Uyghur diyaridiki xelqler baydiki kömürkan'gha hujum qilish weqesidin zadi qanchilik xewer tapti?

Muxbirimiz qutlan
2015-10-28
Share
komurkan-komur-kan.jpg Xitaydiki melum kömürkan. 2015-Yili 20-awghust.
AFP

18-Séntebir küni bay nahiyiside yüz bergen kömürkan'gha hujum qilish weqesi radi'omiz arqiliq tashqi dunyagha ashkara bolghandin kéyin, xitay hökümiti mezkur weqe heqqidiki xewerlerni qattiq qamal qilghan.

50 Tin artuq adem ölgenliki ilgiri sürülüwatqan mezkur weqe heqqide xitay hökümet taratqulirining hazirgha qeder bir parchimu xewer bermesliki közetküchilerning diqqitini qozghimaqta.

Undaqta, weten ichidiki Uyghurlar bay nahiyiside yüz bergen kömürkan'gha hujum qilish weqesidin zadi qanchilik xewer tapalighan? da'irilerning mezkur weqeni axbarattin yoshurushi we bu heqtiki xewerlerning xelq arisigha tarqilishini qattiq tosushi zadi qanchilik ünüm körsiteligen?

Biz bu heqte ehwal igilesh üchün Uyghur élidiki ikki jaygha téléfon qilduq. Awat nahiyesining yéngi'ériq yézisigha "Muqimliq" xizmiti üchün chüshken xizmet guruppisining melum bir ezasi ziyaritimizni qobul qildi.

U ziyaritimiz dawamida kenttiki déhqanlarni bay weqesi toghrisida gep-söz qilishtin qattiq chekleydighanliqini, özliriningmu bu témida gep-söz qilmaydighanliqini yaki sürüshte qilmaydighanliqini bildürdi.

Biz arqidin, atush shehirining üstün atush yéza qayraq kentidiki "Qizil teshwiqat cholpini" qurban ömerdin ehwal sürüshtürduq. U ziyaritimiz dawamida baydiki kömürkan'gha hujum qilish weqesi heqqide hökümet tereptin héchqandaq xewer bérilmigenlikini, emma xelq arisida bu heqte gep-sözlerning tarqilip yürgenlikini ashkara qildi: "Baydiki weqeni anglidim. Bu heqte hökümetning radi'o-téléwiziye we gézit-zhurnallirida héchqandaq xewer bérilmidi. Hökümetning bu heqte néme üchün xewer bermigenlikini bilmidim. Halbuki, xelq arisida bay nahiyiside kömürkan'gha hujum qilish weqesi yüz bergenliki toghriliq mish-mish gepler bolmaqta. Shexsen özüm bu heqte ikki kishidin anglidim. Men sheherlik hökümetke kirip bu heqte ehwal igilep baqmaqchimen hemde 'esebiy küchler' ning weqe peyda qilip muqimliqni buzghanliqigha qarshi teshwiqat élip barmaqchimen. Men hazirgha qeder hoylamda qizil bayraq chiqirishni dawamlashturup kéliwatimen. Bu qétimliq dölet bayrimidimu bala-chaqilirim bilen bayraq chiqardim. Ötkende qizilsu oblastining sabiq partkom sékrétari wang shingxey atushni ziyaret qilghanda mexsus méning öyümge chiqip, partiyining ghemxorluqini yetküzdi…"

Awat nahiyesidiki bir neper "Muqimliq" kadiri bilen üstün atush yézisidiki "Teshwiqat cholpini" qurban ömerning bayanliri bizge baydiki kömürkan'gha hujum qilish weqesi heqqidiki xewerlerning alliqachan weten ichidiki Uyghurlar arisigha tarqilip bolghanliqini körsetmekte.

Programmining tepsilatini yuqiridiki awaz ulinishidin anglighaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet