Мәркизий асия дөләтлири 2009 - йили явропа баһасида тәбиий газ сатиду


2008-03-16
Share

Йеқинда өзбекистан, қазақистан, түркмәнистан вә русийә енергийә саһәсигә мәнсуп әрбаблар учришип, музакириләрдин кейин, 2009 - йилидин етибарән бу дөләтләрниң русийигә явропа баһаси билән тәбиий газ сетиши һәққидә пүтүшүм һасил қилған. Тәбиий газниң баһаси мәсилиси узундин буян оттура асия җумһурийәтлирини нарази қилип кәлгән болуп, чүнки улар өзлириниң тәбиий газ мәһсулатлирини русийигә 50 доллар әтрапида сататти. Русийә улардин һәр миң куб метир газни 50 доллардин елип, явропаға 200 долларға сетип, көп пайда алған болсиму, лекин оттура асия дөләтлириниң газ баһасини өстүрүш тәлипини қобул қилмиған.

Русийә һәр йили оттура асиядин 60 милярд куб метир газ алип, райондики әң чоң херидарға айланған, әмма йеқинқи йиллардин буян түркмәнистан,қазақистан в өзбекистан хитай һәм явропа иттипақи билән сөзлишип, өз тәбиий газлирини уларға биваситә сетишниң йолини издигән. Бу дөләтләр билән хитай арисида тәбиий газ турубиси ятқузуш келишимлири имзаланған иди. Түркмәнистан, өзбекистан вә қазақистанниң мундақ бара - бара русийиниң монополидин қутулуш һәрикити ахири оттура асияниң енергийә мәнбәлирини қамал қилиштин мәһрум болуп қелишни халимиған русийини бу дөләтләрниң газ баһасини өстүрүш тәлипини ойлишишқа һәмдә йол қоюшқа мәҗбур қилған.

Русийә мәркизий асиядин сетивалған газни украинийә вә грузийә қатарлиқларға һәмдә ғәрбий явропаға експорт қилиду. Хәвәрләрдин қариғанда, өзбекистан президенти кәримоф москвани зиярәт қилғанда путиндин газниң баһасини өстүрүшни тәләп қилған икән. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт