Уйғурлар мәсилидә сүкүттики пакистанниң кәшмир мусулманлири үчүн оттуриға чиқиши тәәҗҗүп пәйда қилди

Мухбиримиз җүмә
2020-08-09
Share
Imran-Khan-Xijinping.jpg Пакистан баш министири имран хан ши җинпиң билән биргә.
Social Media

Хитайниң уйғурларға қаратқан бастуруш сиясәтлиригә йиллардин бери лам-җим демигән пакистанниң һиндистан контроллуқидики кәшмир мусулманлири үчүн оттуриға чиққанлиқи тәәҗҗүп пәйда қилди.

Пакистан баш министири имран хан җүмә күни елан қилған баянатида һиндистанниң кәшмирдики "қанунсиз һәрикәтлири" ни қобул қилмайдиғанлиқини билдүргән.

Униң бу сөзлири һиндистан һөкүмити кәшмирниң алаһидә аптономийәсини бикар қилғанлиқиниң бир йиллиқиға тоғра кәлди. 

У, бу һәптә йәнә пакистан контроллуқидики кәшмирниң пайтәхти музаффарабад шәһиридә бир марш тәшкилләп намайиш қилған болуп, йүрүшкә миңлиған йәрликләр қатнашқан. 

Һалбуки, хәлқара мәтбуатларда көрситишичә, хитайниң уйғурларға қаратқан бастуруш сиясәтлиригә сүкүт қилған имран хан кәшмир мәсилигә инкас қайтуруш инавитини йоқатқан. 

Фирансийә агентлиқида мундақ йезилған: "хитайниң пакистанға чегрилинидиған шинҗаң өлкисидики уйғурларға қаритилған қаттиқ бастурушқа аит дөвә-дөвә испатлар бар туруқлуқму имран хан пакистанниң узақ йиллиқ иттипақдишиниң ички ишлириға арилишишни рәт қилип кәлди."

Хәвәрдә пакистандики "сүбһи" гезитиниң обзорчиси һума йүсүфниң язғанлиридин нәқил елинип мундақ дейилди: "уйғур мәсилисидики сүкүт пакистанниң кәшмир мәсилисигә арилишиш инавитини йәр билән йәксан қилди."

Хәвәрдә йәнә униң ейтқанлиридин нәқил елинип, имран ханниң илгири бу икки мәсилиниң түптин охшимайдиғанлиқини оттуриға қойғанлиқи, әмма бу хилдики зеһнийәтниң өзини "мусулманлар вә кишилик һоқуқниң чемпийони" дәп көрситиш истикидики пакистанға мәнпәәт елип кәлмәйдиғанлиқи билдүрүлгән. 

Бу һәқтә тохталған америка вилсон мәркизи асия тәтқиқат орниниң муавин директори майкил гугелман мундақ дегән: "пакистан техиму юқири өлчәмдә тутулуши керәк, чүнки у кәшмир мусулманлири, шундақла һиндистан мусулманлириниң қийинчилиқиға шунчә җиқ көңүл болиду вә сиясий бошлуқи бериду, әмма уйғурларға кәлгәндә һечнемә демәйду."

Хитай пакистанниң әң чоң иттипақдиши. Хитай пакистанға хитай-пакистан иқтисадий каридори тури бойичә 2012-йилидин буян җәмий 50 милярд доллардин артуқ мәбләғ салған. 

Нөвәттә һудсон институтида тәтқиқат билән шуғуллиниватқан пакистанниң америкида турушлуқ сабиқ әлчиси һүсәйин һаққаниниң ейтишичә, пакистан хитайни һиндистанға қариши әң күчлүк қоллиғучи, дәп қарайдикән. Шуңлашқа пакистан бейҗиң даирилирини биарам қилидиған һечқандақ сөз-һәрикәтләрдә болмайдикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт