Назарбайеф, каспий деңиз нефит турубисини хитайға туташтуруш һәққидә вәдә бәрди


2007-06-15
Share

Қазақистан президенти нурсултан назарбайеф, җүмә күни қазақистанниң каспий деңиз саһилидин уйғур аптоном райониғичә туташтурулидиған вә хитайни нефит билән тәминләшни мәқсәт қилған нефит туруба йолини ясашқа вәдә бәрди.

Қазақистан мәтбуатлириниң хәвәр қилишичә, назарбайеф җүмә күни юқири каменогорск шәһиридә мәбләғ салғучилар йиғиниға қатнишип, алатав - каспий деңиз нефит турубисиниң атасудин - каспий деңиз саһилиғичә болған арилиқтики ахирқи 700 километирлиқ қисмини пүткүзүшкә тәрәддут қиливатқанлиқини билдүргән.

Хитай билән қазақистан арисидики алатав-каспий деңиз туруба йолиниң бир қисими болған атасу - майтағ нефит туруба йолида өткән йили рәсмий нефит еқитишқа башлиған иди. Хитайниң пилани майтағ райониғичә келидиған бу туруба йолиниң ғәрбий учини каспий деңиз саһилидики нефитликләргичә туташтуруштур. Америка енергийә министирлиқиниң пәрәз қилишичә, әгәр бу туруба йоли пүтсә, омуми узунлуқи 3000 километирға йетип, хитай омуми нефит еһтияҗиниң 5 % ини қамдайдиған сәвийигә йетиши мумкин.

Қазақистан һөкүмити илгири мәзкур туруба йоли қурулушиниң 2011 - йилғичә пүтүдиғанлиқини елан қилған иди. Лекин назарбайеф җүмә күни туруба йолиниң қачан пүтүдиғанлиқини тилға алмиди. Хәвәрләргә қариғанда, нөвәттә каспий деңиз саһилидин хитай дөләтлик нефит ширкитиниң контроллуқидики қазақистан кенияк нефитликигичә тутишидиған 400 километирлиқ нефит туруба йолида рәсмий мәшғулат елип бериливатиду. Қазақистан ахирқи йилларда хитай, русийә вә америка қатарлиқ чоң дөләтләрниң тәсир күч талишидиған муһим соруни болуп қалди. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт