Түркмәнистан 2009-йили хитайға газ сатиду


2007-07-14
Share

Түркмәнистан президенти қурбангүл бәрдимуһәммәдоф 2009-йилидин етибарән хитайға газ сатидиғанлиқини рәсмий җакарлиди.

Русийә хәвәрләр агентлиқиниң учурлириға асасланғанда, түркмән рәһбири 16-июл күни хитайға рәсмий зиярәт елип бармақчи болуп, бу сәпәр җәрянида хитай -түркмәнистан рәһбәрлири газ келишими мәсилисидә сөһбәт елип баридикән.

" Дүшәнбә күни йәни алдимиздики һәптидә бизниң хитайға қаратқан рәсмий зияритимиз башлиниду. Биз музакирә қилидиған асаслиқ мәсилиләр икки тәрәп арисидики иқтисадий һәмкарлиқ мәсилилиридур. 2009-Йилидин башлап, биз хитайға газ сатимиз, бу бизниң кәлгүси иқтисадимизни күч ейтиду" дегән президент бәрдимуһәммәдоф түркмәнистан дөләт мәслиһәт комитетиниң кеңәйтилгән йиғинида. У, мунасивәтлик қарарларниң мәрһум президент сәпәр мурат ниязоп дәвридә елинғанлиқини тәкитлигән.

Түркмәнистанни 20 йил идарә қилған сәпәр мурат ниязоп буниңдин икки йил илгири бейҗиңни зиярәт қилғанда, хитай билән түркмәнистан арисида газ турубиси ятқузуп, йилиға 30 милярт куб метир газни хитайға маңдурушқа пүтүшкән иди, йеңи президент қурбангүл бәрдимуһәммәдоф, алдинқи айларда русийини зиярәт қилди һәмдә путинму ашхабадни зиярәт қилип билән тәбий газ келишимлири имзалиди. Хитай тәрәп йеңи президентниң мәрһум түркмән баши ниязоп дәвридә түзүлгән келишимләрни бикар қиливетишидин әндишә қилған иди, лекин, бәрдимуһәммәдоф бу келишимләрниң күчкә игә икәнликини билдүрди.

Нөвәттә, түркмән гази хитай, русийә вә явропа иттипақиниң риқабәт нуқтисиға айланған болуп, түркмән рәһбәрлири газ дипломатийә оюнини әпчиллик билән ойнимақта. Хитай тәрәп түркмәнистандин газ баһасини русийигә қариғанда әрзан сетип беришни тәләп қилмақта. Учурлардин қариғанда, бу қетим бейҗиңда газ баһасиму бекитилиши мумкин икән.

Түркмән президенти бәрдимуһәммәдоф хитайда үч күн зиярәттә болмақчи.(Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт