Түрмидә өлгән абдурешит һаҗиниң сүрийәдики уйғурларниң виза ишиға ярдәм қилғанлиқи илгири сүрүлмәктә

Мухбиримиз шөһрәт һошур
2017-03-27
Share
urumchi-sheherlik-1-turme-2.jpg Үрүмчи шәһәрлик 1-түрмә. 2014-Йили 24-сентәбир, үрүмчи.
RFA

29 Күн қамақта тутулғандин кейин, йүрәк кесили билән өлгәнлики уқтурулуп, җәсити аилисигә қайтурулған тиҗарәтчи абдурешит һаҗиниң өлүм сәвәби гуманлиқ болғинидәк, униң дөләт бихәтәрликигә тәһдит йәткүзүш әйиблимиси билән тутулуш сәвәбиму гуманлиқ билинмәктә. Даириләр абдурешит һаҗиниң аилисигә униң тутқун қилиниш сәвәби сүпитидә, униң түркийә вә қирғизистандики чеғида сүрийәгә маңған уйғурлардин 80 нәччә кишигә виза елип бәргәнликини илгири сүргән.

Җүмә күнидики программимизда дейилгәндәк, илгири саламәтликидә һечқандақ мәсилә көрүлмигән абдурешит һаҗи, 29 күнлүк қамақтин кейин, түрмидә йүрәк кесили қозғилип өлгәнлики уқтурулуп җәсити аилисигә тапшурулған вә шу күни тезликтә йәрликкә қойдуруветилгән. Аилә әзалири җәсәтниң йүзини көргән болсиму, бәдән қисмини көрәлмигән. Абдурешит һаҗиниң аилиси униң өлүм сәвәбини сүрүштә қилишқа җүрәт қилалмиған; улар гуманини ичидә сақлашқа вә уштумтут дуч кәлгән бу талапәткә сүкүт қилишқа мәҗбур болған.

Абдурешит һаҗини яхши билидиған қолум ‏- қошнилириниң баян қилишичә, униң қирғизистандики тиҗарити буниңдин 5 йил аввал тохтиған. Шуниңдин кейин у қирғизистанға чиқмиған. Абдурешит һаҗи йеқинқи икки йил ичидә түркийәгә икки қетим чиққан болсиму, у йәрдә тиҗарәт қилмиған, пәқәт бир елим-берим иши билән йәни қәрз сүйләп чиққан.

Абдурешит һаҗи түркийәдики мәзгилидә башқиларға ярдәм қилғудәк дәриҗидә узун турмиған. Униңдин башқа, сүрийәгә бериш үчүн виза керәк яки әмәслики, униң үстигә бу ишниң қирғизистанда мумкинчиликиму ениқ әмәс. Әмма, уйғур райониниң вәзийитидики җиддийчилик сәвәбидин, униң аилә тавабиати, худди өлүм сәвәби һәққидики гуманини ичигә ютқандәк, униң тутулуш сәвәби һәққидиму еғиз ачалмиған.

Юқиридики улиништин, бу һәқтики мәлуматлиримизниң тәпсилатини аңлайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт