Түркмәнистан президенти хитайни зиярәт қилмақчи


2007-06-03
Share

Түркмәнистан президенти хитайни зиярәт қилиш тәйярлиқи қилмақта. Түркмән учур тори "гундогар"ниң хәвәр қилишичә, 31-май күни түркмәнистан президенти қурбангүл бәрдимуһәммәдоф өз сарийида бу дөләткә зиярәткә кәлгән хитай дөләтлик тәрәққият комитетиниң муавин мудири чен демин башчилиқидики нефит -газ ишлириға мунасивәтлик вәкилләр өмикини қобул қилди.

Сөһбәт җәрянида икки дөләт мунасивәтлиридин башқа йәнә түркмәнистан билән хитай арисида түзүлгән илгирики тәбиий газ келишимлириниң күчкә игә болуш-болмаслиқи шуниңдәк буниңдин кейинки һәмкарлиқ мәсилилири музакирә қилинған. Буниңдин башқа йәнә химийилик мәһсулатлар, йемәк-ичмәк вә мәдәнийәт саһәлири бойичиму пикир алмаштурулған болуп, хитай вәкиллириниң башлиқи чен демин хитай һөкүмитиниң түркмән президентиниң хитайни зиярәт қилишини тәқәззалиқ билән күтүватқанлиқини билдүргән.

Хәвәрләргә қариғанда, қурбангүл бәрдимуһәммәдоф хитайни зиярәт қилишни өзиниң дипломатик күн тәртипкә қойған болсиму, лекин буниң қачан болидиғанлиқи техи ениқ әмәс.

Сабиқ президенти сәпәр мурат ниязоф вапат болуштин бир йил илгири хитайни зиярәт қилип, хитай рәиси билән тәбиий газ келишими имзалиған шуниңдәк хитай билән бирликтә террорчилиққа қарши күрәш қилидиғанлиқини җүмлидин уйғур мустәқилчилири һесаблинидиған шәрқий түркистан күчлирини хәлқара терроризимниң бир қисими дәп қарайдиғанлиқини етирап қилған иди.

Көзәткүчиләр хитай һөкүмитиниң мәзкур йеңи президент билән бурунқи әшу сиясий вә енергийә келишимлирини қайтидин қанунлаштуруш һәм күчкә игә қилиш үчүн һәрикәт қилмақта. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт