Qaraqashta yüz bergen 7 neper xitay ishchini pichaq tiqip öltürüsh weqesining tepsilati ashkarilandi

Muxbirimiz shöhret hoshur
2013.07.09
yusup-exmet-qadir-305.jpg Tutush buyruqi chiqirilghan 11 neper Uyghurning ikkisi yüsüp exmetqadir(sol) we memet'éli tursunniyaz.
http://uy.ts.cn

Xitayning Uyghur rayonluq j x nazariti yéqinda 11 neper Uyghur yash üstidin chiqarghan tutush buyruqida, bulardin ikki nepirining qaraqash deryasining su tosmisini yasawatqan ishchilarni öltürüsh weqesige chétishliq ikenlikini bayan qilghan ؛ emma, weqening bash-axiri we qanche kishining ölgenliki heqqide melumat bermigen idi. Muxbirimizning yéqinqi éniqlashliri dawamida bu weqeningmu tepsilati ashkarilandi. Melum bolushiche, xotenning xan'ériq yézisidin bolghan 7 neper pida'iy, 6-ayning 20-küni seherde qaraqash deryasida ishlewatqan xitay köchmenlirige hujum qilip 5 nepirini neq meydanda öltürgen we 4 nepirini yarilandurghan؛ yaridarlardin 2 nepiri doxturxanida jan üzgen. Töwende bu weqening tepsilatini weqege chétishliq gumandarlarni tutushqa biwasite hemkarlashqan bir kent partkom sékrétarining öz éghizidin anglaysiler.

Sékrétar: yéqinda nahiyilik partkomning shujisi keptiken, alayiten men bilen söhbetleshkili, “Déhqanning nahiyilik partkomgha néme pikri bar , néme telipi bar, mushuninggha bir jawab bérip baqsang” deydu. Men uninggha “Déhqanning partiye we hökümetke rehmiti bolsa barki, bashqa gépi yoq, bir telipi mushu nöwettiki déloni tézrek pash qilip, bizning könglimizni bir aramigha chüshürüp qoysikin deydighan telipi bar” déwidim külüp ketti u.
Muxbir: bu délomu silerning xan'ériqta yüz bergenmu?
Sékrétar: yoqsu. Qatilliq délosi qaraqashta yüz bergen؛ emma jinayet gumandarliri xan'ériq terepke qarap qéchiptiken, tekshürüsh mushu terepte boldi asasliqi.
Muxbir: bu weqening bash-axiri qandaq?
Sékrétar: qaraqash deryasining su tosmisni yasawatqan xenzu yoldashlar iken ular؛ jinayet gumandarliri shu xenzu ishlemchilerdin 9 nepirige ziyan -zexmet yetküzüp qoyuptu. (Jinayet gumandarliri) weqeni sadir qilip bolup, deryaning bu teripige ötüp xan'ériq terepke qarap qéchiptiken. Tekshürüsh dawamida gumandarlar xan'ériqtiki 4 kenttin bolup chiqti.
Muxbir: gumandarlar xenzu ishchilargha néme bilen hujum qiptu?
Sékrétar: pichaq bilen, 55 santimétirliq bir pichiqi(qingghiraq) yolda chüshüp qalghan iken؛ (saqchilar) bizge körsetti؛ qarisaq tömürchi yasighan pichaq emes, bashqa ishlargha(turmushqa) ishletkini bolidighandek emes(adem ültürüshtin bashqa).
Muxbir: xenzu ishchilardin qanchisi ölüptu?
Sékrétar: beshi neq meydanda ölüptu؛ töti yaridar bolup, yaridardin ikkisi doxturxanida ölüptu. Ichkiridin ishlemchilikke kelgenlerken.
Muxbir: saqchilar neq meydan'gha yétip kélelmeptimu?
Sékrétar: saqchilar xewer tépip neq meydan'gha yétip kelgüche 1-2 sa'et waqit ötüptu, angghiche gumandarlar qéchip kétiptu.
Muxbir: neq meydandiki xenzu ishchilarning sani qanche iken? qarshiliq körsermeptimu?
Sékrétar: yigirme nechche chéghi, jangpangning(chédirning) ichide yétiptiken؛ seherde ushtumtutla hujumgha uchraptu؛ qarshiliq körsitelmeptu.

Muxbir: weqe sadir qilghuchilar u xenzu ishchilar arisidiki mesile néme iken?
Sékrétar: xenzular bilen menlik talishish؛ millet ayrimichiliqining küchiyip ketkenliki dep oylidim emdi.
Muxbir: yerliri tartiwélin'ghan ishlar yoqmiken?
Sékrétar: yoq, yoq, undaq ish yoq. Ishlise ma'ashini bermigen dégendek ehwalmu yoq.
Muxbir: hujumchilarning sani qanche iken?
Sékrétar: yette. 5 Nepiri tutuldi, ikki nepirini téxiche izdewatimiz. Déhqan'gha bek awarichilik bolup ketti؛ azraqla aq-qarini perq ételeydighan yashlar yürekzade bolup ketti) tola soraq qilinip(.
Muxbir: gumandarlar xan'ériqning asasliq qaysi kentidin bolup chiqti?
Sékrétar: asasliqi bay, chapa? tonung? kentidin bolup chiqti. (Bularni izdeymiz) asas qatlam kadirlirining aghzigha issiqraq ash kirmigili , kéche-kéchilep uyqusiz yürüwatqili 2-3 hepte boldi. Bu qéchip yürgenlerning orni bayqilip boldi, ismi turaqliship boldi, emdi qoghlap zerbe béritimiz dep tursaq, emdi tulumdin toqmaq chiqqandek, bu ish(xan'ériq weqesi) chiqti. Ishlar awup ketkini tudiya-emdi?!

J x nazaritining tutush buyruqidin melum bolushiche, mezkur weqege chétishliq qéchip yürgen ikki gumandarning biri yüsüp exmet qadir, yene biri memtili tursunniyazdur؛ tutush buyruqidin yene melum bolushiche, 25 we 27 yashqa kirgen bu ikki pida'iy, xoten nahiyiside bu yil 4-ayning 23-küni yüz bergen, bir ottura mektepning ikki neper amanliq xadimini pichaq bilen öltürüp jesitige ot qoyuwétish weqesigimu ishtirak qilghan. Emma bu weqening tepsilati hazirche melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.