Obulhesen abdukérimning naheq délosi 60 mingdin artuq tor ziyaretchisining inkasini qozghighan

Muxbirimiz qutlan
2014-01-30
Élxet
Pikir
Share
Print
Obulhesen abdukérimgha xoten wilayetlik méyipler jem'iyiti teripidin bérilgen méyiplik kinishkisi.
Obulhesen abdukérimgha xoten wilayetlik méyipler jem'iyiti teripidin bérilgen méyiplik kinishkisi.
RFA/Qutlan

Ürümchidiki ijare öyide turup ziyaritimizni qobul qilghan obulhesen abdukérim heqqaniy yéshimge érishmigiche özining hergizmu erz-dewadin toxtap qalmaydighanliqini bildürdi.

Obulhesenning ashkarilishiche, xotenning lasguy baziri aqtash kentidin tartip taki Uyghur aptonom rayonluq sehiye nazariti we yuqiri sotqa qeder ichki tor hasil qilghan byograt sistéma uning erz-shikayitini birdek ret qilip kelgen. 10 Yil ichide bu naheq délodin qet'iy bel qoyuwetmigen obulhesen axirida jama'et pikri we tor kézerlirining kolléktip inkasi arqiliq dewada bösüsh éghizi échishqa tirishqan.

Obulhesen abdukérimning qolidiki barliq delil-ispatliri bilen 1-ayning 20-küni torgha qoyulghan mexsus yazmisi Uyghur tor betliride küchlük inkas peyda qilghan. Uning radi'omizgha bildürüshiche, qisqa muddet ichide 60 mingdin artuq tor ziyaretchisi bu naheq délo heqqide inkas qayturghan. Uning munasiwetlik qanun maddiliridin neqil keltürüp, delil-ispatlarni qoshup yazghan yazmisi tordin-torgha ulap bésilghan. Bu heqtiki küchlük jama'et pikri méyip obulhesenning heqqaniyet üchün dewadin hergiz qaytmasliqtek rohigha téximu zor ishench béghishlighan.

U öz yazmisida xotenning lasguy bazar aqtash kentidin tartip Uyghur aptonom rayonluq organlargha qeder mezkur délogha munasiwetlik 11 shexs we orun üstidin erz qilidighanliqini, ularning isim-familisi, adrési, qilmishi hemde ularning qanunning qaysi maddisini buzghanliqini tepsiliy tilgha alghan. Obulhesen yene 10 yil jeryanida özining saghlam bir insandin nimjan méyipla aylinip qalghanliqini, pütün a'ilisi boyiche xaniweyran bolghanliqini shundaqla jismaniy, iqtisadiy we rohiy jehettin mislisiz derijide sun'ghanliqini bayan qildi hemde buning üchün mezkur délogha munasiwetlik shexs we orunlardin 12 milyon som tölem telep qilidighanliqini bildürdi.

Obulhesen abdukérim ziyaritimiz jeryanida 2007-yilidin 2009-yiligha qeder ikki yil jeryanida lasguy bazar aqtash kent kadirlirining uni yuqiri orunlargha bérip erz qilishtin tosqanliqini, hetta uning hoylisigha mexsus adem qoyup nazaret qilghanliqini bildürdi.

U bizning "Mezkur dawada utup chiqip, tölemge érishishke ishenchingiz barmu?" dégen so'alimizgha jawab bérip: "Ishenchim bar, bu dawaning axiri chiqmighuche hergiz waz kechmeymen!" dédi.

Tepsilatini awaz ulinishtin anglighaysiz.

Toluq bet