Pompéyo: xitayning külkilik teshwiqati héchkimni aldiyalmaydu

Muxbirimiz jüme
2020-06-07
Élxet
Pikir
Share
Print
Amérika tashqi ishlar ministiri mayk pompéyo "2019-Yilliq kishilik hoquq doklati" ning élan qilinish munasiwiti bilen söz qildi. 2020-Yili 11-mart, washin'gton.
Amérika tashqi ishlar ministiri mayk pompéyo "2019-Yilliq kishilik hoquq doklati" ning élan qilinish munasiwiti bilen söz qildi. 2020-Yili 11-mart, washin'gton.
Photo: RFA

Xitayning jorj floydning ölümini suyi'istémal qilip amérikagha qarishi bashlighan tetür teshwiqati dawam qiliwatqan peytlerde, amérika tashqi ishlar ministiri xitayning teshwiqatlirini "Külkilik", dep atidi we uning "Héchkimni aldiyalmaydighanliqi" ni éytti.

Amérika tashqi ishlar ministiri mayk pompéyo shenbe küni élan qilghan bayanatida mundaq dédi: "Xitay kommunist partiyesining jor floydning tragédiyelik ölümini qara niyetlik bilen suyi'istémal qilish arqiliq özining négizlik insaniy qedr qimmetni mustebitlerche ret qilish qilmishini aqlashqa urunushi, uning heqiqiy mahiyitini yene bir qétim ashkarilidi. Partiyening hoquq hewisi üchün xizmet qilidighanla bolsa, mustebit hakimiyetler üchün her qandaq yalghanchiliq chékidin ashqan peskesh hésablanmaydu. Bu tarixtin buyan shundaq bolup keldi. Bu külkilik teshwiqat héchkimni aldiyalmaydu."

25-May minnésota shtatining minné'apolis shehiride 20 dollar saxta pulini ishletkenliki seweblik qolgha élin'ghan jorj folyd saqchi tutquni jeryanida hayatidin ayrilghan. Bu hadise, amérikada saqchi zorawanliqi we irqiy ayrimichiliqqa qarishi keng kölemlik namayishlar partlishigha seweb bolghan.

Namayishning zor köp qismi tinchliq shekilde dawam qilghan bolsimu, bezi namayishlarda dukan-saraylarni bulash, shexsiy mülüklerni urup chéqishqa oxshash jinayi qilmishlarning sadir bolghanliqi xewer qilin'ghan idi.

Amérikada partlighan naraziliq namayishlirini xitay amérikagha qarishi tetür teshwiqat hujumi süpitide paydilan'ghan. Xitay diplomatliridin xitay axbaratlirighiche hemme yerde amérikagha qarishi teshwiqat kücheygen.

Xitay teshwiqatlirida amérikani "Azsanliqlar hoquqi hörmet qilinmaydighan", "Irqiy kemsitish saqaymas késelge aylan'ghan" dölet, dep körsitishke tirishqan.

Pompéyo xitay bilen amérikaning namayishchilargha tutidighan mu'amilisidiki négizlik perqlerni sherhlep mundaq dédi: "Xongkongdin tyen'enmén meydanighiche, xitayda tinch yosundiki namayishchilar heqiqet üchün otturigha chiqqanliqi üchünla qoralliq xelq eskerlirining tayaq-toqmaqlirigha bésilidu. Bu sherepsizlikler heqqide qelem tewretken muxbirlar türmilerge uzun yillap tashlinidu. Amérikada bolsa, fédératsiye we yerlik saqchilar yoldin chiqqan ofitsérlarni qanuniy jawabkarliqqa tartidu, bulangchiliq we zorawanliqlargha taqabil turush bilen birlikte tinch yosundiki namayishlarni qarshi alidu. Erkin axbaratimiz bu weqelerni toluqi bilen xewer qilip pütün dunyagha sunidu."

Amérika tashqi ishlar ministiri pompéyo shenbe küni élan qilghan yazma bayanatida xitayning yéqinqi heriketliri arqiliq "Heqiqetni mensitmeslik, qanunni mesxire qilish" qilmishlirini dawamlashturuwatqanliqini bildürdi.

U yene mundaq dédi: "X k p ning jorj floydning ölümidin kéyin amérikada otturigha chiqqan heriketlerni, özining négizlik kishilik hoquq we erkinliklerni ret qilish qilmishliri bilen birleshtürüwélishi ularni esli mahiyiti boyiche saxtikar dep tonushimizgha yétip ashidu."

Bezi xewerlerde, xitay axbaratlirining amérikadiki namayishlarning peqet qalaymiqanchiliq tüsini alghan tereplirinila küchep teshwiq qilghanliqi, namayishning tinchliq sheklidiki asasliq qisimgha öz axbaratliridin peqet orun bermigenliki körsitilgen idi.

Toluq bet