, uni yenila türmige yollinishtin saqlap qalalmighan.

Obulqasim dawut kéyinki iqrarining netijiside, uning "Meshrep oynap jama'et tertipini buzush jinayiti" ge, "Diniy esebiylik jinayiti" mu qétilip 17 yilliq késilgen.

Ehwaldin xewerdar kishi obulqasim dawutning nöwette, qorghas nahiyesining qosh'ériq türmiside jaza mudditini ötewatqanliqini melum qildi, emma bu uchur saqchilar teripidin téxi delillenmidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet