Qirghizistandiki öktichiler qirghizistan hökümitini agahlandurdi

Qirghizistandiki öktichiler düshenbe küni hökümet da'irilirini agahlandurup, eger kiler yili qazaqistanda ötküzilidighan parlamént we prézidént saylimida saxtiliq ehwalliri körülse, ukra'iniyidikige oxshash keng kölemlik namayish ötküzidighanliqini bildürdi.

Amérika birleshme axbarat agéntliqining bildürishiche, qirghizistandiki öktichi yéngi yölünüsh teshkilatining rehbiri muratbik iman'eliyéf eger kiler yili 2 - ayda ötküzilidighan parlamént saylimida saxtiliq ehwalliri körülse, öz teshkilatining namayish ötküzüshni qollaydighanliqini bildürgen. Qirghizistan xelq herikiti teshkilatining dériktorimu muratbik imam'eliyéfning meydanini qollaydighanliqini bildürgen.

Buning aldida, qirghizistan prézidénti esqer aqayéf kiler yili jem'iyette her xil ziddiyetlerning küchiyishi mumkinlikini bildürüp, " bezi radikal küchler qoralliq waste arqiliq hoqoq igileshke urunushi mumkin " digen. U sözide radikal küchlerning kimler ikenlikini iniq tilgha almighan bolsimu, ilgiri nurghun qétim öktichi guruppilarni radikal dep eyipligen idi.

Öktichiler esqer aqayéfning bu sözini térrorchiliqqa qarshi köresh bahaniside élip barmaqchi bolghan basturishlirining harpisida, özige jama'et pikri toplashqa urun'ghanliqining ipadisi dep bildürmekte.

Qirghizistan prézidénti esqer aqayéf kiler yili ötküzilidighan parlamént we prézidént saylamlirining adil ötküzülishige kapaletlik qilidighanliqini bildürsimu, emma küzetküchiler, buninggha guman bilen qarimaqta. Chünki 1991 - yilidin boyan qirghizistanda élip bérilghan saylamlarning hichqaysisi adil we erkin yosunda élip bérilghan emes.(Arzu)