Ottura asiya wekillirining yürek sadasi

Bérndin ixtiyariy muxbirimiz hebibulla izchi teyyarlidi
2024.05.10
duq-20-ottura-asiya-11 Özbékistan wekilliri dunya Uyghur qurultiyining re'isi dolqun eysa ependige lewhe teqdim qilmaqta. 2024-Yili 4-may, myunxén
Erkin asiya radiyosi, hebibulla izchi

3-Maydin bashlan'ghan d u q ning 20 yilliqigha béghishlan'ghan xatirilesh munasiwiti bilen ötküzülgen pa'aliyetke qazaqistan, qirghizistan, özbékistandin 50 yéqin wekil kelgen bolup, ular ottura asiyada yashawatqan Uyghurlargha wakaliten dunya Uyghur qurultiyi (d u q) gha köngüllirini izhar qilip, nechche tonur nan, doppa, resim, resimlik qapaq qatarliq buyumlarni alghach kelgen.

Xatirilesh pa'aliyitining 4-küni bu wekiller d u q rehberliri, xizmetchiliri we Uyghur dawasigha töhpe körsetken méhmanlargha köngül sowghilirini teqdim qildi. Shundaqla d u q ning yigirme yilliq musapisi we kütidighan ümidliri heqqidiki yürek sözlirini mezkur pa'aliyet ehli bilen ortaqlashti.

Qazaqistan we qirghizistan wekillirige dunya Uyghur qurultiyining 20 yilliq xatire buyumi teqdim qilindi.  2024-Yili 4-may, myunxén
Qazaqistan we qirghizistan wekillirige dunya Uyghur qurultiyining 20 yilliq xatire buyumi teqdim qilindi. 2024-Yili 4-may, myunxén
Erkin asiya radiyosi, hebibulla izchi

Biz bu munasiwet bilen, qazaqistandin kelgen dilnara qasimowa xanimni ziyaret qilduq, u özining d u q ning bésip ötken 20 yilliq musapisi, kütidighan ümidi we teklipliri heqqide bezi köz qarashlirini radiyo anglighuchilar bilen ortaqlashti.

Dilnara qasimowa xanim yene, qazaqistanda 63 Uyghur mektipining barliqini emma bu mekteplerni saqlap qélish we Uyghur perzentlirining ana tilini qoghdap qélish heqqidiki pikirlirinimu otturigha quyup, qazaqistan Uyghur ma'aripining duch kéliwatqan xirislirinimu eskertip ötti.

Bu pa'aliyetke qatnashqan qirghizistandiki “Ittipaq géziti” xadimliri özining bundin burunqi gézitlirining sanlirini ekélip, mexsus tesis qilin'ghan kitab yermenkisi ornigha tizghanidi. Qirghizistan Uyghurlirining péshqedem aqsaqalliridin biri, dunya Uyghur qurultiyi qurulghandin buyan izchil türde bu dewaning ichide aktip pa'aliyet qilip kéliwatqan rozimuhemmed hajim qurultayning qolgha keltürgen netijiliri heqqide özining yürek sözlirini ipadilep, “Bir insanning ömri üchün 20 yil bek uzun, emma bir milletning tarixi üchün 20 yil tolimu qisqa” dédi hemde qurultayning qurulghandin hazirghiche özgermey kelgen nishanining wetenning musteqilliqi, milletning azadliqi ikenlikini alahide tekitlidi.

Bu xatirilesh pa'aliyitige özbékistandin kelgen qanunshunas, munajidin qizi iparxan, bundaq yighinlargha qatnishishining tunji qétim ikenlikini, muhajirette bunche jiq Uyghurni bir yerde, öz millitining teqdiri üstide bash qaturushini tunji qétim körüshning hayajinini we “Tarixtin sawaq élish” heqqidiki köz qarishini ipadilep ötti.

Qazaqistan wekilliri erkin aliptékin ependi bilen xatire süretke chüshti. 2024-Yili 3-may, myunxén
Qazaqistan wekilliri erkin aliptékin ependi bilen xatire süretke chüshti. 2024-Yili 3-may, myunxén
Erkin asiya radiyosi, hebibulla izchi

Qazaqistandin kelgen robért ömerbaqéyéw ependi (Uyghur) özining d u q ning qurulushidin hazirghiche shahit bolghan tarixiy jeryanni sözlep, “Qurultay qurulghandin hazirghiche uch ewlad rehberlik dewrini bashtin kechürdi: erkin aliptékin ependim dewride dunyagha keldi, rabiye xanim dewride ayighi chiqti, dolqun eysa dewride yigitlik dewrige qedem qoydi” dédi, andin özining birdinbir arzusining wetenning azadliqi ikenlikini bildürdi.

Qazaqistandin kelgen péshqedem sen'etkar seyid alim özining yashliq dewridin bashlap sherqiy türkistan dawasining ichide ikenlikini, 1996-yili yashlar qurultiyi qurulghandin hazirghiche bésip ötken tereqqiyati, xitayning irqiy qirghinchiliqining yehudiy chong qirghinchiliqidinmu éship ketkenlikini éytip ötüp, öz arzusining kelgüsi ewladlargha hör bir wetenni qaldurush ikenlikini bildürdi.

Özbékistan we qirghizistandin kelgen méhmanlar lagér shahiti qelbinur sidiq bilen xatire süretke chüshti. 2024-Yili 3-may, myunxén
Özbékistan we qirghizistandin kelgen méhmanlar lagér shahiti qelbinur sidiq bilen xatire süretke chüshti. 2024-Yili 3-may, myunxén
Erkin asiya radiyosi, hebibulla izchi

Qazaqistandiki péshqedem inqilabchi qehriman xojamberdi d u q qurulghan waqitta tüzülgen üch basquchluq pilanning hazir ikkinchi basquchta, yeni qanun urushi basquchidin ibaret eng muhim basquchta turuwatqanliqini, bundin kéyinki élinidighan qedemler heqqide köz qarashlirini radiyo anglighuchilar bilen ortaqlashti.

Qazaqistanda yashaydighan Uyghurlarning sani 500 ming etrapida bolup, qazaqistan, qirghizistan we özbékistanda yashawatqan barliq Uyghurlar sherqiy türkistan dawasining küchlük medetchisi bolup kelmekte. Bu xatirilesh pa'aliyitige ottura asiyadin kelgen méhmanlarning bildürüshiche, Uyghur dewasining gherbte tereqqiy qilip küchlinishi ottura asiyada yashawatqan Uyghurlargha alahide ilham we ümid béridiken. Ular özlirining ümid we arzu-armanlirining tamamen wetenning azadliqi, millitimizning hörlüki üchün ikenlikini tekitlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.