Péshqedem Uyghur milletperweri exmet igemberdining “Hayat menzilliri” namliq kitabi neshrdin chiqti

Xitayning Uyghurlargha élip bériwatqan bésim siyasitining küchiyishi we chet'ellerdiki Uyghurlarning nopusining köpiyishige egiship, chet'ellerdiki bolupmu türkiyediki neshriyatchiliq xizmetlirimu kücheymekte.

Péshqedem wetenperwer exmet igemberdining “Hayat menzilliri” namliq kitabi 5-ayning 25-küni yoruqqa chiqti. Mezkur kitab 630 bettin terkib tapqan bolup, eserde exmet igemberdining hayat sergüzeshtliri eks ettürülgen we eserde 80 betlik renglik süretlergimu orun bérilgen. Biz kitab heqqide téximu tepsiliy melumat igilesh üchün teklimakan Uyghur neshriyati xojayini abdujélil turan ependi bilen téléfon söhbiti élip barduq.

U, kitabning üch qisimdin terkib tapqanliqini, birinchi qisim “Méning ata-anilirim”, ikkinchi qisim bolsa “Ürümchidiki sherqiy türkistan darilmu'elliminide” we üchinchi qisim “Sherqiy türkistan darilfonida” qatarliq mezmunlardin terkib tapqanliqini bayan qildi.

Biz kitab heqqide téximu etrapliq melumat igilesh üchün hazir awstraliyede yashawatqan exmet igemberdi ependi bilenmu söhbet élip barduq. Exmet igemberdi ependi kitabning bi'ografiyelik eser ikenlikini, buni yézish pikrining otturigha chiqish sewebliri we mezmuni toghrisida toxtaldi.

U kitabtiki hékayilerning anisining aghzidin anglitilghanliqini, kitabta heqiqiy tarix anglitilghan bolghachqa, uning tarixiy qimmetke ige ikenlikini we kitabni neshr qildurushqa emgek singdürgen kishilerge rehmet éytidighanliqini bayan qildi.

Exmet igemberdi ependi kitabning yashlargha ilham buliqi bolidighanliqini bayan qildi.

Qimmetlik radi'o anglighuchilar yéqindin béri istanbuldiki teklimakan Uyghur neshriyati péshqedem wetenperwer inqilabchilarning hayat sergüzeshtliri bayan qilin'ghan kitablarni neshr qilishqa alahide ehmiyet bermekte. Undaqta exmet igemberdining “Hayat menzilliri” namliq kitabining ehmiyiti néme? abdujélil turan ependi tarixtin sawaq élish üchün bu xil kitablarning zor ehmiyetke ige ikenlikini tekitlidi.

Teklimakan Uyghur neshriyati 2000-yillarning bashliridin tartip péshqedem inqilabchi exmet igemberdining kitablirini neshr qilishqa bashlighan. Teklimakan Uyghur neshriyati hazirghiche bolghan ariliqta uning “Zindandin yangrighan awaz”, “Sherqiy türkistan türk dunyasining qanliq yarisi”, “Hijran derdi” we “Sherqiy türkistan milliy musteqilliqi” dégendek eserlirini neshr qilip tarqatqan.