Afghanistandiki taliban we elqa'ide qalduqliri hujumlirini kücheytmekte


2005.06.17

Roytérs agéntliqining 17 - iyun küni afghanistanning qendehar shehiridin xewer qilishiche, taliban qomandanliridin molla rehim, taliban qisimlirining 6 - ayning 16 – küni qendehar wilayitining mayin nishin nahiyiside yüz bergen toqunushlarda 11 hökümet eskiri, bir saqchi we nahiye bashliqini esir alghanliqini bildürdi.

Molla rehim sun'i hemra tilifoni arqiliq roytérs agéntliqigha bergen bayanatida, esir ilin'ghan hökümet eskerlirini melum bir jaygha yoshurup qoyghanliqini bildürgen. Shundaqla qendehar shehiridiki bir saqchi ofitséri, mezkur on üch kishi bilen alaqining üzülgenlikini tesdiqlidi. Mezkur rayonda amérika we afghan herbiy qisimliri téxi bir nechche kün burunla keng kölemlik bir tazilash herikiti élip barghan idi.

Yene, jüme küni qendehar wilayitige qoshna bolghan, hilmen wilayitide yol boyigha orunlashturulghan bir bombining partlishi netijiside bir esker ölgen we üch saqchi yarilan'ghan. Shundaqla 6 - ayning 13 - küni qendehar shehirining sirtida yene yol boyigha orunlashturulghan bir bomba partlap, töt amérika eskirining yarilinishini keltürüp chiqarghan. Mezkur rayonda 1- iyun küni yüz bergen özini öltürüwélish xaraktérlik hujumda az dégende 20 kishi ölgen idi.

Afghanistan mudapi'e ministiri rehim werdek peyshenbe küni kabulda bergen bayanatida, elqa'ide térrorluq teshkilatining, afghanistanda bu yil 9- ayda ötküzülidighan parlamént saylimining harpisida, qaytidin teshkillinip, afghanistandimu iraqtikige oxshash hujumlar élip bérishni pilanlawatidu, dep agahlandurdi.

U amérika birleshme agéntliqigha bergen bayanatida, özini olturuwélish xaraktérlik hujumlar élip bérish üchün nurghunlighan erep jengchilirining afghanistan'gha kirgenlikidin xewer tapqanliqini bildürdi.

Afghanistan mudapi'e minsitiri rehim werdek, rayondiki bezi döletler afghanistandiki taliban qalduqliri we elqa'ide teshkilatigha yardem bériwatidu, dédi. Xewerde éytilishiche, werdek rayondiki qaysi döletlerning afghanistandiki taliban qalduqliri we elqa'ide teshkilatigha yardem bériwatqanliqini éniq éytmighan. Emma bu döletlerning amérikining afghanistanda uzun muddet mewjut bolup turushini xalimaydighan döletler ikenlikini bildürgen.

Afghanistandiki taliban qalduqliri we elqa'ide teshkilati amérika we afghan herbiy qisimlirigha qaratqan hujumlirini kücheytken bir peytte, talibanlarning muhim qomandanlirining biri hésablan'ghan molla exter osmani, elqa'ide teshkilatining rehbiri osama bin ladin we talibanlarning rehbiri molla ömerning hayat ikenlikini jakarlidi.

Fransiye agéntliqining xewer qilishiche, molla exter pakistandiki bir shexsi téléwizorgha bergen bayanatida, elqa'ide teshkilatining rehbiri osma bin ladin we talibanlar rehbiri molla ömer hayat, her ikkisi saq- salamet turiwatidu. Molla ömer hélimu bizning bash qomandanimiz, dégen.

Molla externing éytishiche, talban qomandanliri dawamliq yighin ichip turidiken. Lékin molla ömer bu yighinlargha qatnashmaydiken. Muhim qararlar élinidighan waqitta, molla ömer bilen alaqe qurulup, uning körsetmisi boyiche ish élip bérilidiken. (Qanat)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.