Uyghurlar mesilide süküttiki pakistanning keshmir musulmanliri üchün otturigha chiqishi te'ejjüp peyda qildi

Muxbirimiz jüme
2020-08-09
Share
Imran-Khan-Xijinping.jpg Pakistan bash ministiri imran xan shi jinping bilen birge.
Social Media

Xitayning Uyghurlargha qaratqan basturush siyasetlirige yillardin béri lam-jim démigen pakistanning hindistan kontrolluqidiki keshmir musulmanliri üchün otturigha chiqqanliqi te'ejjüp peyda qildi.

Pakistan bash ministiri imran xan jüme küni élan qilghan bayanatida hindistanning keshmirdiki "Qanunsiz heriketliri" ni qobul qilmaydighanliqini bildürgen.

Uning bu sözliri hindistan hökümiti keshmirning alahide aptonomiyesini bikar qilghanliqining bir yilliqigha toghra keldi. 

U, bu hepte yene pakistan kontrolluqidiki keshmirning paytexti muzaffarabad shehiride bir marsh teshkillep namayish qilghan bolup, yürüshke minglighan yerlikler qatnashqan. 

Halbuki, xelq'ara metbu'atlarda körsitishiche, xitayning Uyghurlargha qaratqan basturush siyasetlirige süküt qilghan imran xan keshmir mesilige inkas qayturush inawitini yoqatqan. 

Firansiye agéntliqida mundaq yézilghan: "Xitayning pakistan'gha chégrilinidighan shinjang ölkisidiki Uyghurlargha qaritilghan qattiq basturushqa a'it döwe-döwe ispatlar bar turuqluqmu imran xan pakistanning uzaq yilliq ittipaqdishining ichki ishlirigha arilishishni ret qilip keldi."

Xewerde pakistandiki "Sübhi" gézitining obzorchisi huma yüsüfning yazghanliridin neqil élinip mundaq déyildi: "Uyghur mesilisidiki süküt pakistanning keshmir mesilisige arilishish inawitini yer bilen yeksan qildi."

Xewerde yene uning éytqanliridin neqil élinip, imran xanning ilgiri bu ikki mesilining tüptin oxshimaydighanliqini otturigha qoyghanliqi, emma bu xildiki zéhniyetning özini "Musulmanlar we kishilik hoquqning chémpiyoni" dep körsitish istikidiki pakistan'gha menpe'et élip kelmeydighanliqi bildürülgen. 

Bu heqte toxtalghan amérika wilson merkizi asiya tetqiqat ornining mu'awin diréktori maykil gugélman mundaq dégen: "Pakistan téximu yuqiri ölchemde tutulushi kérek, chünki u keshmir musulmanliri, shundaqla hindistan musulmanlirining qiyinchiliqigha shunche jiq köngül bolidu we siyasiy boshluqi béridu, emma Uyghurlargha kelgende héchnéme démeydu."

Xitay pakistanning eng chong ittipaqdishi. Xitay pakistan'gha xitay-pakistan iqtisadiy karidori turi boyiche 2012-yilidin buyan jem'iy 50 milyard dollardin artuq meblegh salghan. 

Nöwette hudson institutida tetqiqat bilen shughulliniwatqan pakistanning amérikida turushluq sabiq elchisi hüseyin haqqanining éytishiche, pakistan xitayni hindistan'gha qarishi eng küchlük qollighuchi, dep qaraydiken. Shunglashqa pakistan béyjing da'irilirini bi'aram qilidighan héchqandaq söz-heriketlerde bolmaydiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet