Пешқәдәм уйғур милләтпәрвәри әхмәт игәмбәрдиниң «һаят мәнзиллири» намлиқ китаби нәшрдин чиқти

Ихтиярий мухбиримиз әркин тарим
2019-06-03
Елхәт
Пикир
Share
Принт
Пешқәдәм милләтпәрвәр уйғур әхмәт игәмбәрдиниң «һаят мәнзиллири» намлиқ китабиниң муқависи.
Пешқәдәм милләтпәрвәр уйғур әхмәт игәмбәрдиниң «һаят мәнзиллири» намлиқ китабиниң муқависи.
RFA/Erkin Tarim

Хитайниң уйғурларға елип бериватқан бесим сияситиниң күчийиши вә чәтәлләрдики уйғурларниң нопусиниң көпийишигә әгишип, чәтәлләрдики болупму түркийәдики нәшриятчилиқ хизмәтлириму күчәймәктә.

Пешқәдәм вәтәнпәрвәр әхмәт игәмбәрдиниң «һаят мәнзиллири» намлиқ китаби 5-айниң 25-күни йоруққа чиқти. Мәзкур китаб 630 бәттин тәркиб тапқан болуп, әсәрдә әхмәт игәмбәрдиниң һаят сәргүзәштлири әкс әттүрүлгән вә әсәрдә 80 бәтлик рәңлик сүрәтләргиму орун берилгән. Биз китаб һәққидә техиму тәпсилий мәлумат игиләш үчүн тәклимакан уйғур нәшрияти хоҗайини абдуҗелил туран әпәнди билән телефон сөһбити елип бардуқ.

У, китабниң үч қисимдин тәркиб тапқанлиқини, биринчи қисим «мениң ата-анилирим», иккинчи қисим болса «үрүмчидики шәрқий түркистан дарилмуәллиминидә» вә үчинчи қисим «шәрқий түркистан дарилфонида» қатарлиқ мәзмунлардин тәркиб тапқанлиқини баян қилди.

Биз китаб һәққидә техиму әтраплиқ мәлумат игиләш үчүн һазир австралийәдә яшаватқан әхмәт игәмбәрди әпәнди биләнму сөһбәт елип бардуқ. Әхмәт игәмбәрди әпәнди китабниң биографийәлик әсәр икәнликини, буни йезиш пикриниң оттуриға чиқиш сәвәблири вә мәзмуни тоғрисида тохталди.

У китабтики һекайиләрниң анисиниң ағзидин аңлитилғанлиқини, китабта һәқиқий тарих аңлитилған болғачқа, униң тарихий қиммәткә игә икәнликини вә китабни нәшр қилдурушқа әмгәк сиңдүргән кишиләргә рәһмәт ейтидиғанлиқини баян қилди.

Әхмәт игәмбәрди әпәнди китабниң яшларға илһам булиқи болидиғанлиқини баян қилди.

Қиммәтлик радио аңлиғучилар йеқиндин бери истанбулдики тәклимакан уйғур нәшрияти пешқәдәм вәтәнпәрвәр инқилабчиларниң һаят сәргүзәштлири баян қилинған китабларни нәшр қилишқа алаһидә әһмийәт бәрмәктә. Ундақта әхмәт игәмбәрдиниң «һаят мәнзиллири» намлиқ китабиниң әһмийити немә? абдуҗелил туран әпәнди тарихтин савақ елиш үчүн бу хил китабларниң зор әһмийәткә игә икәнликини тәкитлиди.

Тәклимакан уйғур нәшрияти 2000-йилларниң башлиридин тартип пешқәдәм инқилабчи әхмәт игәмбәрдиниң китаблирини нәшр қилишқа башлиған. Тәклимакан уйғур нәшрияти һазирғичә болған арилиқта униң «зиндандин яңриған аваз», «шәрқий түркистан түрк дунясиниң қанлиқ яриси», «һиҗран дәрди» вә «шәрқий түркистан миллий мустәқиллиқи» дегәндәк әсәрлирини нәшр қилип тарқатқан.

Пикирләр (0)
Share
Толуқ бәт