Qaramaydiki ot apitige uchrighan ikki Uyghur tutqun qilindi

Ixtiyariy muxbirimiz éhsan
2015.04.16
qarimay-ot-apiti-2.jpg Qaramaydiki Uyghur mehelliside yüz bergen ot apiti
RFA/Ihsan

Qaramay shehiride 60din artuq Uyghurlar a'ilisi topliship olturaqlashqan shamalbagh rayonidiki mehellige 3-ayning 25-küni sirliq ot kétish netijiside 6 Uyghur jénidin ayrilghan, 60 a'ililikning öyliri we bisatliri pütünley köyüp, nurghun iqtisadi ziyan kélip chiqqan idi.

Yerlik da'iriler ot apitige uchrighan Uyghurlargha ot kétish sewebini hazirghiche ashkarilimighan bolup, ularni peqet waqitliq üch ayliq ijare öy bilen teminligen. Qalghan ishlarni bolsa üch aydin kéyin birterep qilidighanliqini, ularning bu ehwallarni yuqiri derijilik orunlargha erz qilmasliqini, eger shundaq ehwallar körülse barliq aqiwetke özlirining ige bolidighanliqini eskertken.

Igilishimizche, 9-aprél küni ablimitxan we tursun'axun isimlik 50 yashlar etrapidiki ikki kishi qaramay sheherlik bixeterlik idarisi teripidin esir namizidin kéyin öyge qaytish yolida tuyuqsiz tutqun qilin'ghan, hazirmu ularning tutup turush ornida so'al-soraqta ikenliki melum boldi.

Igilishimizche, ablimitxan bilen tursun'axun ikkisi ot apitidin kéyin shu rayondiki Uyghurlarning hökümet bilen sözlishishke saylighan besh kishilik hey'et ichide wekil bolghan. Ablimitxan hökümet bilen bolghan söhbet jeryanida, ulargha üch aydin kéyin qandaq orunlashturush élip bérilidu, öyning tölem heqqi qandaq bolidu dégendek so'allarni we waqitliq orunlashturghan ijare öylerde körülüwatqan qiyinchiliqlarni otturigha qoyghan.

Ablimitxan bilen tursun'axun diniy kimliki ashkara kishiler bolghachqa, ularning wekiller ichide éliwatqan rolini közde tutqan yerlik da'iriler bularni tutqun qilish nishani qilghan dégen perezler otturigha chiqmaqta.

Bu ishlardin xewiri bar sheher ahalisining bayan qilishiche, ablimitxan tutulup ikki kün'giche baliliri dadisining baridighan jaylirini we tonushlirini izdep sürüshtürgen, emma xewirini alalmighan. Üchinchi künige kelgende, qaramay sheherlik dölet bixeterlik idarisi teripidin qolgha élinip soraq qiliniwatqanliq uchurini alghan, emma néme sewebtin tutulghanliqi heqqide melumatqa ige bolalmighan.

Qaramay shehiride 25-mart ot apitidin kéyin xitay da'iriliri bu xewerning ijtima'iy alaqe wasitiliride tarqilishini chekligen hemde saxawetchi Uyghurlarning yardem qilish seperwerlikige tosqunluq qilghan idi.

Hökümet xadimliridin ehwal igilishimizche, qaramay rayonluq hökümet ot apitide köyüp yarilan'ghan abdughénini heqsiz dawalawatqan bolsimu, emma uning ayali we baliliri üchün hazirghiche yardem bérishni oylashmighan, peqet depne murasimigha kelgen tughqanlirining qatnash kirasini tölep bergen.

Yerlik da'iriler ot apitige uchrighan ammining ichidiki qolida yer xéti barlargha her bir kwadrat métir üchün 220 som pul bérip, qalghanlarning bolsa hazirqi üch ayliq ijarisini kötürüp bérip boldi qilidighanliqi, ularning naraziliq keypiyatigha qarita andin besh ayghiche öy ijarisini kötürüsh pilani barliqi ashkara boldi.

Yene bir Uyghur rayoni bolghan gherbiy tashliq jilghisidiki Uyghurlar 6-mart küni özlükidin teshkillinip yuqiri orunlargha erz qilish üchün atlan'ghanda, yerlik da'iriler, teshkillen'gen 8 kishilik hey'etke “Hökümetke qarshi adem topliding” dep bohtan artqan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.