Хитай бәрдимәмәдофниң бейҗиң зияритидә түркмәнистан билән тәбий газ келишими имзалайду


2007-07-13
Share

Дав җонес хәвәрләр ториниң мәлуматида ашкарилишичә, түркмәнистан президенти бәрдимәмәдофниң пат арида башлинидиған бейҗиң зияритидә дөләт игиликидики хитай нефит ширкитиниң түркмәнистан билән түркмәнистан тәбий газ қудуқлирини ечиш келишими имзалимақчи болуватқанлиқи мәлум болди.

Келишимдин хәвәрдар әрбаблар дав җонес хәвәрләр ториға бәргән мәлуматида түркмән тәбий газ қудуқлирини ечиш тохтамнамисиниң лайиһиси пүткәнликини билдүргән, лекин келишимгә асасән ечилидиған тәбий газ қудуқлириниң көлими вә қиммитини ашкарилашни халимиған. Келишимниң ахирқи нусхиси түркмәнистан президенти қурбангүли бәрдимәмәдофниң 17 вә 18- июлларда елип берилидиған бейҗиң зияритидә имзалинидиғанлиқи пәрәз қилинмақта.

Хитай кәлгүси 30 йилда түркмәнистан вә қазақистанлардин йилиға 30 милярд куп метир тәбий газ сетивелишни пилан қилмақта. Түркмәнистан билән хитай 2006 ‏- йили априлда имзалиған бир келишим буйичә икки дөләт арисида тәбий газ турубиси ятқузушни қарар қилған вә газ баһаси үстидә музакирә елип барған иди.

Лекин русийә президенти владимир путин бу йил 5 ‏- айда түркмәнистанни зиярәт қилип, президент бәдимәмәдофтин түркмән газини русийә земини арқилиқ ескпорт қилиш вәдисигә еришкәндин кейин, көзәткүчиләр бу сода билән хитайниң түркмәнистандин тәбий газ сетивелиш пилани суға чилашқанлиқини илгири сүргән иди. Әгәр бәрдимәмәдофниң хитай зиярити тосалғусиз елип берилса, бу президент сәпәр мурат ниязоф өткән йили 12 - айда өлгәндин кейин, униң орниға чиққан түркмән президентиниң хитайни тунҗи қетим зиярәт қилиши болуп қалғуси.(Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт