Голландийидики уйғурлар: әгәр һөр вә әркин болалисақ, һәммәйлән қайтип кетәттуқ

Ихтиярий мухбиримиз пидаий
2013-04-18
Елхәт
Пикир
Share
Принт
Голландийә уйғур бирлики әзалири муһакимә йиғинидин хатирә сүрәттә. 2013-Йили апрел.
Голландийә уйғур бирлики әзалири муһакимә йиғинидин хатирә сүрәттә. 2013-Йили апрел.
RFA/Pidaiy

Голландийидә йүз бәргән икки тәрҗиманниң җасуслуқ қилмишлири һәққидә муһакимә уюштуруш, инкас қайтуруш вә учур топлаш голландийидә яшаватқан шәхсләр вә топлумларниң бүгүнки қизиқ нуқтилириға айланди.

Болупму, уйғур америка бирләшмиси торида елан қилинған мәзкур хәвәргә алақидар бир йолланминиң зиярәт сани 11 миңдин ешип, 100 гә йеқин инкас чүшти. Нөвәттә бу икки тәрҗиман мәсилисигә алақидар әң кичик хәвәрләрму, кишиләрниң диққитидин сиртта қалмай дегүдәк, давам қилмақта. Мәзкур мәсилә оттуриға чиқип бүгүнгә кәлгүчә алди билән явропа шәрқий түркистан маарип җәмийити бир қетим язма баянат, йәнә бир қетим вийдиолуқ инкас қайтурған иди. Бу қетим голландийә уйғур бирлики тәшкилатиму ипадә билдүрди.

Алдинқи күни голландийә уйғур бирлики тәшкилати актип әзалири билән җәм болуп, 12‏-апрел елан қилинған йеңи хәвәрләр вә доклатларни музакирә қилди вә бу һәқтә мәйданини ипадилиди. Мәзкур җәмийәтниң рәиси пәрһат қадир билдүрүшичә, улар дуня уйғур қурултийиниң көрсәтмиси бойичә, икки тәрҗиманниң мәсилиси таки сотниң қарари билән җәзмләшкәнгә қәдәр сәбир қилип турушни ойлашқан болсиму, голландийә мәтбуатлирида елан қилинған хәвәрләрниң тәрәққияти вә уйғур җамаәтчиликиниң тәқәззаси билән бу һәқтә пикир баян қилиш қарариға кәлгән.

Мәзкур тәшкилатниң иҗраийә ишлириға мәсул хадими ғәйрәтҗан розиниң билдүрүшичә, нәччә күндин бири елан қилинған хәвәрләр вә доклатларда голландийә уйғур бирликиниңму төһпилири баркән. Бу қетимлиқ елан қилинған хәлқара кәчүрүм тәшкилати билән голландийә көчмәнләр оргини тәрипидин һазирланған доклатниң 8‏-бетидә «әгәр биз һөр вә әркин болалисақ, һәммәйлән қайтип кетәттуқ» дегән бир тема қоюлған болуп, униңда голландийә уйғур бирлики тәшкилатиниң катипи вә явропа уйғур, тибәт, моңғул бирләшмисиниң кординатори ғәйрәтҗан розиниң зиярәт қилинғанлиқи йезилған вә «әгәр биз һөр вә әркин болалисақ, һәммәйлән қайтип кетәттуқ» дегән бу сөзни голландийидики илтиҗачи уйғурларниң йүрәк сөзлири дегән қараш илгири сүрүлгән.

Биз бу мунасивәт билән мәзкур муһакимә әһлини зиярәт қилдуқ.

Голландийә уйғур бирлики тәшкилати голландийидә бир қәдәр узун тарихни баштин кәчүргән тәшкилат болуп, у қурулғандин бири дуня уйғур қурултийиниң астида түрлүк намайиш, мәдәнийәт вә сиясәткә алақидар саһәләрдә хизмәт қилип кәлмәктә.

Пикирләр (0)
Share
Толуқ бәт