Ablajan awut ayupning ürümchidiki saqchilar teripidin tutulghanliqi ilgiri sürülmekte

Muxbirimiz shöhret hoshur
2018.05.16
ablajan-awut-ayup-305.jpg Uyghur rayonidiki moda éqim naxsha cholpini ablajan awut ayup.
Social Media

Tünügün moda éqim naxsha cholpini ablajan awut ayupning tutqun qilin'ghanliqi heqqidiki xewirimiz élan qilin'ghandin kéyin, ablajanning ehwalini yéqindin bilidighan dostliridin biri radiyomizgha uchur yollap özi bilidighan bezi ehwallarni ashkarilidi. Uning bildürüshiche, ablajan deslepte guma sanju saqchiliri teripidin tutulup, bir kün soraq qilin'ghan, andin qoyup bérilgen. Halbuki, u bu yil 2-ayning 15-küni ürümchidiki dölet amanliq saqchiliri teripidin qayta tutup kétilgen we shuningdin kéyin iz-dériki bolmighan.

Tordiki uchurlardin melum bolushiche, moda éqim naxsha cholpini ablajan awut ayup eng axirqi qétimliq bir meydan oyunini bu yil 2-ayning 13-küni shangxeyde qoyghan. Ündidar toplirida eng axirqi qétim 2‏-ayning 14‏-küni körün'gen. Ablajan awut ayupni yéqindin tonuydighan anglighuchilirimizdin biri uning guma sanju saqchiliri teripidin tutulushining bultur 12‏-aydiki ish ikenlikini we shu qétim soraqtin kéyin qoyuwétilgenlikini, emma bu yil qayta tutulghandin kéyin iz-dériki yoqluqini bayan qildi. Biz ablajan awut ayupning néme sewebtin tutulghanliqini éniqlash üchün awwal guma nahiyelik saqchi idarisige téléfon qilduq. Saqchi xadimliri ablajan heqqide gep qilishtin izchil halda özlirini qachurdi.

Biz yene tordiki alaqe uchurlirigha asasen ablajan istudiyesining alaqileshküchisi déyilgen bir kishige téléfon qilduq. U özining ablajanning alaqileshküchisi emeslikini, bir yilche ilgiri özining ablajan bilen ussulda hemkarlashqanliqini, emma uning nöwettiki ehwalini bilmeydighanliqini éytti. Tönügüki éniqlishimizda gumining choda yézisidiki bir saqchi ablajanning sanju yéziliq saqchilar teripidin tutulghanliqini bayan qilghan idi. Abalajanning ehwalidin xewerdar kishi uning turalghusining ürümchi shehirinining tengritagh rayonigha tewe ikenliki we tengritagh rayonluq dölet amanliq saqchiliri teripidin tutulghanliqini ilgiri sürdi. Tengritagh rayonining dölet amanliq saqchisi ablajan awut ayupning tutulush sewebi heqqidiki so'alimizgha özining bu témida téléfonda jawab bérelmeydighanliqini éytti we ablajanning tutulghanliqi heqqidiki gépimizni inkar qilmidi.

Igilishimizche, ürümchi shehiri “Yépiq terbiyelesh lagérliri” ning orni we sani heqqidiki uchur eng qattiq kontrol qiliniwatqan orunlardin biri. Ötkende hetta bir saqchi xadimi ürümchide “Yépiq terbiyelesh lagéri” ning mewjutluqinimu inkar qilghan idi.

Ürümchidiki uchur kontrolining qattiqliqi sewebidin ablajan awut ayupning nöwette qaysi lagérda tutup turuluwatqanliqi we uning qandaq ehwalda ikenliki melum emes. U ötken yilqi bir sin ziyaret xatiriside özining emelge ashurmaqchi bolghan köpligen arzu-armanlirining barliqini, waqtini kespige köprek merkezleshtürüsh üchün öylinish ishinimu hazirche oylashmaywatqanliqini bayan qilghan idi.

Yuqirida moda éqim naxsha cholpini ablajan awut ayupning tutqun qilin'ghanliqi heqqide melumat berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.