Rabiyxan musa anini qaxshatqan saqchi memliket boyiche nemunichi saqchi bolup mukapatlandi

Xitay j x ministirliqi19 ‏-may küni ötküzgen mukapatlash murasimi heqqidiki xitay xewerliridin melum bolushiche,  ötken yili pasporti tartiwélin'ghan 83 yashliq rabiyxan musa anini qattiq qaxshatqan we uninggha éghir tehdit salghan, bortala sheherlik saqchi idarisining mu'awin bashliqi abduréhim yunusmu memliket boyiche nemunichi qehriman bolup mukapatlan'ghan. Rabiyxan ana ötken yildin buyan radiyomizda qilghan sözliride, abduréhim yunusning uni ishxanisidin qoghlap chiqarghanliqi qatarliq bir qatar zorawanliqliri heqqide  qaxshap shikayet qilghan idi. Bügün abduréhim yunusni yéqindin tonuydighan bortalaliq muhajir, abduréhimning siyasiy we diniy mesililerde Uyghurlarni jazalashta xitay kütkendinmu aktip rol oynighanliqini bayan qildi.

Xitayche shinxu'a torining xewer qilishiche,  xitay j x ministirliqi bu yil19 ‏-may küni memliket boyiche nemunichi qehrimanlarni mukapatlash murasimi ötküzgen. Murasimda Uyghur rayonining j x sahesidin 18 kolléktip we 17 shexs mukapatlan'ghan.  Emma xewerlerde bularning  konkrét ish-izliri heqqide toxtalmighan.  Mukapatlan'ghanlar tizimlikide atalmish nemunichi qehrimanlardin biri “Börtala sheherlik saqchi idarisining mu'awin bashliqi abduréhim yunus” dep tonushturulghan. Ötken yildin bashlap radiyomizda köp qétim erz-shikayetlirini bayan qilghan 83 yashliq rabiyxan musa ana, tartiwélin'ghan pasportini qayturiwélish üchün börtala sheherlik saqchi idarisigha barghanda, ene shu abduréhim yunusning, uning erzige qulaq salmighanliqini, hetta ishxanisidin qoghlap chiqarghanliqini bayan qilghan idi. Abduréhim yene, rabiyxan anigha herqandaq yerge bérip shikayet  qilsa bolidighanliqini éytqan, emma rabiyxan ana radiyomizda shikayet qilghandin kéyin, uni bölgünchilik bilen eyiblep, türmige tashlinidighanliqini éytip tehdit salghan. Biz eyni chaghda abduréhim yunusqa téléfon qilip, bu qilmishliri heqqide melumat sorighan iduq, u so'alimizgha tepsiliy jawab bermigen, emma rabiyxan anigha qilghan zorawanliqini retmu qilalmighan idi.

Biz bügün, esli yurti börtala bolghan, nöwette norwégiyede yashawatqan qurbanjan arup ependidin, abduréhim yunushning jem'iyettiki tesiri heqqide melumat soriduq. Chet'elge chiqqini 8 yil bolghanliqi we börtalada 40 yildin artuq yashighanliqini bayan qilghan qurbanjan ependi, abduréhim yunusning siyasiy we diniy mesililer heqqide chéqimchiliq qilish arqiliq saqchiliqqa qobul qilin'ghanliqini we qattiq zerbe dolqunlirida, milletpewer r Uyghur ziyaliylirini bayqash, pash qilish we türmige tashlash arqiliq mertiwisini östürgenlikini ilgiri sürdi. Qurbanjan yene  abduréhimning jem'iyettiki tesiri heqqide toxtilip mundaq dédi: “Abduréhim mashka dése uni börtalada hemme adem dégüdek tonuydu”.

Abduréhim yunusning peqet Uyghurlargha ziyankeshlik qilishta aktip bolush  bilen bügünki mertiwe we mukapatqa érishkenlikini tilgha alghan qurbanjan ependi, uning qilmishliridin birnechche  pakitlarni körsitip  ötti. Uning bayan qilishiche, bu yilning béshida börtalada ablikim mu'ellim dep tonulghan bir kishi ayali we ikki perzenti bilen birlikte diniy esebiylik gumani bilen qamaqqa élin'ghan we ikki aydin kéyin qamaqta jan üzgen. Qurbanjan arupning yurtdashliridin xewer tépishiche, ablikim mu'ellimning délosini ene shu abduréhim yunus turghuzghan.

Hörmetlik radiyo anglighuchilar, yuqirida 83 yashliq rabiyxan musa anini qaxshatqan, börtala sheherlik saqchi idarisining mu'awin bashliqi abduréhim yunusning xitay memliketlik saqchi qehrimani bolup mukapatlan'ghanliqi heqqide tepsiliy xewer berduq.