Xiyanetchilik, qirghizistanning muqimliqigha tehdid élip kelmekte

Merkizi bryusséldiki " toqunushlarning aldini élish tetqiqat merkizi" peyshenbe küni doklat élan qilip, "qirghizistan hökümiti muqimsizliqlarning ewj élishining aldini élish üchün, choqum chiriklikke qarshi turush we bashqa iqtisadiy mesililerni hel qilishqa téximu köp küch chiqirishi kérek" - dep bildürdi.

Mezkur teshkilatning agahlandurushiche, eger qirghizistanda nöwettiki weziyet toghra bir terep qilinmay, xelq dölet rehbirining ismidin bashqa héchnimining özgermigenlikini hés qilsa, u halda qalaymiqanchiliq intayin ewj élishi mumkin iken.

Doklatta yene , qirghizistanda qara guruhlarning tesir küchining barghansiri küchiyiwatqanliqi tekitlen'gen.

Doklatta éytilishiche, sabiq prézidént esqer aqayéfning aghdurulushi, xelqning chiriklik, qebiliwazliq we namratliqtin intayin narazi bolghanliqini namayen qilidiken. Shunga waqitliq prézidéntliq wezipisini ötewatqan qurmanbék baqiyéfmu choqum esqer aqayéfning xataliqlirini qaytilashtin qattiq hezer eylishi, öz yéqinliri we tuqqanlirini muhim wezipilerge qoyushtin pexes bolushi kérek iken. (Arzu)