Onsu chaghraqta muniyaz a'ilisidin bir qérindash étilghan, 5 qérindash we bir küy'oghul késilgen

Muxbirimiz shöhret hoshur
2016.04.25
sot-olum-jaza-uyghur-5-iyul.jpg CCTV Xewiride bérilgen, 5-iyul weqesige chétishliq Uyghurlarni ölüm jazasigha höküm qilghan körünüsh. 2009-Yili 15-öktebir.
AFP

Onsu chaghraqtiki muniyaz a'iliside 6 oghul, bir qiz 7 qérindash bar bolup, bulardin eng chongi abdulla muniyazgha 1997-yili ürümchide yüz bergen aptobus partlitish weqesige chétilip shu yili ölüm jazasi bérilgen, yasin muniyaz bilen abduwayit muniyaz hijret sepiride wiyétnamdin qayturup ekilinip 17 we 13 yilliq késilgen؛ aqniyaz muniyaz, abdurusul muniyaz we ablikim muniyazlar milliy öchmenlik eyiblimisi bilen 11 we 9 yilliqtin késilgen. A'ilidiki birdin- bir qiz qérindash ayshemgül gerche jazalanmighan bolsimu, uning yoldishi imin abduréhim hijretke pul toplash seweblik késilgen.

Muniyaz a'ilisining jazalinish ehwali heqqide yuqiriqi melumatlarni bergen kishi chaghraq yéza 2-kentning amanliq mudiri. Gerche u, 7 qérindashtin abdulla muniyazgha 1996-yili ürümchidiki aptobus partlitish weqesige chétilip ölüm jazasi bérilgenlikini éytqan bolsimu, emma xitay j x tarmaqlirining torda élan qilghan “1996-2000‏-Yillardiki chong délolar” namliq doklatida abdulla muniyaz isimlik gumandarning 1997-yili ürümchide yüz bergen 25-féwral aptobus partlitish weqesige chétilip ölümge buyrulghanliqi bayan qilin'ghan.

Mezkur doklatta Bayan qilinishiche, 25-féwral aptobus partlitish weqeside 3 aptobus teng waqitta partlitilghan we weqede 9 kishi ölgen, 68 kishi yarilan'ghan. Gerche yuqiriqi amanliq mudiri muniyaz a'ilisidiki 5 qérindash we bir küy'oghulning chétishliq délosining tepsilati heqqide melumat bermigen bolsimu, emma rayonning weziyiti we mezkur a'ilining tarixi mezkur a'ilining 1997-yildiki aptobus partlitish weqesi seweblik kolléktip jazalan'ghanliq éhtimalliqini ashkarilimaqta.

Awaz ulinishi arqiliq, bu a'ilining kolléktip jazalinish ehwali heqqide melumat anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.