Shiwétsiyediki xitay elchixanisigha chétilghan zor jasusluq délosi we uning bash-axiri (12)

Muxbirimiz qutlan
2015-07-21
Share
babur-mexsut-namayish.jpg Sitokholmdiki Uyghurlarning xitaygha qarshi namayishini közitip turghan jasus – babur mexsut (isterilkida körsitilgen qara közeynek taqighan kishi).
Sherqiy Türkistan Teshwiqat Merkizi


12- Qisim: jasusning aqiwiti

2010-Yili martta shiwétsiye soti xitay elchixanisi üchün jasusluq qilghan Uyghur jasusni deslep qedemde 1 yil 4 ayliq qamaq jazasigha höküm qilidu.

Kéyinche uning shiwétsiye aliy sotiqa sun'ghan naraziliq erzi ret qilinip, yene 6 ayliq türme jazasi qoshulidu.

Shundaq qilip, eyni waqitta shiwétsiye we dunyaning bashqa elliridiki Uyghur jama'itini bir mehel teshwish we wehimige salghan mezkur jasusluq délosidiki jawabkar axiri 1 bir yil 10 ayliq qamaqqa höküm qilinidu.

Undaqta, Uyghur jasus shiwétsiye türmisidiki qamaq jazasini ijra qilip qaytip chiqqandin kéyin uning kéyinki aqiwiti néme boldi? u yene shiwétsiyediki Uyghur jama'iti ichige qaytip keldimu yaki Uyghur jama'iti teripidin menggüge tashliwétildimu?

Shiwétsiyediki Uyghur teshkilatlirining mes'ulliri we bir qisim jama'et wekilliri öz bayanliri arqiliq shiwétsiye qanunining jazasigha uchrighan Uyghur jasusning kéyinki ehwali heqqide uchur béridu.

Shiwétsiye Uyghur komitétining nöwettiki re'isi abdushükür samsaq Uyghur jasusning bügünki künde shiwétsiyediki Uyghur jama'iti teripidin tashlan'ghanliqini, hetta uning bala-chaqiliriningmu jama'etke yéqin kelmeydighanliqini ilgiri süridu.

Shiwétsiye Uyghur komitétining sabiq bash katipi we hazirqi aktip pa'aliyetchilerdin biri bolghan qurbanjan mudash jasusning öz qilmishi arqiliq özige we ewladlirigha menggü yuyup chiqiriwetkili bolmaydighan qara dagh  qaldurghanliqini tekitleydu.

Gu'entanamo türmisidin qoyup bérilip shiwétsiyege yerleshkendin kéyin 62 yashliq jasusning ow nishanigha aylan'ghan adil hékimjan özining we wetendiki xotun-balilirining jasusning sewebidin judaliq qismitige duchar bolghanliqini tilgha alidu.

Undaqta, 1 yil 10 ayliq qamaq jazasini tügitip qaytip chiqqan Uyghur jasus bügünki künde shiwétsiyediki Uyghur jama'itining nezeridin pütünley  ghayip boldimu?

Bu so'algha shiwétsiyediki Uyghur teshkilatlirining mes'ulliri intayin epsusluq ichide bayan béridu.

Shiwétsiye Uyghur ma'arip uyushmisining nöwettiki re'isi exmetjan tursun bilen shiwétsiye Uyghur komitétining sabiq re'isi abdushükür muhemmet ependiler bir qisim kishilerning bügünki kündimu Uyghur jasus bilen bardi-keldi qiliwatqanliqi heqqide gep-söz anglighanliqini testiqlaydu.

Ularning bildürüshiche, téxi yéqinqi künlerde bir qisim kishilerning babur meqsut üchün chapan yépiwatqanliqi, hetta uni Uyghur teshkilatlirigha qayturup ekélish oyunini qayta oynawatqanliqi melum…

Axirida dunya Uyghur qurultiyi ijra'iye komitétining re'isi dolqun eysa shiwétsiyediki jasusluq délosining muhajirettiki Uyghur teshkilatlirigha qaldurghan achchiq tejribe-sawaqlirini eskertip, Uyghur teshkilatliri bilen jama'etchilikni xitay jasusliridin hushyar bolushqa agahlanduridu.

(12-Qisim tügidi, dawami bar)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet