Қирғизистан өзбек мусапирларни 10 күн ичидә 3 - бир дөләткә орунлаштурушни тәләп қилди

• 
  2005-08-05

Қирғизистан даирилири, б д т тәрипидин өзбекистанға қайтурулса тән җазаси яки өлүм җазасиға һөкүм қилиниш мумкинчилики бар, дәп агаһландурған 15 нәпәр өзбек мусапир 10 күн ичидә 3 - бир дөләткә орунлаштурулмиса, өзбекистанға өткүзүп беридиғанлиқини билдүрди.

Ташкәнт һөкүмити өзбек мусапирларни өткүзүп бериш тоғрисида қирғизистанға қаттиқ бесим ишләтмәктикән. Өзбекистан һөкүмити бу мусапирлар террорчилар вә җинайәтчиләр, дәп көрсәтмәктә.

Бу йил 13 - майда йүз бәргән әнҗандики вәқәдин кейин, 500 дин артуқ өзбек мусапир қирғизистанға қечип беривалған иди. Бу мусапирларниң 400 дин көпрәки йеқинда роминийигә орунлаштурулди. Әмма қирғизистан һөкүмити әнҗан вәқәсидә түрмидин қачқан, дәп қаралған 15 мусапирни тутқун қилди.

Қирғизистан баш тәптиши әзимбәг бекнәзәров, бу кишиләрниң җинайәтчи икәнликини тәкитләп, буларға панаһлиқ беришни халайдиған дөләт чиқмиғанлиқини илгири сүрмәктә иди.

Бекнәзәров, әркин явропа радиосиға " әгәр бу кишиләрниң әнҗан вәқәсидин илгири немә ишларни қилғанлиқиға мәсул болидиған 3 - бир дөләт чиқса, биз уларни бу дөләткә өткүзүп беримиз,"диди. Бирақ у бу кишиләрниң қандақ җинайәт садир қилғанлиқини тилға алмиған.

Бекнәзәровниң тәкитлишичә, қирғизистан бу кишиләрни қобул қилишни халайдиған бир дөләтниң чиқишини күтмәктикән. (Әркин)