Қирғизистанниң ош шәһиридә сақчилар намайишчиларға оқ чиқарди


2005.06.13
Share on WhatsApp
Share on WhatsApp

Сақчилар җәнубий қирғизистанниң ош шәһиридики бир меһманхана алдида намайиш қилған дуккандарларға оқ чиқирип, аз дегәндә 2 кишини яридар қилди. Бәзи мәлуматлар 4 кишиниң яриланғанлиқини илгири сүрмәктә.

Көп қисими аялларни асас қилған сани 300 әтрапидики намайишчилар, чегра наһийә қарасудики дуккандар пуқралар болуп, намайиш қирғизистан парламент әзаси баяман әркинбайевниң қарасудики сода базирини тезгинливалғанлиқиға қарши өткүзүлгән. Намайишчилар әркинбайевниң ош шәһиридики меһманханиси алдиға йиғиливалған. Америка бирләшмә агентлиқиниң хәвәр қилишичә, ош сақчи идарисидики даириләр, сақчиларниң намайишчиларға немә үчүн оқ чиқарғанлиқини билмәйдикән. Вәқәдин кейин сақчилар меһманхана әтрапини қамал қилип, тәртипни қоғдиған.

Әркинбайев, бу йил 24 - марттики ақайев һөкүмитини ағдуруш намайишида муһим рол ойниған шәхсләрниң бири иди. Әмма намайишчилар бақийев һөкүмитини пуқраларниң дәрдигә дәрман болмиди, дәп әйиблигән.

Оштики тоқунуш қирғизистан парламент әзаси җирғалбек сорабалдийевниң җүмә күни намәлум кишиләр тәрипидин бешкәктә өлтүрлүш вәқәсидин кейин йүз бәрди.

Қирғизистанда бу йил 7 - айда президент сайлими елип берилиду. Қирғизистанда президент сайлими йеқинлишиватқан бир чағда, кишиләр аммиви характерлик қалаймиқанлиқ келип чиқишидин әнсиримәктикән.(Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт