Корлада мисирдин қайтқан икки оқуғучиниң түрмидә өлгәнлики дәлилләнди

Мухбиримиз шөһрәт һошур
2017.12.20
memtimin-qari-hajim-oghli-yasinjan.jpg 2016- Йили 4-айларда әзһәрдин вәтәнгә қайтип, сақчиларниң сорақлири җәрянида өлүки берилгән ясинҗан. Корла наш аваттин, мәмтимин қари һаҗимниң оғли. (Сүрәтниң тартилған вақти вә орни ениқ әмәс)
Social Media

Йеқинқи айлардин бери аңлиғучилиримиз, корлада мисирдин қайтқан икки оқуғучиниң түрмидә өлгәнлики һәққидә арқа-арқидин учур йәткүзгән, әмма мухбирлиримизниң 3 айдин бериқи ениқлашлири давамида учурниң тоғрилиқи айдиңлашмиған иди.

Мухбиримизниң бүгүнки ениқлиши давамида, корладики бир кәнт секретари, корладики чоң мәсчитниниң мисирдин қайтип кәлгән оғли билән, чарбағдики бир сақчи хадиминиң мисирдин қайтип кәлгән иниси ясинҗанниң түрмидә өлгәнликини дәлиллиди.

Муһаҗирәттики аңлиғучилиримиздин бирқанчиси бу йил 9-10-айларда радиомизға мәктуп йоллап, корлада мисирдин қайтқан бир оқуғучиниң түрмидә өлгәнликини мәлум қилди. Әмма мәктупта өлгүчиниң исми вә нопус тәвәлики йезилмиған болғачқа, бу һәқтики ениқлашлиримиз нәтиҗисиз қалған иди. Бу һәптә бу һәқтә учур йәткүзгән бир аңлиғучимиз, корлада мисирдики оқуштин қайтип өлгән кишиниң икки нәпәр икәнлики, буниң бири корла шәһәр ичидин икәнлики, йәнә бирсиниң болса ават йезисидин икәнлики, исимлириниң абдуслам мәмәт вә ясинҗан икәнликини баян қилди. Биз бу йип учлириға асасән, бу һәқтә тәкрар ениқлаш елип бардуқ.

Корланиң ават йезисида илгири вәзипә өтигән бир кәнт секретари, өзи билән биллә вәзипә өтигән гуруппа кадирлири вә сақчи хадимлиридин аңлиғанлириға асасән, юқирида тилға елинған икки кишиниң өлүмидин хәвәрдар икәнликини ейтти. Униң баян қилишичә, абдусалам мәмәт корла шәһәр ичидики чоң мәсчитниң имаминиң оғли; ясинҗан болса, корла чарбағ түрмисидики бир сақчи хадиминиң иниси. Мәзкур секретарниң баян қилишичә, ясинҗан мәмәт гәрчә, хитайниң буйруқиға бойсунуп, мисирдин қайтип кәлгән болсиму, у қамақханиға солиништин халий болалмиған. Униң түрмидики бихәтәрликигә түрмә сақчиси акисиму капаләтлик қилалмиған. Мәлум болушичә, ясинҗан түрмидә өлүп кетишниң алди-кәйнидә униң акиси хизмәттин тохтитилған.

Биз ясинҗанниң акисиниң әһвалини ениқлаш үчүн чарбағ сақчиханисиға телефон қилдуқ. Сақчи хадими, корлада йеқинқи мәзгилләрдә иштин тохтитилған сақчиларниң көп икәнликини ейтти, әмма ясинҗанниң акисиниң кимликидин хәвәрсизликини баян қилди.

Хитай даирилири бу йилниң бешида чәтәлдә оқуватқан уйғур оқуғучиларни қайтуруп әкетиш һәққидә уқтуруш чүшүргән вә дипломатик қаналлирини ишқа селип бәзи дөләтләрдики, болупму мисирдики уйғур оқуғучиларни қайтуруп әкәткән иди; уларниң һәммисиниң дегүдәк қамақхана вә түрмиләрдә икәнлики мәлум болсиму, һаяти бихәтәрлики вә алған җазалири һәққидә мәлумат йоқ иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.