Ақсудики әмәлдарлардин пәрһат наманниң "икки йүзлимичилик" гумани билән тутулғанлиқи илгири сүрүлмәктә

Мухбиримиз шөһрәт һошур
2020-06-09
Share
perhat-naman.jpg "икки йүзлимичилик" гумани билән тутулған, ақсу вилайәтлик сода-санаәтчиләр бирләшмисиниң муавин рәиси пәрһат наман.
Oqurmen Teminligen

Өткән айда уйғур аптоном районлуқ партком интизам тәкшүрүш комитети ақсу вилайәтлик сода-санаәтчиләр бирләшмисиниң муавин рәиси пәрһат наман қатарлиқ 3 нәпәр әмәлдарниң "интизамға еғир дәриҗидә хилаплиқ қилғанлиқи" үчүн улар үстидин тәкшүрүш елип бериливатқанлиқини елан қилған, әмма уларниң конкрет қайси түзүмгә хилаплиқ қилғанлиқини тилға алмиған иди. Мухбиримизниң радийомизға кәлгән бир инкасқа асасән елип барған ениқлашлири давамида пәрһат наманниң "икки йүзлимичилик" гумани билән тутулғанлиқ еһтималлиқи ашкариланди.

Хитай таратқулири 5-айниң 23‏-күни кәң-көләмдә тарқатқан бир хәвиридә уйғур районида наһийә вә наһийә дәриҗиликтин юқири 3 нәпәр әмәлдарниң "интизамға еғир дәриҗидә хилаплиқ қилғанлиқи" үчүн улар үстидин тәкшүрүш елип бериливатқанлиқини тилға алған иди. Хәвәрдә булардин бир нәпири уйғур икәнлики вә ақсу вилайәтлик сода-санаәтчиләр бирләшмисиниң муавин рәиси икәнлики қәйт қилинған. Әмма хәвәрләрдә уларниң конкрет қайси түрдики хаталиқ гумани билән тутулғанлиқи билдүрүлмигән. Бу һәқтә радийомизға кәлгән бир инкаста пәрһат наманниң 2015‏-йили күздә хизмәт мунасивити билән германийәгә барғанлиқи вә германийәдики вақтида қилған телефон алақә хатирисидә мәсилә көрүлгәнлики үчүн "икки йүзлимичилик" гумани билән тутулғанлиқи илгири сүрүлгән.

Биз ақсудики алақидар органларға телефон қилип, алди билән билән униң тутуп туруп тәкшүрүлүватқанлиқи яки аилисидә икәнликини сүрүштә қилдуқ. Ақсу вилайәтлик сода-санаәтчиләр бирләшмисиниң бир хадими бу идаридә нөвәттә бундақ бир кишиниң йоқлуқини ейтти.

Вәзийәттин хәвәрдар кишиниң баян қилишичә, пәрһат наманниң 2015‏-йили германийә сәпиридики бир телефон алақә хатириси даириләр тәрипидин "шәрқи түркистан бөлгүнчилири" билән билән көрүшүш дәп қаралған. Пәрһат наман шу чағдики тәкшүрүштә өзиниң германийәдики чеғида пәқәт түркийәдә оқуватқан пәрзәнтлири билән көрүшкәнликини чүшәндүрүп, өткәлдин өткән.

Телефонимизни қобул қилған сода-санаәтчиләр бирләшмисиниң бир хадими пәрһат наманниң германийә сәпиридин хәвири йоқлуқини ейтса, йәнә бир мәсул хадим униң германийә сәпиридин хәвири барлиқини ейтти.

Вәзийәттин хәвәрдар кишиниң инкас қилишичә, пәрһат наман 2019‏-йили кадирлар арисида елип берилған мәсилә тапшуруш долқунида германийәдики телефон алақиси сәвәблик йәнә бир қетим соал-сораққа дуч кәлгән. Бу йил 5‏-айға кәлгәндә ақсу вилайәтлик партком интизам тәкшүрүш комитети уни мәхсус тәкшүрүш обйекти қилип бекиткән вә бу тәкшүрүш һәққидә мәхсус омумий уқтуруш чиқарған.

Ақсу вилайәтлик җ. Х. Идарисиниң идариси хадими пәрһат наман делосиниң қайси басқучта икәнлики һәққидики соалимизға җаваб бериштин өзини қачурди.

Түркийәдә яшаватқан ақсулуқ муһаҗирлардин бири пәрһат наманниң икки пәрзәнтиниң түркийәниң чәт бир вилайитидә университетта оқуйдиғанлиқи, әмма уларниң уйғур җамаити билән арилишип кәтмәйдиғанлиқини баян қилди.

Вәзийәттин хәвәрдар кишиниң мәлум қилишичә, пәрһат наман 1990‏-йили шинҗаң йеза-игилик университетини пүттүргән. У ақсу вилайәтлик сода-санаәт бирләшмисигә муавин рәис болуштин илгири ақсуниң айкүл вә тоқай йезисида йеза башлиқи, ақсу шәһәрлик парткомда даимий һәйәт, тоқсу наһийәсигә муавин секретар вә сиясий кеңәшниң мудири, ақсу вилайәтлик йеза-игилик машинилири идариси вә қизилбайрақ деһқанчилиқ мәйданида партком секретари болуп вәзипә өтигән икән. Инкаста дейилишичә, у 2015‏-йили қизилбаярқ деһқанчилиқ мәйданида секретар болған мәзгилидә йеза-игилик назаиртиниң назири әкбәр ғопур қатарлиқ кишиләр билән бирликтә германийәдә зиярәттә болған. "җәнуби хитай әтигәнлик почтиси" гезити пенсийәгә чиққан назир әкбәр ғопурниң 2019‏-йили тутулғанлиқи вә бу йил 4‏-айда қолға елинғанлиқини хәвәр қилған иди.

Телефонимизни қобул қилған ақсудики бир алақидар хадим пәрһат наманниң бирла сәвәбтин әмәс, бәлки аталмиш "җинайәтчиләргә һесдашлиқ қилиш", "дөләт маарипини көзгә илмаслиқ" қатарлиқ 5-6 хил хаталиқ билән тутулғанлиқи, буларниң ичидә әң җиддийәкиниң униң германийә сәпиридики телефон алақиси икәнликини тилға алди. У пәрһат наманниң партийә яритип бәргән пурсәттин пайдилинип, аталмиш "яман нийәтлик кишиләр билән алақә орнатқанлиқи" ни илгири сүрди.

Бу хадим сөзлиридә пәрһат наманниң партийәгә хиянәт қилғанлиқини ишарәт қилған болсиму, әмма "икки йүзлимичи" дегән әйиблимини тилға алмиди.

Хитай даирилириниң бир түркүм уйғур әмәлдалирини "икки йүзлимичилик" билән әйибләп җазалиши бир қисим хәлқара җамаәт тәрипидин һәм тәнқидкә һәм мәсхиригә учриған иди. Хитай даирилири өткән һәптә илгири "икки йүзлимичилик" билән әйипләнгәнлики хәвәр қилинған сабиқ орманчилиқ назаритиниң назири мәмәт абдулланиң "икки йүзлимичилкик" билән әмәс, бәлки парихорлуқ билән әйибләнгәнлики һәққидә мәхсус хәвәр бәргән иди. Әслидә икки йил аввалқи ениқлашлиримиз давамида мәзкур назарәтттики бир хадим мәмәт абдулланиң "икки йүзлимичилик" билән әйибләнгәнликини ашкарилиған иди.

Пәрһат наман һәққидә игилигән учурлиримиздин униң аталмиш "җинайити" ниң бекитилип болғанлиқи мәлум, әмма тәкшүрүштин кейин ашкарилашқа тоғра кәлсә бу аталмиш "җинайәт" кә қандақ нам берилидиғанлиқи һазирчә мәлум әмәс.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт