Qoral élip qachqan gumandar éli mettursunning toluq kimliki we ish izliri ashkarilandi

Muxbirimiz shöhret hoshur
2015-03-04
Share
Eli-Mettursun-qoral-elip-qachqan-305 Qoral élip qachqan gumandar éli mettursunni tutush élani.
Social Media

Xitay saqchilirining chiqarghan bir uqturushida bayan qilinishiche, éli mettursun isimlik xoten kériyelik bir xiro'én etkeschisi, 1-mart küni uni chingxeydiki bir méhmanxanida xoten'ge élip mangghan saqchilarning qolidiki ikki naganni oqliri bilen oghrilap qéchip ketken.

Yene saqchi torbétide bayan qilinishiche, éli mettursun qéchip 15 sa'ettin kéyin tutulghan؛ emma bu uchurlar uzun ötmey tordin öchürüwétilgen. Muxbirimiz bu heqte ikki éniqlash élip bérish arqiliq, éli mettursunning mehelle küyliri bilen sözlishish pursitige érishti. Melum bolushiche, éli mettursun, uqturushta déyilgendek, xiro'én etkeschiliki bilen emes, dölet bixeterlikige tehdit yetküzüsh gumani bilen tutulghan. U burun bir mehel yaman yollarda mangghan bolsimu, kéyinki mezgillerde özgergen we shangxeyde ashxana échip igilik tikligen؛ u shuningdin kéyin köpligen xeyr-saxawet ishlirini qilghan. Shuningdin kéyin, xitay da'iriliri uning péyigha chüshken.

Melum bolushiche, éli mettursun, kériyening jay yéza qattikün kentidiki iqlimxan isimlik oqutquchi we bir diniy zatning béqiwalghan oghli bolup, u toluq otturini püttürüpla jem'iyetke chiqqan. Bu yil 35 yashqa kirgen éli mettursun, buningdin 7-8 yil burun, oyun-tamashigha bérilip bir mehel yurt sorap yürgen, emma kéyinki mezgillerde, uning hayatida burulush xaraktérlik özgirish bolghan, u shangxeyde ashxana échip iqtisad jehettin ronaq tapqan, shuningdin kéyin yurti kériyede bir qatar xeyr-saxawet ishlirini qilghan. Uning mehelle koyidiki birining bayan qilishiche, u birqanche yilning aldida kériyening shenbe bazar yézisidiki jezxorlarning yighip yaman yoldin tosqan we ulardin pul yighip, bir yashan'ghanlar sanatoriyesi tesis qilghan. U bu qilghini üchün xitay da'irilirining diqqitini tartqan. Bolupmu u, yéqinda bir meschitke we talip balilargha pul yardem qilghini üchün, jem'iyet tertipini buzush we buzushqa qutratquluq qilish bilen eyiblinip, buningdin bir ay burun tutqun qilin'ghan. Kériye nahiyiside ochuq meydan sot échilip uning qolgha élin'ghanliqi élan qilin'ghan.

Ashkarilinishiche, éli mettursun, kériye qamaqxanisidin namelum yollar bilen qéchip ketken, saqchilar uni iz qoghlap xitay ölkilirige bérip tutup qaytiwatqinida, mezkur qoral élip qéchish weqesi yüz bergen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet