Нәнси пелоси: «уйғур қанун лайиһәси биз хитайға йоллиған күчлүк сигнал, уйғурлар силәр ялғуз әмәс, дегинимиз!»

Мухбиримиз ирадә
2020-06-02
Елхәт
Пикир
Share
Принт
Америка авам палатасиниң рәиси нәнси пелоси ханим ахбарат елан қилиш йиғинида «2020-йиллиқ уйғур кишилик һоқуқ сиясити қанун лайиһәси» гә имза қоюватқан көрүнүш. 2020-Йили 2-июн, вашингтон.
Америка авам палатасиниң рәиси нәнси пелоси ханим ахбарат елан қилиш йиғинида «2020-йиллиқ уйғур кишилик һоқуқ сиясити қанун лайиһәси» гә имза қоюватқан көрүнүш. 2020-Йили 2-июн, вашингтон.
AP

27-Май чаршәнбә күни америка авам палатаси «2020-йиллиқ уйғур кишилик һоқуқ сиясити қанун лайиһәси» ни 1 гә қарши 413 аваз билән мақуллиғаниди. 2-Июн сәйшәнбә күни америка авам палатасиниң рәиси нәнси пелоси ханим мәзкур қанун лайиһәсини америка дөләт мәҗлис бинасидики мурасим ишханисида өткүзүлгән ахбарат елан қилиш йиғинида имзалиди.

Нәнси пелоси ханимниң уйғур кишилик һоқуқ сиясити қанун лайиһәсини имзалаш мурасими бүгүн, 2-июн америкадики фокс қатарлиқ муһим хәвәр қаналлирида нәқ мәйдандин тарқитилди.

Нәнси пелоси ханим сөзини бүгүн өзлириниң бу йәргә уйғур кишилик һоқуқ сиясити қанун лайиһәсини мақуллаш үчүн йиғилғанлиқини билдүрди вә «бу қанун лайиһәси хитай компартийәсигә уйғурлар йолуқуватқан кишилик һоқуқ дәпсәндичиликидин толуқ хәвиримиз барлиқи һәққидә берилгән күчлүк сегналдур» деди.

У шундақла мәзкур қанун лайиһәсиниң вуҗудқа чиқиши вә һәр икки палатадин мақуллинишиға күч чиқарған марко рубйо, кристофер симис, боб менандез қатарлиқларниң исмини бирму-бир атап туруп өзиниң алаһидә тәшәккүрини билдүрди. Нәнси пелоси ханим: «йиллардин буян хитайда йүз бериватқан кишилик һоқуқ дәпсәндичиликини ашкарилаш һәмуниң тәсиригә учриғанларға ‹сиз ялғуз әмәс' дегәнни билдүрүш үчүн көп тиришчанлиқлар көрситилди. Зулум қилғучиларниң әң еғир җазалаш васитиси болса зулум қилинғучиларға ‹сән билән һечкимниң кари йоқ, саңа һечким көңүл бөлмәйду', дийиштур. Биз шундақ дәймизки, мана биз көңүл бөлимиз вә биз буни хитай һөкүмитигә билдүрүп қоймақчимиз. Мушу сәвәбтин бүгүн һәр икки партийә әзалири тәрипидин зор қоллашқа еришкән бу уйғур қанун лайиһәсини президентниң қол қоюшиға әвәтиш наһайити зор шәрәптур» деди.

Нәнси пелоси ханим сөзиниң давамида бу қанун лайиһәсиниң имзалинишиниң дәл тйәнәнмен қирғинчилиқиниң 31 йиллиқ хатирисигә тоғра кәлгәнликиниму алаһидә әскәртти. У тийәнмен вәқәси болуп, аридин шунчә вақит өткән болсиму, мәйли тибәт, мәйли хоңкоң вә мәйли уйғурларға йүргүзүлүватқан зулумдин қариғанда хитайниң кишилик һоқуқ хатирисидә қилчиликму яхшилиниш болмиғанлиқини әскәртти.

Нәнси пелоси ханим сөзидә: «биз бу җәһәттә хизмәт қиливатқили шунчә йил болған болсиму, хитайниң кишилик һоқуқ хатирисдә яхшилиниш болмиди. Әмма биз тохтап қалмаймиз. Әгәр күнләрниң биридә биз сода мунасивәтлири сәвәбидин хитайдики кишилик һоқуқ дәпсәндичилики һәққидә сөзләштин тохтап қалидикәнмиз, у һалда биз дуняниң һәрқандақ йеридә кишилик һоқуқтин сөз ечиштики мәниви һоқуқимизни йоқитип қойимиз» деди.

Нәнси пелоси ханим сөзини аяғлаштурғандин кейин мәзкур қанун лайиһәсиниң рояпқа чиқишида зор рол ойниған америка авам палата әзаси, америка дөләт мәҗлиси қармиқидики хитай ишлири иҗраийә комитетиниң рәиси кристофер симисни сөзгә тәклип қилди.

Киристофир симис сөзидә нәнси пелоси ханимниң «ши җинпиң қирғинчилиқи» ға учраватқан уйғурлар мәсилисигә көңүл бөлгәнликигә рәһмәт ейтти вә сөзини мундақ давам қилди: «бу сепи өзидин қирғинчилиқ. Һазир милйондин артуқ адәм йиғивелиш лагерида, йәнә милйонлиған адәм һәр күни паракәндичиликкә учраватиду, аилиләр вәйран қилинди» дәп көрсәтти. У, сөзи давамида йәнә, лагер шаһити меһригүл турсунниң баянлирини нәқил кәлтүрүп туруп, лагердики уйғурлар учраватқан қейин-қистақларниң қанчилик дәриҗидә еғирлиқини чүшәндүрүп өтти. У аз дегәндә он милйонлуқ нопусқа игә уйғур миллитиниң һәммисиниң дәл хитай рәиси ши җинпиңниң бир қоллуқ йолйоруқи билән «тосқунлуқ қилғучи барлиқ амилларни рәһимсизлик билән янҗип ташлаш» шәклидики залимларчә зулумиға учраватқанлиқини тәкитлиди.

У сөзи давамида бу қанун лайиһәсигиму қисқичә чүшәнчә берип, бу қанун лайиһәси бойичә алдимиздики күнләрдә зулумға шерик болған хитай һөкүмәт әмәлдарлириниң тизимлинип чиқилидиғанлиқи, уларға визә чәклимиси қатарлиқ бир қатар җаза тәдбирлири қоюлидиғанлиқини билдүрди.

Баянат елан қилиштин кейин нәнси пелоси ханим уйғур кишилик һоқуқ сиясити қанун лайиһәсигә рәсмий имза қойди. Нәтиҗидә «2020-йиллиқ уйғур кишилик һоқуқ сиясити қанун лайиһәси» рәсмий һалда америка президенти доналд трампқа йолланған болди.

У бу һәқтә өзиниң тивиттер бетидә учур йоллап, «кишилик һоқуқни дәпсәндә қилишқа шерик хитай әмәлдарлирини җазалашни мәқсәт қилған ‹уйғур кишилик һоқуқ сиясити қанун лайиһәси' гә мән имза қойғандин кейин уни ақ сарайға әвәтимиз» деди.

Пикирләр (0)
Share
Толуқ бәт