Lagérda ölgen qaharjanning achisi: xitaygha qarita éhtiyatchanliqimiz kargha kelmidi, yürek parimizdin ayrilduq

Muxbirimiz shöhret hoshur
2019-07-10
Élxet
Pikir
Share
Print
Qaharjan qawulning achisi güljamal xanim(otturida aq köngleklik) anisi tajigül xanim(güljamalning ong teripide) türkiyediki tughqanliri bilen bille.
Qaharjan qawulning achisi güljamal xanim(otturida aq köngleklik) anisi tajigül xanim(güljamalning ong teripide) türkiyediki tughqanliri bilen bille.
RFA/Shöhret Hoshur

Melum bolushiche, ötken yili aqsuda lagérda jan üzgen qaharjan qawulning türkiyediki anisi we achisi, aqsudiki uruq-tughqanlirining bixeterlikini közde tutup, 20 yildin buyan türkiyediki Uyghur jama'iti we teshkilatliridin uzaq turup kelgen. Mana bu éhtiyatchanliqning héchqandaq kargha kelmigenliki, eksiche bu a'ilining bu derijide éghir ziyankeshlikke uchrishigha seweb bolup qalghanliqini ilgiri sürgen ana-bala buningdin kéyinki hayatida, zulum we heqsizliqqa hergiz süküt qilmaydighanliqini bayan qildi.

Melum bolushiche, türkiyede 4 réstoranning sahibi bolghan we yoldishi tashqi soda bilen shughullinidighan güljamal xanim bu chaghqa qeder xitaygha qarshi heriketlerdin uzaq tursa wetendiki a'ile-tawabi'atlirining awarichilikke uchrimaydighanliqigha ishinip kelgen. Shunga ular, ötken 20 yilda türkiyediki Uyghur teshkilatlirigha yéqin yolimighan؛ Uyghurlar olturaqlashqan mehellilerdin yiraq jaylardin makan tutqan. Ish-tijarettin bashqa, Uyghurlargha alaqidar héchqandaq bir ijtima'iy we siyasiy pa'aliyetlerge qatnashmighan. Shundaq turuqluq güljamalning qérindishi qaharjan qawul lagérda jan üzgen. Uning ayali, ikki balisi we bashqa biwasite tughqanliridin 10 gha yéqin kishining iz-dériki bolmighan.

Bu aqiwetke asasen özining bügün'ge qeder Uyghurlarning ehwalini dunyagha anglitishtin ibaret yolluq we zörüriy heriketlerge qatnashmighanliqining xata bolghanliqini tonughan güljamal xanim xitayning peylini toluq chüshenmey qalghanliqini ökünüsh bilen tilgha aldi we öz wijdani burchi hem qalghan tughqanlirining bixeterliki üchün buningdin kéyinki hayatida jim turmaydighanliqi, chet'eldiki barliq Uyghur pa'aliyetchi we teshkilatlar bilen yéqin hemkarliq ichide ötidighanliqini bayan qildi.

Melum bolushiche ötken hepte güljamal we anisi türkiyediki alaqidar hökümet organlirigha bérip, qaharjan qawulning türkiye elchixanisi özlirige xewer qilghinidek késel sewebi bilen öyide jan üzgen emes, belki lagérda jan üzgenliki heqqide melumat bergen we qaharjan qawulning ölüm sewebi hem bashqa uruq-tughqanlirining iz-dériki heqqide melumat élip bérishni telep qilghan. Alaqidar xadimlar bu ehwalni tashqi ishlar ministirliqi arqiliq qaytidin sürüshte qilidighanliqini bildürgen.

Qaharjan qawulning anisi we achisi qaharjanning ölümi heqqidiki uchurni eng deslep türkiye elchixanisining özlirige yetküzgenlikini bayan qilghanidi. Ötken hepte téléfonimizni qobul qilgha xitaydiki türkiye elchixana xadimi qaharjan qawul heqqide özlirining ilgiri éniqlash élip barghanliqi we érishken uchurini eynen mezkur a'ilige yetküzgenlikini bayan qildi. Bu xadim bizning qaharjanning ölüm uchurini nedin alghanliqimizni soridi. Biz uninggha mezkur a'ilidin we aqsudiki alaqidar xadimlardin igiligenlikimizni bayan qilduq. Biz uningdin xitay terep özlirige yetküzgen uchurning toghra-xataliqigha qandaq qaraydighanliqini sorighinimizda, u bu heqte bir nerse déyelmeydighanliqini éytti.

Toluq bet