Amérika mudapi'e ministiri qirghizistanni ziyaret qilmaqchi

Amérika dölet mudapi'e ministiri 6-ayning bashlirida qirghizistanda resmiy ziyarette bolmaqchi. Qirghizistan agéntliqlirining ashkarilishiche, amérika dölet mudapi'e ministiri robért géyt mezkur sepiri arqiliq amérika-qirghizistan bixeterliki we ikki terep munasiwetlirini kücheytishni meqset qilidiken.

Robert géyt mezkur sepiride bishkek manas ayrodromidiki " gensi" namliq amérika herbiy bazisini ziyaret qilip, komandir-eskerler bilen körishidiken.

Xewerlerdin qarighanda, bu robért geytning dölet mudapi'e ministiri bolghandin kéyin ottura asiya rayonigha élip barghan tunji ziyariti bolup, sabiq mudapi'e ministiri donald ramsféld bir qanche qétim qirghizistanni öz ichige alghan ottura asiya döletlirini ziyaret qilghan hemde uning dewride amérikining qirghizistan we özbékistandiki herbiy baziliri qurulghan idi.

Yéqinda qirghizistandiki amérika bazisidiki bir eskerning bir qirghiz puqrasini öltürüp qoyushi bilen bir qatar ixtilaplar kélip chiqqan hetta bir qisim qirghiz siyasiyonliri mezkur bazini taqash mesilisini muzakire qilishni teshebbus qilghan idi. Shenbe küni bishkektiki amérika elchixanisi aldida ölgüchining a'ile-tawabatliri qatnashqan kichik kölemde naraziliq namayishi bolghan iken.

Xewerlerdin qarighanda, astana xitabnamisi arqiliq amérika bazilirini taqashni telep qilghan shangxey hemkarliq teshkilatining aliy derijilik rehberliri bu yil 7-ayda bishkekte yighin échip, yene bir qatar yéngi qararlarni almaqchi iken. Közetküchiler shangxey guruhining meqsitining amérikining merkiziy asiyadiki tesirini siqip chiqirishqa qaritilghanliqini da'im tekitlimekte. (Ümidwar)