Özbekistan hökümiti xelq'araning enjan weqesini tekshürüsh heqqidiki telipini qayta ret qildi


2005.06.02
Share on WhatsApp
Share on WhatsApp

Özbekistan hökümiti xelq'ara jem'iyetning enjan weqesi üstidin xelq'araliq tekshürüsh élip bérish telipini qayta ret qildi. Biraq, bir qisim chet'el diplomatlirining tekshürüsh xizmitini közitishige yol qoyidighanliqini bildürdi.

13 - May küni özbekistanning enjan shehiride hökümetke qarshi ammiwiy naraziliq namayishlar yüz bérip, hökümet armiyisi namayishchilargha qaritip oq chiqarghan idi. Shahitlar we bezi kishilik hoquq teshkilatliri weqede minggha yéqin ademning ölgenlikini bildürgen.

Shimaliy atlantik okyan ehdi teshkilatining bash sékritari xup sheffir seyshenbe küni enjandiki zorawanliqlarni eyipligen hemde b d t ning chaqiriqigha awaz qoshup weqe üstidin musteqil tekshürüsh élip bérishni qayta telep qilghan idi.

Shimaliy atlantik okyan ehdi teshkilati, eger özbekistan dawamliq türde weqe üstidin xelq'araliq tekshürüsh élip bérishni ret qilsa, özbekistanning yawro- atlantik hemkarliq kéngishige qatnishish salahiyitini qayta oylishidighanliqini , shundaqla mezkur teshkilatqa eza döletlerning özbekistan'gha béridighan herbiy yardimini toxtitishni muzakire qilidighanliqini bildürgen .

Amérika birleshme agéntliqining xewirige qarighanda, özbekistan tashqi ishlar ministiri ilyar gheniyéf, amérika, fransiye, xitay, rusiye qatarliq bir qisim döletlerning elchixana xadimlirining enjandiki qoralliq toqunushni nazaret qilishigha yol qoyidighanliqini körsetken.

Rusiye we xitay hökümiti gherb döletlirige qarshi halda, islam kerimofning enjandiki xelq naraziliq heriketlirini basturushini qollighan idi. Rusiye tashqi ishlar ministiri lawrup peyshenbe küni " enjandiki weqede chéchenler, talibanlar we islamiy radikal küchlerning qoli bar" dep körsetken. Buning aldida özbekistandiki yerlik xelqler, enjandiki weqening islam kerimof hökümitining yuqiri bésimliq basturush siyasiti we namratliq sewebidin yüz bergenlikini bildürgen idi. (Arzu)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.