Қазақистан раһәт алийевниң контроллиқидики телевизийә қанили вә бир гезитни тақиди


2007-05-25
Share

Қазақистан даирилири пәйшәнбә күни президент нәзәрбайевниң күйоғули раһәт алийевниң контроллиқидики телевизийә қанили билән бир гезитни тақиди. Бүгүнки қазақистан хәвәрләр агентлиқиниң хәвәр қилишичә, даириләр раһәт алийевниң контроллиқидики к т к телевизийә қанили билән карван гезитини қазақистан қанунлириға хилаплиқ қилғанлиқ сәвәбидин 3 айлиқ муддәт билән тақиған.

Бу вәқә буниңдин бир күн бурун президент нәзәрбайев сақчиларға раһәт алийевниң қазақистан нур банкисида ишләйдиған 2 юқири дәриҗилик әмәлдарни гөрәдә тутуп турғанлиқ вәқәси үстидин тәкшүрүш елип беришкә буйруқ бәргәндин кейин йүз бәрди. Күзәткүчиләр, нәзәрбайевниң һәрикити һакимийәт қатлимидики шәхисләргә қанун даирисидин чиқип кәтмәслик һәққидә берилгән агаһландуруш, дәп мулаһизә қилишмақта.

Раһәт алийев нәзәрбайевниң чоң қизи дариғаниң йолдиши болуп, у қазақистанниң муавин ташқий ишлар министир қатарлиқ вәзипиләрни өтигән. Һазир қазақистанниң веәнадики баш әлчилик вәзиписини өтимәктә иди. Бүгүнки қазақистан хәвәр агентлиқи йәнә раһәт алийевниң дадисиниң өйи сақчилар тәрипидин ахтурулғанлиқини билдүрди.

Раһәт алийев, қазақистан нур банкисиниң сабиқ юқири дәриҗилик әмәлдари абилмаҗан гилимов вә униң ярдәмчисини гөрәдә тутуп туруш, тән җазаси бериш вә тапанча билән тәһдит селип, уларни содидин ваз кечишкә қистиған, дәп әйипләнмәктә. Лекин раһәт алийев бу әйипләшләрни рәт қилған. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт