Pawlow: mekteptin heydelsemmu heqiqetni sözleymen

Muxbirimiz nur'iman
2020-04-17
Élxet
Pikir
Share
Print
Awstraliye kwénislend uniwérsitéti pelsepe bölümining 4-yilliq oqughuchisi diriw pawlow.
Awstraliye kwénislend uniwérsitéti pelsepe bölümining 4-yilliq oqughuchisi diriw pawlow.
Diriw Pawlow teminligen

Awstraliye, kwénislend uniwérsitéti pelsepe bölümining 4-yilliq oqughuchisi diriw pawlow, özining twittir hésabidin kwénislend uniwérsitétining xitay bilen bolghan iqtisadi alaqisini tenqid qilghanliqi we xongkongluqlarni qollighanliqi üchün 27-aprél mekteptin heydilish éhtimalliqi barliqini uqturghan.

Pawlowning éytishiche, xitay hökümitining birsbeyn rayonida turushluq konsuli shüjiyi pawlowni "Xitaygha qarshi bölgünchilik bilen eyiblep, ölüm tehditi salghanliqi" üchün, pawlow shü jiyi üstidin sotqa erz qilghan bu sot 24-aprél ötküzülmekchiken. U uniwérsitétning 27-aprél özining "Mekteptin heydilish" qarari heqqide yépiq yighin échishini neq sot ötküzülüshke yéqin qalghan bir waqitqa orunlashturushining tasadipiyliq emeslikini tekitlidi. 2019-Yili shü jiyigha kwénislend uniwérsitéti teripidin pexriy proféssorluq unwani bérilgen iken.

Pawlow 2019-yili 10-ayda kwénislend uniwérsitétning oqughuchilar sénati, yeni "Oqughuchilar kéngesh palatasi" ning ezasi bolup saylan'ghan bolup, uning wezipe ötesh mudditi ikki yil iken. Pawlowning uniwérsitét oqughuchiliri kéngesh palatasining ezasi bolup saylinishi kwénislend uniwérsitéti xelq'ara bölümi we kungzi institutidiki xitay oqughuchilarni rahetsiz qilghan. Pawlow saylamdin burunmu xongkong, Uyghur we tibetler üchün namayishlarni orunlashturghan bolup saylan'ghandin kéyin téximu aktip halda xitaydiki kishilik hoquq depsendichilikige qarshi namayishlarni, léksiyelerni köplep orunlashturghan. Mektepning ichidiki linon dep atalghan élan-teshwiqat témini da'im xongkong, Uyghur, tibetke a'it xewerler bilen toshquzghan. Bu seweblik bir qanche qétim xitay oqughuchiliri teripidin tayaq yégen.

Gérmaniyelik tetqiqatchi, doktor adiriyan zénz xitayning aliy mekteplerge bolghan tesiri üstide toxtilip mundaq dédi: "Xitay hökümiti yashlarni tehdit dep qaraydu. Mesilen tyen'enmén weqeside pütün yashlar qozghalghan, shuning bilen xitay yashlarni idiye jehettin kontrol qilishqa tirishqan. Emdilikte bu xil idé'ologiyesini gherbke kéngeytiwatidu. Bolupmu uniwérsitétlargha kéngeytishke tirishiwatidu, chünki tetqiqatchilarning xelq'araliq mesililerni qarar qilishta muhim rol oynaydighanliqini bilidu. Shunisi éniqki xitay özining xelq'aradiki obrazini kontrol qilish üchün gherbning idé'ologiyesige tesir körsitishke urunuwatidu".

Pawlowning éytishiche kwénislend uniwérsitétining özi üstidiki 186 betlik eyibleshnamisning ichide tilgha élin'ghan sewebler tolimu bimene bolup, ötken yili mektepning ichidiki talla baziridin bir tal qelemning pulini töliyelmey, qelemni almay chiqip ketkenlikimu uning mekteptin heydilishining seweblirining biri qatarida körsitilgen.

Kwénislend uniwérsitéti iqtisad bölümining oqughuchisi barkiliy bu heqte toxtilip mundaq dédi: "Mektipimizde chet'ellik oqughuchilarning 20 pirsenti xitay oqughuchilar. Mektepning iqtisadi ashulargha baghlinip qalghan. Pawlow yillardin biri mektepning yuqiri derijilik emeldarlirining xitaygha iqtisadiy jehettiki béqinmichiliqini eyiblep kelgenidi. Bu qétim wirus mezgilide mektep téximu köp pulgha éhtiyajliq. Oqughuchilarni pawlow bilen kari bolmasliqi mumkin dep oylighan bolushi mumkin, lékin shu'an mektepning 'pawlowni mekteptin heydesh qarari'gha qarshi 'pawlowni qoghdap qilish muraji'etnamisi'gha imza qoyghanlarning sani 15mingdin éship ketti".

Awstraliye awam palatasining ezasi, kwénslend shtatining wekili doktor andiriw charliz leming diriw pawlow mesilisi heqqide ziyaritimizni qobul qildi. U pawlowni qollaydighanliqini bildürüp mundaq dédi: "Pawlow uniwérsitét oqughuchiliri teripidin uniwérsitét sénatorluqigha saylandi. Her xil bésimlargha heqsizliqlargha qarshi turdi. Nurghun awstraliyeliklerge oxshash méningmu köngül bölidighinim uniwérsitétning oqughuchilarning söz erkinlikige hörmet qilishi. Hemme kishining pawlowni qollishi natayin, lékin söz erkinlik hoquqini qollishi kérek".

Biz doktor lemingdin pawlowning mekteptin heydilish qararining chiqirilishining shü jiyining soti bilen munasiwiti bar-yoqluqini sorighinimizda, u "Buningdin xewirim yoq" dep so'alimizgha jawab bérishni ret qildi.

"Awstraliye" gézitining xewirige qarighanda kwénislend uniwérsitéti pawlowning mektep intizamgha xilapliq qilghanliqi üchün "Mekteptin heydilish" mumkinchiliki heqqide ipade bildürgen. Emma kwénislend uniwérsitéti bu qararining pawlowning bashqa qiliwatqan pa'aliyetlirige baghlinishliq yaki emeslikini ashkarilashni ret qilghan.

Pawlow, eger özining mekteptin heydilip kétilse, a'ilisining nahayiti addiy bir a'ile ikenliki, özining nahayiti qiyin ehwalda qalidighanliqi éytip mundaq dédi: "A'ilem nahayiti addiy bir a'ile. Mekteptin heydilip kétip qalsam nurghun qerzge boghulimen, oqushumni tamamliyalmaymen. Uniwérsitét oqughuchiliri kéngesh palatasi bolghanliqim üchün, manga bérilgen ma'ashtin 10 ming dollarni, torda i'ane toplash pa'aliyitidin yighilghan i'ane bilen qoshup jem'iy 12ming 280dollarni kishilik hoquq teshkilati-xelq'ara kechürüm teshkilatining awstraliye shöbisi arqiliq, Uyghurlarning kishilik hoquqini qoghdash ishlirigha i'ane qilghan idim. Eger heydilip kétip qalsam undaq chong yardem qilalmasliqim mumkin. Emma néme bolushidin qet'iynezer mekteptin heydelsemmu, sükütte turmaymen, heqiqet üchün yene sözleymen. Eger bu dawada yéngip, mektepte qalalisam xongkong, Uyghur, tibet qatarliqlar bilen bir septe xitayning kéngeymichilikige qarita qarshiliqini téximu kücheytimen".

Toluq bet